Ezekiyele 30 - Livulu lya Shukulu Kalunga

Shukulu Kalunga akanyanyamesa Ingito

¹ Shukulu Kalunga wendekele kuli yange ngwendi,

² “Muna munu, ambulula vuka-kwimanena nakwendeka vije yange Kalunga wa Akamwa ya Vyoshe, njilinakwendeka. Tambeka majwi awa ngwove, ‘Litangwa lya luvinda lili muyehi!

³ Litangwa lili muyehi, omo Shukulu Kalunga akapanga, likapwa litangwa lya mashelwa nakunyonga kwa miyati.

⁴ Kukakala nzita mu Ingito na vusiwa vwakama mu Sundane. Vavangi mu Ingito vakavatsiya, co vufuko vakavupukula nakuvunyongesa.’

⁵ “Nzita ije ikatsiya lalo na mashwalale vakukumuna vakutunda ku Sundane na ku Lindiya na ku Limbiya na ku Alambiya na ku Kuvu nambe vanu vaje va akati ka vanu vange vene.”

⁶ Shukulu Kalunga alinakwendeka ngwendi, “Kutunda ku Mingendole ku kunto nakweta ku Aswane mu mbwela, voshe vaje vaka-kuvingilikiya Ingito vakavatsiila mu nzita. Mbunga ya mashwalale ya kulyalesa ya Ingito vakavanyongesa. Munjinendeka yange Kalunga wa Akamwa ya Vyoshe.

⁷ Lifuti likapwa ngundu yangoco muno mu kaye, na vinganda vyamwo vikasala vyangoco-ngoco.

⁸ Omo njikenyeka Ingito, co vaje vaka-kuyivingilikiya vakatsa, asinoni vakazivuka ngeci yange njapwa Kalunga.

⁹ “Omo litangwa lije lyeta, co Ingito ikanyonga, njikatuma miluwa mu mato akama mukunyangumuna vanu va ku Sundane, co vakavazivisa lyova manene. Litangwa lije lilinakwija!”

¹⁰ Shukulu Kalunga wa Akamwa ya Vyoshe alinakwendeka ngwendi, “Njikapangesa Mwene Nevukaneza wa Mbambilone kumanesa vufuko vwa Ingito.

¹¹ Ikeye na mbunga yendi ya nzita vakaija nakuviisa lifuti. Vakalwisa vaka-Ingito na mikwale, co lifuti likashula na vivimbi.

¹² Njikomisa Ndonga ya Nailo nakwaka vaka-Ingito mwisi ya nzili ya vaka-vuvi. Co vaka-kwija vakaviisa lifuti lyoshe. Munjinendeka yange Kalunga.”

¹³ Shukulu Kalunga wa Akamwa ya Vyoshe alinakwendeka ngwendi, “Njikanyongesa tumponya na vinjambi va makuli mu Mefise, naumo wai akashwana Ingito, njikajujwisa vanu voshe.

¹⁴ Njikapwisa mbwela ya Ingito ngundu, nakwenyeka tuhya a nganda ya Zowane ku kunto. Njikanyanyamesa nganda yakama ya Tevese.

¹⁵ Co njikatava nganda ya Pelusiyame, cimpaka cakama ca Ingito, kuziva vukalu vwange vwakama. Njikanyongesa vufuko vwa Tevese.

¹⁶ Njikashwameka tuhya ku Ingito, co Pelusiyame ikakala mu tuyando. Vivumbe vya Tevese vakavisiwila asi, co nganda ikajalela.

¹⁷ Vakwenje va mu nganda ya Helyopolise na Mbuvasetise vakatsila mu nzita, co vanu vamo vakavatwala mu vunzinda.

¹⁸ Co lisusulungu likawila a Tafanehese omo njikamanesa nzili ya Ingito, nakumanesa nzili yayo ije vakele na kulyalesa nayo. Lishelwa likafwika Ingito, co vanu voshe va mu vinganda vyayo vakavatwala ku vunzinda.

¹⁹ Omo njikanyanyamesa Ingito mu ngila eyi vene, co vakazivuka ngeci yange njapwa Kalunga.”

Kumanesa kwa nzili ya mwene wa Ingito

²⁰ A litangwa lyamucitanu na avali ku ngonde yakulivanga mu mwaka wamulikumi naumo wa vunzinda vwetu, Shukulu Kalunga wendekele kuli yange ngwendi,

²¹ “Muna munu, yange njapokola livoko lya mwene wa Ingito. Co naumo wai nazengeo nanga a mbandu nambe kulyaka mu nanga yakujenjelesa ngeci lyase kukanguka nakukala na nzili yakukwata mukwale lalo.

²² Ngecivene, ololo, evi vikevyo yange Kalunga wa Akamwa ya Vyoshe njilinakwendeka ngwange, ‘Njinapu nji citozi ca mwene wa Ingito. Njikapokola mavoko endi oshe avali, lije lyalivwa na lije likwavo lyapokokele laja, co mukwale ukawa mu livoko lyendi.

²³ Co njikashandwela vaka-Ingito mu kaye mwoshe.

²⁴ Asinoni njikakolesa mavoko a mwene wa Mbambilone nakwaka mukwale wange mu mavoko endi. Oloni njikapokola mavoko a mwene wa Ingito, co akakemanga nakutsila ku mesho a vitozi vendi.

²⁵ Eyo, njikamuzeyesa, nakukolesa mwene wa Mbambilone. Omo njikana mukwale wange kuli mwene wa Mbambilone, co akawinika nakuukengesa ku Ingito vanu voshe vakazivuka ngeci yange njapwa Kalunga.

²⁶ Njikashandwela vaka-Ingito mu kaye mwoshe. Asinoni vakazivuka ngeci yange njapwa Kalunga.’ ”