Ezekiyele 31 - Livulu lya Shukulu Kalunga

Ingito vayesekesa na muti wa kendale

¹ A litangwa lyakulivanga ku ngonde yamucitatu mu mwaka wamulikumi naumo wa vunzinda vwetu, Shukulu Kalunga wendekele kuli yange ngwendi,

² “Muna munu, endeka kuli mwene wa Ingito na kuli vanu vendi ngwove, ‘Iyajo alyeseka nove! Njasa kukweseka na vikajo?

³ Yove unalifu ngwe muti wa kendale wa ku Lembanone, uli na minango na munzinze wauvwa. Muti waulaja manene unete na ku mashelwa.

⁴ Mema aukulisile, co mema a tuvwelu-vwelu aukolesele nakuupwisa waulaja. Vindonga vyajalelele kuzengeleka mutambela uje vatombekele muti. Co vana va vindonga vajalelesele miti yoshe ya mu shwata.

⁵ Omwo wakele na mema amangi, co wakolele manene kutuvakana miti ikwavo. Co minango yawo yalizikile nakupwa yailaja.

⁶ Miyati yoshe ya tuzila vatungilileko mashwa ku minango yawo, co tusitu vasemenenemo vana vavo mu munzinze wawo. Miyati yoshe ya mu kaye yahwiminine mu munzinze wawo.

⁷ Muti uje wapwile wauvwa manene, wapwile waulaja manene, na minango yailaja. Co mizi yawo yetele kwisi manene kuje kwetile mema a vana va vindonga.

⁸ Kukwesi lalo muti wa kendale mu lihya lya Njambi vasa kuwesekesa na ukewo wai. Naumo lalo muti wakele na minango ngwe ukewo wai. Co naumo muti wa mu cana wakele na minango ya cifwa cangacije wai. Naumo muti wa mu lihya lya Njambi wavwaele manene ngeci mwa uje wai.

⁹ Njaulingile ngeci upwe wauvwa, ukale na minango yakujanjavala. Miti yoshe ya mu Endeni citungu ca Njambi, vaizivilile cipululu.’

¹⁰ “Ngecivene, ololo, yange Kalunga wa Akamwa ya Vyoshe, njikamileka vije vikalingiwa ku muti uje wakolele noo waketele ku mashelwa. Omo wakolele kupwa waulaja, co wakele na kulyalesa,

¹¹ ngecivene, ou muti njinauvyana, njikatava ntwama wa muka-kwija kuupwisa wendi. Co akaulinga cije cinaupande omwo vuvi vwawo.

¹² Vaka-kwija vakukaluka vakaushinja nakuuseza. Co minango yakwo na ije inapokozokako vikawila a minkinda yoshe na mu cana na mu mitambela ya lifuti. Co miyati yoshe vaje vakele mu munzinze wawo vakauseza.

¹³ Tuzila vakaija nakutongama a minango yawo yakuwa, co tusitu vakalyatangela a minango yawo.

¹⁴ Ngecivene, kutunda ku lelo nakutwala kulutwe, kukwesi muti lalo, nameme vautukumwine vati mema ukapwa waulaja ngwe muti uje lalo, nambe minango yawo lalo kuyikatuvakana minango ikwavo ku vulaja nakweta ku mashelwa. Yoshe ikanyonga, co ikatsa ngwe muvakatsi vanu, ikanyonga nakulipandakana na vaje vashelumukila laja ku vukalo vwa vatsi.”

¹⁵ Evi vikevyo vyalinakwendeka Shukulu Kalunga wa Akamwa ya Vyoshe ngwendi, “A litangwa lije omo muti uje ukaya ku vukalo vwa vatsi, co njikaukupula na mema a tuvwelu-vwelu ngeci cipwe cimweso ca vusiwa. Njikavindika vindonga ngeci mema kesi ende. Omwo uje muti unatsi, co njikanena lisusulungu akamwa ya Minkinda ya Lembanone, nakujujwamesa miti yoshe ya mu shwata.

¹⁶ Omo njikautuma kushelumuka ku vukalo vwa vatsi, co muyoyo wakuwa kwawo ukajajesa miyati. Co miti yoshe ya mu Endeni na miti yoshe ije yakwitangela mwamuvwa yakwangula ya Lembanone, ije yashelumukile laja mwisi ya livu, vakavwaelela akuwa kwawo.

¹⁷ Vakaya amolika nawo ku vukalo vwa vatsi, nakulipandakana na vaje vawile laja. Co voshe vaje vali mwisi ya munzinze wawo, vakavashandwela akati ka miyati.

¹⁸ “Muti unapu mwene wa Ingito na vanu vendi voshe. Kukwesi miti ya mu Endeni yapwile yailaja ngacije na vuvwa. Oloni ololo, ngwe ku cifwa ca miti ya Endeni, muti ou ukashelumukila ku vukalo vwa vatsi, nakulipandakana na vaje vaka-kujeneka kukulaela, na vaje vatsiilile mu nzita. Munjinendeka yange Kalunga wa Akamwa ya Vyoshe.”