Ezekiyele 32 - Livulu lya Shukulu Kalunga

Mwene wa ku Ingito vamwesekesa na ngandu

¹ A litangwa lyakulivanga ku ngonde yamulikumi na vivali mu mwaka wamulikumi na ivali wa vunzinda vwetu, Shukulu Kalunga wendekele kuli yange ngwendi,

² “Muna munu, nangula mwene wa Ingito. Muleke lijwi eli lyakutunda kuli yange ngwove, ‘Yove unayongola ngwove unapu ngwe ndumba akati ka miyati, oloni unapu ngwe ngandu muka-kulapa a mema mu ndonga. Yove uvundula mema na mendi nakuviisa mu ndonga.

³ Omo miyati yaingi vakakunguluka, njikakukwata mu linimbwa lyange, co vakakukokangeya nakukutwala a nunda.

⁴ Njikakumbila a nunda, co njikasana tuzila voshe na tusitu va mu kaye ngeci vakukulye.

⁵ Njikashanda situ yove a minkinda, co njikashulisa vyana na vitsiya vyove.

⁶ Njiketila maninga ove mu lifuti, noo anafwiki a minkinda nakushulisa vana va vindonga.

⁷ Omo njikakunyongesa, njikafwika lilu nakuzimangana vingongonosi. Co litangwa njikalifwika na mashelwa, na ngonde kuyikatu lyezi lalo.

⁸ Njikazivalesa ceke coshe ca mwilu, co lifuti lyove likakala mu lisusulungu.’ Munjinendeka yange Kalunga wa Akamwa ya Vyoshe.

⁹ “Vanu vavangi vakalikasamena omo njikashandola muzimbu wakunyonga kwove ku mafuti kuje naumo wai wakuzivukile.

¹⁰ Vije vinjikalinga kuli yove vikakomokesa miyati yaingi. Omo njikahwingisa mukwale wange, co vimyene vakalijujukila manene. A litangwa lije ukawa, voshe vakajaja na lyova omwo myonyo yavo vavenya.”

¹¹ Shukulu Kalunga wa Akamwa ya Vyoshe alinakwendeka kuli mwene wa Ingito ngwendi, “Mukwale wa mwene wa ku Mbambilone ukaija kuli yove nakukulwisa.

¹² Mashwalale va ku miyati ya muuka vakashomona mikwale yavo nakutsiya vanu vove voshe. Vanu vove voshe na vyuma vyoshe vije ukalyalesa navyo vakavinyongesa.

¹³ Njikatsiya vingombe vove voshe kuje kwoshe kuvakanwila mema. Kukukakala lalo vanu nambe vingombe ngeci vavundule lalo mema.

¹⁴ Mema eni akawelelela nakupwa amavwa, co vindonga vyove vikaita mwamuvwa. Munjinendeka yange Kalunga wa Akamwa ya Vyoshe.

¹⁵ Omo njikapwisa Ingito ngundu nakunyongesa voshe vaje vakalamo, co vakazivuka ngeci yange njapwa Kalunga.

¹⁶ Majwi awa akunangula akemuka mwaso wakulila. Vanakazi va miyati yeka vakawimba nakulilila Ingito na vanu vamwo voshe. Munjinendeka yange Kalunga wa Akamwa ya Vyoshe.”

Lifuti lya vatsi

¹⁷ A litangwa lyamulikumi na atanu ku ngonde yakulivanga mu mwaka wamulikumi na ivali wa vunzinda vwetu, Shukulu Kalunga wendekele kuli yange ngwendi,

¹⁸ “Muna munu, lila omwo mbunga yakama ya vanu va mu Ingito. Vashelumwise amo na vakwavo vaka-miyati ya nzili ku lifuti lya vatsi.

¹⁹ Valeke ngwove, ‘Yeni munayongola ngweni munapu muvavavwa manene kutuvakana vakweni ndi? Mukashelumuka ku lifuti lya vatsi nakukakala amo na vaje vaka-kujeneka kukulaela.’

²⁰ “Vaka-Ingito vakalala amo na vaje vavatsiilile mu nzita. Mukwale vanaushomwena cimweja mukuvatsiya voshe.

