Ezekiyele 34 - Livulu lya Shukulu Kalunga

Tunyungi va Isalele

¹ Shukulu Kalunga wendekele kuli yange ngwendi,

² “Muna munu, leka vaka-kushwana va mu Isalele. Ambulula vuka-kwimanena, valeke vinjendeka kuli vakevo yange Kalunga wa Akamwa ya Vyoshe, ngwove, ‘Munavindama, yeni tunyungi va Isalele! Mulinakulilisa yeni vavenya, oloni kumwesi nakunyunga vimanga embwe.

³ Yeni munwa mavele, nakuzala vuzalo vwa maka a vimanga, mutsiya nakulya vimanga vavavwa vakununa. Oloni kumwesi kunyunga vimanga.

⁴ Kumwesi kunyunga vaje vakuzeya, nambe kusaka vaje valinakuvinja, nambe kukuta a vimbandu vya vaje vanavulumuka, nambe kwilwisa vaje valinakuyevangela mwangoco, nambe kushakezeka vaje vanazimbala. Oloni yeni munavapangesa na vukalu na muuka

⁵ Omwo vimanga vaje kuvakele na kanyungi, co vashandokele, co omo vashandokele, vikashama va mu shwata vavatsiile nakuvalya.

⁶ Ngecivene, vimanga vange vayevangelele akamwa ya malundu amalaja na ku minkinda. Vashandokelele mu kaye mwoshe, co naumo wai wavashakezekele nambe kuvakengezeka.

⁷ “ ‘Ngecivene, ololo, yeni tunyungi, tolilileni evi vinjendeka kuli yeni yange Kalunga wa Akamwa ya Vyoshe.

⁸ Mwa vushunga omo njapwa Njambi wakuyoya, mwapandele kutolilila kuli yange. Vimanga vyange vavalwisile ku vikashama va mu shwata vaje vavatsiile nakuvalya, omwo kuvakele na kanyungi. Tunyungi vange kuvashakezekele vimanga. Valinyungile lika vakevo vavenya kutuvakana kunyunga vimanga.

⁹ Ngecivene, tolilileni kuli yange, yeni tunyungi.

¹⁰ Yange Kalunga wa Akamwa ya Vyoshe, njendeka ngwange yange njinapu nji citozi ceni. Njikamitambula vimanga vange, kumukapu lalo tunyungi twavo, kunjikatava ngeci mulilise yeni vavenya lika embwe. Njikaamena vimanga vange nakuvatundisa kuli yeni, co kunjikatava lalo ngeci mukavalye embwe.’ ”

Kanyungi wamuvwa

¹¹ “Yange Kalunga wa Akamwa ya Vyoshe, njimileka ngwange yange vavenya njikashakezeka vimanga vange, co njikavanyunga,

¹² mu ngila ije vene kanyungi akanyungu vimanga vendi vaje valishandokele, co avakungulwila amolika lalo. Njikavanena lalo nakuvelwisa kutunda ku mitambela kuje kuvalishandokelele a litangwa lije lya lisusulungu, na n̄avava.

¹³ Njikavatundisa ku mafuti a vungenzi, nakuvakungulwila amolika, co njikavelwisila ku lifuti lyavo vavenya. Njikavatwamenena ku minkinda na ku vana va vindonga vya Isalele, co njikavalisila ku mwila wauvwa.

¹⁴ Njikavalisila ku mwila wauvwa mu kwoloka mukati ka minkinda na mu vyana na mu mitambela ya mwila wauvwa ya mu lifuti lya Isalele.

¹⁵ Yange vavenya njikapwa kanyungi ka vimanga vange, co njikavatwamenena ku mutambela wakuhwimina. Munjinendeka yange Kalunga wa Akamwa ya Vyoshe.

¹⁶ “Njikashakezeka vaje vanazimbala nakwilwisa vaje valinakuyevangela mwangoco, co njikakuta vaje vanavetwa, nakukangwisa vaje valinakuvinja, oloni vaje vakununa vali na nzili njikavanyongesa, omwo yange njapwa kanyungi uje akalingi vya vushunga.

¹⁷ “Ngecivene, ololo, vutanga vwange, yange Kalunga wa Akamwa ya Vyoshe njimileka ngwange, njikasompa vimanga na vimanga, co njikaangununa vavavwa ku vavavi, co njikaangununa vimanga ku vimembe.

¹⁸ Vamo veni kuvapwisilemo kulya mwila wauvwa, mulinakulyatangela mwila uje kumushaka kulya! Munwa mema amavwa, co muvundula aje kumushaka kunwa!

¹⁹ Vimanga vange vamo valinakulya mwila uje mulinakulyatangela asi, nakunwa mema aje mulinakuvundula.

²⁰ “Ngecivene, ololo, yange Kalunga wa Akamwa ya Vyoshe, njimileka ngwange, njikasompa akati ka vimanga vakununa na vimanga vakuyondwa.

²¹ Yeni vimanga vakununa mukafwembula vimanga vakuyondwa, co mumbola vaje vakuyondwa mambinga eni nakuvashandwela kulyala na vutanga.

²² Oloni njikaamena vimanga vange, kuvakavayandesa lalo embwe. Njikasompa vimanga vange umo na umo, co njikaangununa vavavwa kuvatundisa ku vavavi.

²³ Asinoni njikavana kanyungi umolika, ikeye ngamba yange Ndaviti, ikeye akavanyunga, co akapwa kanyungi kavo.

²⁴ Yange Kalunga, njikapwa Njambi yavo, co ngamba yange Ndaviti, akapwa muka-kuvashwana. Munjinendeka yange Kalunga.

²⁵ Njikalikumiiya navo cikumiiyo ca kwoloka. Njikatundisa tusitu voshe va vushonde mu lifuti, ngeci vimanga vange vakakale mwamuvwa mu mahya nakulala mwamuvwa mu shwata.

²⁶ “Njikavavezikisa nakuvezikisa mitambela ije inazengeleka lilundu lyange lyakujela. Njikatuma nyonzi ya vusuku-mbundu kupwa vivezikiso vyavo.

²⁷ Miti ikema vushuka, co mu mahya mukamena vimbuto, munu akakala mu kwoloka mu lifuti lyendi vavenya. Omo njikavatula malyenge a vanu vange nakuvapatula kuli vaje vavapwisile vinzinda, asinoni vakazivuka ngeci yange njapwa Kalunga.

²⁸ Miyati ya vaka-kujeneka kukulaela kuvakavevila, co vikashama va mu shwata kuvakavatsii nakuvalya. Vakakala mu kwoloka, co naumo wai akavazivisa lalo lyova.

²⁹ Njikavana mahya a vwilo, co njikamanesa njala ya lyangengela mu lifuti. Miyati yeka kuvakavashendumuna lalo.

³⁰ Asinoni vanu voshe vakazivuka ngeci yange Kalunga Njambi yavo, muka-kuvanyunga, co vakevo vanu va Isalele vanapu vanu vange. Mwanendeka Shukulu Kalunga wa Akamwa ya Vyoshe.

³¹ “Yeni vimanga vange, munapu vimanga va ku vulilo vwange, munapu mu vanu vange, co yange njinapu Njambi yeni.” Mwanendeka Shukulu Kalunga wa Akamwa ya Vyoshe.