Ezekiyele 27 - Livulu lya Shukulu Kalunga

Mwaso wa Tile wa vusiwa

¹ Shukulu Kalunga wendekele kuli yange ngwendi,

² “Muna munu, imbila Tile mwaso wa vusiwa,

³ nganda ije yakala ku ngenge ya mema a kalunga kuje valinakunganyalela na vanu vaje vakala ku vikuma vyoshe vya mema a kalunga. Valeke vyanendeka Shukulu Kalunga wa Akamwa ya Vyoshe ngwove, ‘Yove Tile, wakele na kulyalesa na vuvwa vwove.

⁴ Limbo lyove lyapwa mema a kalunga. Vaka-kukutunga vakutungile ngwe vwato vwavuvwa.

⁵ Vapangesele mavaya a viti vya tulipi twa ku Munkinda wa Helemone, na viti vya kendale vya ku Lembanone vikevyo vapangesele kanjuvo kove ka akamwa ya vwato.

⁶ Vashongele vilapo vyove na viti vya oke vya ku Mbashane, vapangele vishelo vya vwato vwove na viti vya tulipi vya ku Sepulasi.

⁷ Vyakujavwisa vyove vavipangesele na nanga ya linyu yakushelasana ya ku Ingito, ngeci munu woshe ase kukumona. Vimbalaka vyakufwika a vwato vwove vyapwile vya nanga yaivwa manene, yakuvenguluka ya ku lin̄anda lya Sepulasi.

⁸ Vaka-kujavula vove vatundile ku vinganda vya ku Sindone na ku Alevandi. Vanu vove vaka-kujavula vapwile vaka-vutongwe.

⁹ Vaka-kushonga vwato vapwile vaka-kulilongesa manene va ku Ngembale. Vaka-kujavula vatundile ku mitambela yoshe, valandele mu mavenda a mu vikuma vyove.’

¹⁰ “Vanu vatundile ku Pelesha na ku Lindiya na ku Limbiya vapwile mashwalale vove. Vashukikile vintelo vyavo na vitepa vyavo a vivumbe vyove. Omo vahyanene, co yove wazivile kuvwaa.

¹¹ Mashwalale va ku Alevandi vanyungile vivumbe vyove, co vanalume va ku Ngamandi vanyungile tuposhi twove. Vashukikile vintelo vyavo a vivumbe vyove. Vakevo vakulingisile ngeci upwe uwamuvwa.

¹² “Vanu va ku Tashishi valandulwile nove omwo wapwile muka-kufuka. Valandakanene siliva, na vutale, na citasu, na shumbu.

¹³ Walandulwile vyuma vyove mu Ngelese, na mu Tumbale, na mu Meshake, vufuko vwove wavulandakanene na vindungo na vyuma vya vunengu.

¹⁴ Walandesele vufuko vwove na tuvalu va vipangi, na tuvalu va nzita, na vimulu va ku Mbete Tongalama.

¹⁵ Vanu va ku Ndendane valandulwile nove, co vanu va ku vikuma vyavingi vakwanene mayo a vinjamba na miti yakushonga milamu mukulandakana na vufuko vwove.

¹⁶ Vanu va ku Silya valandulwile nove, omwo wakele na vyuma vyavingi. Valandakanene emalinde, na vinanga vyakuvenguluka, na vinanga vyakushelasana, na vinanga vyavivwa vya linyu, na kolale, na lumbi, mukulanda vufuko vwove.

¹⁷ Yunda na Isalele valandakanene vufuko vwove na tiliku, na vuki, na mazi a olive, na n̄undu.

¹⁸ Vanu va ku Ndamasiku valandele vyuma vyove vyakulandesa na vivala vyove vavilandakanene na vinyu vya ku Heluvone na vwanda vwa ku Sahale.

¹⁹ Valandesele vutale vwakufula na n̄undu mukulandakana na vufuko vwove.

²⁰ Vanu va ku Ndendane valandesele vinanga vya viseleyi vya a tuvalu mukulandakana na vufuko vwove.

²¹ Vaka-Alambiya na vaka-kushwana lifuti lya Kendale valandakanene nove vana va vimanga, na vimanga, na majamba a vimembe.

²² Vaka-kulandesa va ku Shemba na ku Lama valandakanene nove n̄undu yaivwa, na mamanya a seo yakama, na ngolinde.

²³ Vinganda vya Halane, na Kanehe, na Endeni, na vaka-kulandesa va ku Shemba, na vaka-vinganda vya Ashule, na Kilemande, voshe valandulwile nove.

²⁴ Vakulandesele vuzalo vwa senga, na vuzalo vwakuvenguluka, na vwakushelasana, na vinanga vya kujala asi vyakuvyazima manene, na mikole yakwosha.

²⁵ Mato akama atundile ku Tashishi ambatele vivala vyove. Yove wapwile ngwe vwato vwakama vwa ku mema a kalunga, vwakushula na vufuko vwavungi.

²⁶ Omo vaka-kujavula vove vakwakele mu mema a kalunga, co lihunzi lya mu ngangela lyakuvombesele akati ka mema a kalunga.

²⁷ Omo vwato vwove vwavombelele, co vufuko vwove vwoshe vwakulandesa, na vaka-kujavula vove voshe, na vaka-kushonga mato ove, na vaka-kulandesa vove, na mashwalale vove voshe vakele mu vwato, na vyuma vyoshe vyakele mu vwato vyanyongele mu mema a kalunga.

²⁸ Mutambi wa vaka-kujavula vove omo vavombelele, vauzivile vanu vaje vakele a nunda.

²⁹ “Mato oshe anasala mupulungwa, co vaka-kujavula voshe vanatundu mu mato avo nakuya ku nunda.

³⁰ Voshe valinakulila omwo yove, valishawilile livu a mitwe yavo nakulyalanga mu lito.

³¹ Vanateula mitwe yavo omwo yove, co vanazala vikeleya. Vimbunge vyavo vivavala manene omwo valinakulila.

³² Vakwimbila mwaso wa vusiwa ngwavo, ‘Iyajo walifwa na Tile, nganda ije inanyongo mu mema a kalunga?

³³ Omo vyuma vyove vyakulandesa vaile mukuvilandesa, miyati yoshe vavwaelelele. Wafukisile vimyene va asi na vufuko vwove.

³⁴ Ololo unavombela mu mema a kalunga, unavombela a nzinga ya mu mema a kalunga. Vyuma vyove na voshe vaje vakupangelele vanambwitama amo nove mu mema a kalunga.’

³⁵ “Vanu voshe vaje vakala ku cikuma vanakomoka a luvinda lwove. Nambe vimyene vavo vanazivi manene lyova, co lyova linasholoka ku mesho avo.

³⁶ Yove unai, unai ku myaka yoshe, co vaka-kulandesa vaje vali akati ka vanu vanalikasamena, kutsa kwove kunapu kwakuvi manene, kuvashaka ngeci na vakevo lalo vawile mu luvinda olu.”