Ezekiyele 28 - Livulu lya Shukulu Kalunga

Vuka-kwimanena vwakulwisa mwene wa ku Tile

¹ Shukulu Kalunga wendekele kuli yange ngwendi,

² “Muna munu, leka muka-kushwana wa ku Tile evi vinjendeka yange Kalunga wa Akamwa ya Vyoshe ngwove, ‘Mu kulyalesa kwove ulinakwendeka ngwove u njambi. Ulinakwendeka ngwove unatumbama a litanda ngwe njambi mu mema a kalunga. Wasa kuyongola ngwove u njambi oloni yove unapu lika munu kesi u njambi nameme wayongwele ngwove u njambi.

³ Yove unayongola ngwove unapu u muka-mana kutuvakana Ndanele, nacimo cai cakushweka casa kukuvandela.

⁴ Mana ove na vutongwe vwove vikevyo vyakufukisile vufuko vwa ngolinde na siliva.

⁵ Omwo vutongwe vwove vwakama mukulandesa, unalifukisa yove vavenya. Yove uli na kulyalesa omwo vufuko vwove!’

⁶ “Evi vikevyo vinjendeka yange Kalunga wa Akamwa ya Vyoshe ngwange, ‘Omwo yove unayongola ngwove uli na mana ngwe njambi,

⁷ njikanena vitozi va muuka vakukulwise. Vakevo vakanyongesa vufuko vwove vwoshe vuje vuwanganyalele a vutongwe vwove na mana ove.

⁸ Vakevo vakakutsiya, nakukumbila mu mbumbo ya mema.

⁹ Omo vakaija nakukutsiya, kuma lalo ukendeka ngwove unapu u njambi ndi? Ukapwa u munu kesi u njambi omo vakakutsiya.

¹⁰ Yove ukatsa ngwe katali ku mavoko a vangenzi vaje vaka-kujeneka kukulaela. Munjinendeka yange Kalunga wa Akamwa ya Vyoshe.’ ”

Kuwa kwa mwene wa ku Tile

¹¹ Shukulu Kalunga wendekele kuli yange lalo ngwendi,

¹² “Muna munu, linyenge luvinda luje lukaija ali mwene wa ku Tile. Muleke evi vinjendeka yange Kalunga wa Akamwa ya Vyoshe ngwove, ‘Yove wapwile cimweso ca vushunga. Wapwile wa mana na vuvwa.

¹³ Yove wakele mu Endeni lihya lya Njambi, wazalele vya mamanya a miyati yoshe, mamanya a lumbi, na ndaimani, na topaze, na mbelilu, na kanelya, na njasipa, na safile na emalinde, na nganete. Yove wakele na makai a ngolinde. Vakulingililewo a litangwa lije vakutangele.

¹⁴ Yange njaakele kelumbi ngeci akunyunge. Yove wakele a munkinda wange wakujela, co wakele nakwenda akati ka mamanya a seo akuvyazima.

¹⁵ Vilinga vyove vyapwile vyavivwa manene, kutunda a litangwa lije vakutangele noo washangumukile kulinga vuvi.

¹⁶ Yove wakele nakuundangana mukulanda nakulandulula, co eci cakutwamenenene mukulinga muuka namukulinga vuvi. Ngecivene, njakutundisile ku munkinda wange wakujela. Co kelumbi uje wakunyungile wakushekele utunde ku mamanya a seo akuvyazima.

¹⁷ Yove walyalesele omwo vuvwa vwove, co lutsimo lwove lwakulingisile vulema. Omwo cuma eci, njakumbilile asi kupwa cimweso ca vakweni vimyene.

¹⁸ Yove walingile vuvi mukulanda nakulandulula, ngeci mitambela yove ije yakulemesela yaviile. Ngecivene, njashwamekele tuhya a nganda nakuyenyeka. Co njakupwisile lito lya asi ku mesho a vaje voshe vakumwene.

¹⁹ Yove unai, unai ku myaka yoshe, co miyati yoshe vaje vakuzivukile vanalikasamena kuvashaka ngeci na vakevo vawile mu luvinda olu.’ ”

Vuka-kwimanena vwakulwisa Sindone

²⁰ Shukulu Kalunga wendekele kuli yange ngwendi,

²¹ “Muna munu, endeka ku nganda ya Sindone.

²² Leka vanu valimo evi yange Kalunga wa Akamwa ya Vyoshe njendeka kuli vakevo ngwove, ‘Yove Sindone yange nji citozi cove, vanu vakanjishangazala omwo vije njilinga kuli yove. Omwo njikakumwesa kujela kwange akunyanyamesa vanu vaje vayoyela muli yove, co vakazivuka ngeci yange njapwa Kalunga.

²³ Njikatuma mishongo ali yeni, co maninga aketikila mu vitapalo vyove. Vakakulwisa ku mitambela yoshe, co vanu vove vakavatsiya. Asinoni ukazivuka ngwove yange njapwa nji Kalunga.’ ”

Isalele vakavavezikisa

²⁴ Shukulu Kalunga wendekele kuli yange ngwendi, “Muyati wa Isalele kuvakavayandesa lalo, akuvatuva mambimbo na mishwena ku vanu vaje vanavazengeleka. Asinoni vakazivuka ngeci yange njapwa Kalunga wa Akamwa ya Vyoshe.”

²⁵ Shukulu Kalunga wa Akamwa ya Vyoshe wendekele ngwendi, “Njikelwisa vanu va Isalele kutunda ku miyati kuje kunjavashandwelelele, co miyati yoshe vakazivuka ngeci yange njapwa wakujela. Vanu va Isalele vakakala mu lifuti lyavo, lifuti lije linjanene kuli ngamba yange Yakomba.

²⁶ Vakakala mu kwoloka. Vakatunga vinjuvo, co vakalima mahya a mikolovozi ya vushuka vwa vinyu. Njikahisa vandambo vavo voshe vaje vavashendumwine, co Isalele vakakala mu kwoloka. Asinoni vakazivuka ngwavo yange njapwa nji Kalunga Njambi yavo.”