²¹ Vingenyenye vakama, na vaje valwile ku mutambela wa vaka-Ingito, vakatambula vaka-Ingito ku lifuti lya vatsi. Vakatambeka ngwavo, ‘Vaka-kujeneka kukulaela vaje vavatsiilile mu nzita vanaija kuno, co vanalala kuno!’

²² “Asilya kwali, amo na vimbumbo vya mashwalale vendi voshe vinamuzengeleka. Voshe vavatsiilile mu nzita,

²³ co vimbumbo vyavo vili kwisi-kwisi manene ya lifuti lya vatsi. Mashwalale vendi voshe vatsililile mu nzita, na vimbumbo vyavo vyazengeleka mbumbo yendi. A simbu imo omo vakele nakuyoya vazivisile lyova lifuti lya vaka-kuyoya.

²⁴ “Elame kwali, amo na vimbumbo vya mashwalale vendi voshe vinamuzengeleka. Voshe vanatsi, vavatsiilile mu nzita, voshe vaile mwisi ya livu, kuvapwile vaka-kukulaela. Vazivisile vanu lyova mu lifuti lya vaka-kuyoya, oloni ololo valinakuziva shwamwa amo na vaje vali mu mbulu.

²⁵ Elame nalala mu mbumbo amo na mashwalale vendi vaje vavatsiilile mu nzita, co vimbumbo vya mashwalale vendi vyoshe vinamuzengeleka. Voshe kuvapwile vaka-kukulaela, voshe vavatsiilile mu nzita. Omo vakele nakuyoya vazivisile vanu lyova mu lifuti lya vaka-kuyoya, co ololo valinakuziva shwamwa amo na vaje vali mu mbulu, vanalala akati ka vatsi.

²⁶ “Meshake na Tuvale kuvali, amo na vimbumbo vya mashwalale vavo vyoshe vinavazengeleka. Mashwalale vavo voshe kuvapwile vaka-kukulaela, vavatsiilile mu nzita. A simbu imo vazivisile lyova lifuti lya vaka-kuyoya.

²⁷ Vakevo kuvavatsindile ngeci muje vatsindile vingenyenye va ku laja vaje vavatsindile na vitwa vyavo vya nzita, vavaakele mikwale yavo kwisi ya mitwe yavo, na vintelo vavyakele a mivila yavo. Vingenyenye ava a simbu imo vapwile va nzili mukuzivisa lyova lifuti lya vaka-kuyoya.

²⁸ “Omu mukemwo muvakakala vaka-Ingito amo na vanu vaje vaka-kujeneka kukulaela vaje vavatsiilile mu nzita.

²⁹ “Endome kwali kuje amo na vimyene vendi na vaka-kushwana vendi. Vakevo vapwile mashwalale va nzili manene, oloni ololo vanalala mu lifuti lya vatsi amo na vaje vaka-kujeneka kukulaela vaje vavatsiilile mu nzita.

³⁰ “Vaka-kushwana voshe vakutunda ku kunto na ava voshe vakutunda ku Sindone vali kuje. Nzili yavo a simbu imo yazivisile vanu lyova, oloni navo lalo vanai kwisi na shwamwa amo na vanu vaje vavatsiilile mu nzita, vanavatsindi, kwakujeneka kukulaela. Valinakuziva shwamwa amo na vaje vali mu lifuti lya vatsi.

³¹ “Mwene wa Ingito na mashwalale vendi vakamona vyuma evi, co vakavazembeleka a kutsa kwa mashwalale voshe vaje vavatsiilile mu nzita. Mwalinakwendeka Shukulu Kalunga wa Akamwa ya Vyoshe.

³² “Yange njalingisile mwene wa Ingito kuzivisa lyova vanu va mu lifuti lya vaka-kuyoya, oloni mwene wa Ingito na mashwalale vendi voshe vakalala amo na vaje vaka-kujeneka kukulaela vaje vavatsiilile mu nzita.” Mwanendeka Shukulu Kalunga wa Akamwa ya Vyoshe.