Ezekiyele 29 - Livulu lya Shukulu Kalunga

Vuka-kwimanena vwakulwisa Ingito

¹ A litangwa lyamulikumi na avali ku ngonde yamulikumi mu mwaka wamulikumi wa vunzinda vwetu, Shukulu Kalunga wendekele kuli yange ngwendi,

² “Muna munu endeka kuli mwene wa Ingito. Leka mwene wa Ingito muje muvakamunyanyamesa ikeye na lifuti lyoshe lya Ingito.

³ Leka mwene wa Ingito ngwove evi vikevyo vyalinakwendeka Shukulu Kalunga wa Akamwa ya Vyoshe ngwendi, ‘Yange nji citozi cove, yove cikashama ngandu, walala mu ndonga. Wendeka ngwove Nailo yapwa yove, co waipangele.

⁴ Njikaka kalovo mu vimbange vyove, co visi va mu ndonga vakakakateya kuli yove. Asinoni njikakukokela a nunda ya Ndonga ya Nailo, amo na visi voshe vaje vanakakateya ali yove.

⁵ Njikakumbila mu mambo amolika na visi va mu ndonga. Muvila wove ukalala asi kuvakakutsindi. Njikana muvila wove ku tuzila na tusitu kupwa vyakulya vyavo.

⁶ Asinoni vanu voshe va mu Ingito vakazivuka ngeci yange njapwa Kalunga.’ ” Shukulu Kalunga alinakwendeka ngwendi, “VaIsalele vajendamenene ali vaka-Ingito mukuvakwasa, oloni yeni mwapwile vakuzeya ngwe mulamu wakukola.

⁷ Omo vajendamenene ali yove, co yove wapokokele, wapokwele vitsili vyavo, co myongo yavo yapokokele.

⁸ Cooni ololo, yange Kalunga wa Akamwa ya Vyoshe, njikuleka ngwange njikatuma vanu kwakukulwisa na mukwale, co vakatsiya vanu vove na tusitu twove.

⁹ Ingito ikapwa ngundu yangoco. Asinoni ukazivuka ngeci yange njapwa Kalunga. “Omwo wendekele ngwove Ndonga ya Nailo yapwa yove, co yove waipangele,

¹⁰ yange nji citozi cove na citozi ca ndonga yove ya Nailo. Njikapwisa Ingito yoshe ngundu yangoco, kutunda ku nganda ya Mingendole ku kunto nakweta ku nganda ya Aswane mu mbwela, kutwala na ku nginga yoshe ya Sundane.

¹¹ Kukwesi munu nambe kasitu akaitamo. A myaka makumi awana, nacimo cai cikakalamo.

¹² Njikapwisa Ingito ngundu ya vingundu vyoshe vya muno mu kaye. A myaka makumi awana, vinganda vya mu Ingito vikapwa vingundu, vikapwa vingundu vyakuviya manene kutuvakana vingundu vya vinganda vikwavo. Njikalingisa vaka-Ingito kupwa vaka-kuliita. Vakatewela ku mafuti eka na eka, co vakakala akati ka vanu veka.”

¹³ Shukulu Kalunga wa Akamwa ya Vyoshe alinakwendeka ngwendi, “Munima ya myaka makumi awana, njikelwisa vaka-Ingito kutunda ku miyati ije injavashandwelelele,

¹⁴ co vakakala mu mbwela ya Ingito, lifuti lya cisemwa cavo. Vakapwa muyati wakuzeya.

¹⁵ Vakakala na vumwene vwakuzeya manene, co kuvakashwana lalo miyati. Njikavapwisa va lutsimo ngeci kesi vase kusindiya miyati yeka kulinga cizango cavo.

¹⁶ VaIsalele kuvakakulaela lalo vaka-Ingito mukuvakwasa. Vanu va Isalele vakanuka ngeci kuma capwile cacivi omo vashakezekele vukwasi kuli vaka-Ingito. Asinoni vaIsalele vakazivuka ngeci yange njapwa Kalunga wa Akamwa ya Vyoshe.”

Mwene Nevukaneza akafungulula Ingito

¹⁷ A litangwa lyakulivanga ku ngonde yakulivanga mu mwaka wamucitanu na ivali wa vunzinda vwetu, Shukulu Kalunga wendekele kuli yange ngwendi,

¹⁸ “Muna munu, Mwene Nevukaneza wa Mbambilone walwisile nganda ya Tile. Ikeye wambatesele mashwalale vendi vitele vyakulema manene ngeci mitwe yavo yakongovokele ngwe lyandya, na a vitsili vyavo akele masetete, oloni nambe mwene nameme mashwalale vendi kuvawanene cikandelela ca nzita yavo yakulwisa Tile.

¹⁹ Ngecivene, evi vikevyo vinjinendeka yange Kalunga wa Akamwa ya Vyoshe ngwange, ‘Njilinakwana lifuti lya Ingito kuli Mwene Nevukaneza. Ikeye akapupa nakupukula vufuko vwoshe vwa ku Ingito kuvupwisa fweto ya mashwalale vendi.

²⁰ Yange njimwana Ingito kupwa fweto yapangelele, omwo Nevukaneza na mashwalale vendi vanjipangelele.’ Munjinendeka yange Kalunga wa Akamwa ya Vyoshe.

²¹ “A litangwa lije vanu va Isalele vakakala lalo na nzili, co yove Ezekiyele njikakuleka vimo viwukendeka akati kavo. Asinoni vakazivuka ngeci yange njapwa Kalunga.”