Ezekiyele 33 - Livulu lya Shukulu Kalunga

Njambi emika Ezekiyele kupwa muka-kunyunga

¹ Shukulu Kalunga wendekele kuli yange ngwendi,

² “Muna munu, leka vanu vove vije vikalingiwa omo njinena nzita mu lifuti. Vanu va muje mu lifuti vakaangula umo uje napande kupwa muka-kunyunga.

³ Omo amona citozi alinakushwenya, co aimba lupembo mukunangula vanu.

⁴ Nga munu umo azivako oloni shendi kumbako mbunge, co citozi aija nakumutsiya, co mulonga wa kutsa kwendi ukakala a mutwe wendi vavenya.

⁵ Kutsa kwendi cinapu mulonga wendi vavenya, omwo kombileko mbunge kukumunangula. Nga wombileko mbunge, nga wasele kuputumuka nakwamena mwonyo wendi.

⁶ Ngecivene, nga muka-kunyunga amona citozi alinakwija, co kaimbi lupembo, co citozi aija nakutsiya vaje vaka-vuvi, oloni njikana uje muka-kunyunga mulonga a kutsa kwavo.

⁷ “Ololo, muna munu, njilinakukupwisa muka-kunyunga muyati wa Isalele. Unapande kuvanangula vije vinjikuleka.

⁸ Nga njambulula ngwange munu woshe muka-vuvi akatsa, oloni yove kuumunangula ngeci atenguluke ku vingila vyendi ayoye, co atsa anga nacipu muka-vuvi, co njikakwana mulonga omwo a kutsa kwendi.

⁹ Nga unangula muka-vuvi, oloni ikeye kalikela kulinga vuvi, co akatsa anga nacipu muka-vuvi, oloni yove ukayoya.”

Vipangi vya munu na munu

¹⁰ Shukulu Kalunga wendekele kuli yange ngwendi, “Muna munu, ilukilamo lalo kuli vaIsalele vije vivalinakwendeka ngwavo, ‘Tunalemuwa na vuvi vwetu na kupenga-penga cije citunalingi. Tulinakunyonga. Vatijo twasa kuyoya?’

¹¹ Valeke ngwove mwa vushunga ngwe yange Kalunga wa Akamwa ya Vyoshe, njapwa Njambi wakuyoya, kunjesi kuvwaelela a kutsa kwa muka-vuvi. Njishaka kumumona naseza kulinga vuvi, co ayoya. Isalele, likele vuvi vuje vuulinakulinga. Omwo vikajo ushakela kutsa?

¹² “Ololo, muna munu, leka vaIsalele ngwove omo muka-vushunga alinga vuvi, co vuvwa vuje vwanalingile laja kuvukamwamena. Nga muka-vuvi alikela kulinga vuvi, co kuvakamunyanyamesa embwe. Co nga muka-vushunga ashangumuka kulinga vuvi, co kasa kuyoya.

¹³ Njasa kukulaesa mwonyo muka-vushunga, oloni nga akulaela mu vushunga vwendi vwalaja nakushangumuka kulinga vuvi, co kunjikanuka lalo vuvwa vuje vwalingile nalumo lwai. Akatsa omwo a vuvi vuje vwanalingi.

¹⁴ Njasa kunangula muka-vuvi ngwange atsa, oloni nga alikela kulinga vuvi, co alinga vije vyakushungama na vuvwa,

¹⁵ nga elwisa cuma cije cambatele kupwa cishimbikiya, nambe kwilwisa vije wevile, nga alikela kulinga vuvi, co akavangeya mashiko aje aana mwonyo, kakatsi embwe, oloni akayoya.

¹⁶ Njikasambesa vuvi vuje vwanalingi, co akayoya omwo nalingi vya vushunga na vuvwa.

¹⁷ “Vanu vove vendeka ngwavo vije njilinakulinga kesi vya vushunga! Embwe, vingila vyavo vikevyo kesi vya vushunga.

¹⁸ Omo muka-vushunga alikela kulinga vyavivwa, co ashangumuka kulinga vuvi, akatsilamo vene.

¹⁹ Omo muka-vuvi aseza kulinga vuvi, co alinga vije vyakushungama na vuvwa, namena mwonyo wendi.

²⁰ Oloni Isalele, wendeka ngwove vije njilinakulinga kesi vya vushunga. Njikakusompa a vije ulinakulinga.”

Muzimbu wakuwa kwa Yelusalema

²¹ A litangwa lyamucitanu ku ngonde yamulikumi mu mwaka wamulikumi na ivali wa vunzinda vwetu, munalume umo uje waputumukile kutunda ku Yelusalema wezile nakunjileka ngwendi Yelusalema inasiwuka.

²² Ku cingwezi omo te kanda aije, njazivile nzili ya Shukulu Kalunga. Omo uje munalume wetele alikaki mutondo, co Shukulu Kalunga wanjanene nzili yakwendeka.

Vuvi vwa vanu

²³ Shukulu Kalunga wendekele kuli yange ngwendi,

²⁴ “Muna munu, vanu vaje valinakuyoya mu vinganda vije vinasiwuka vya mu lifuti lya Isalele valinakwendeka ngwavo, ‘Avilahama wapwile munu umolika, co vamwanene lifuti lyoshe. Yetu tunapu tuvavangi, ngecivene, ololo lifuti linapu lyetu!’

²⁵ “Valeke vije yange Kalunga wa Akamwa ya Vyoshe, njilinakwendeka ngwange, ‘Mulya situ oku ili na maninga. Mulinakulemesa tumponya. Mulinakutsiya. Cuma mukajo cimiyongwesa ngeci lifuti linapu lyeni?

²⁶ Munakulaela mikwale yeni. Vilinga vyeni vinapu vya vunyengwe. Vanu voshe valinga vupangala. Co vikajo vimiyongwesa ngeci lifuti linapu lyeni?’

²⁷ “Valeke ngwove yange Kalunga wa Akamwa ya Vyoshe, njivanangula ngwange akupwa nji Njambi wakuyoya, vanu vaje valinakuyoya mu vinganda vije vinasiwuka vakavatsiya. Vaje valinakuyoya mu lifuti vakaliwa ku vikashama. Co vaje valinakuvanda ku minkinda na mu manzenzengoma vakatsa ku mushongo.

²⁸ Co lifuti njikalipwisa vingundu vyangoco, co nzili ije vakele nakulyalesela nayo ikahwa. Minkinda ya Isalele ikapwa mambo yangoco, co naumo wai akasa kwita mukati kayo.

²⁹ Omo njikanyanyamesa vanu a vuvi vwavo, nakupwisa lifuti vingundu vyangoco, asinoni vakazivuka ngeci yange njapwa Kalunga.”

Vije visholoka ku majwi a muka-kwimanena

³⁰ Shukulu Kalunga wendekele ngwendi, “Muna munu, vanu vove valinakusimutwiya ali yove, omo vakungulukila ku vivumbe vya nganda nambe ku vikolo vya vinjuvo vyavo kuje kuli mbanja. Co valyendekesa umo na mukwavo ngwavo, ‘Tuyeni tukazive majwi mukajo anatundu kuli Shukulu Kalunga ololo!’

³¹ Ngecivene, vanu vange valikungulula nakuziva vije wendeka, oloni kuvashaka kulinga vije viwuvaleka ngeci vavilinge. Vapwisa majwi ove ngwe myaso ya cizemo, oloni vatwalao kulinga vingila vyavo vya cipululu.

³² Kuli vakevo unapu uwangoco kutuvakana muka-kusikamesa uje aimba myaso ya cizemo nambe kusika kalyalya. Vatolilila ku majwi ove oshe oloni kuvawononoka.

³³ Oloni omo majwi ove oshe apwa a vushunga, apwa a vushunga vene, asinoni vakazivuka ngeci kuma muka-kwimanena nakala akati kavo.”