Ezekiyele 26 - Livulu lya Shukulu Kalunga

Vuka-kwimanena vwakulwisa Tile

¹ A litangwa lyakulivanga ku ngonde ya mwaka wamulikumi naumo wa vunzinda vwetu, Shukulu Kalunga wendekele kuli yange ngwendi,

² “Muna munu, vanu va mu nganda ya Tile vanakuu vanu va mu Yelusalema ngwavo, ‘Ehe! Yelusalema vanayisiwula! Nzili yendi yakulanda nakulandesa inahu! Kakapu lalo citozi cetu!’

³ “Ngecivene, ololo, evi vikevyo yange Kalunga wa Akamwa ya Vyoshe, njilinakwendeka ngwange, ‘Yange njinapu nji citozi cove, yove nganda ya Tile, Njikanena miyati yaingi mukukulwisa, co vakaija ngwe mankimba a mu mema a kalunga.

⁴ Vakanyongesa vivumbe vya nganda yove, nakusiwula tuposhi twove. Asinoni njikakomba livu lyoshe nakuseza lika mamanya angoco.

⁵ Co vaka-kuta visi vakashandao manimbwa avo, aje ainemana a mema a kalunga. Munjinendeka yange Kalunga wa Akamwa ya Vyoshe. Co miyati vakapukula Tile,

⁶ vakatsiya vaje valinakukala mu vinganda vyendi mu lifuti lyakama na vimoko vyavo vya mukwale. Asinoni Tile vakazivuka ngeci yange njapwa Kalunga.’ ”

⁷ Shukulu Kalunga wa Akamwa ya Vyoshe nendeka ngwendi, “Njikashaka mwene wakama manene kutuvakana voshe, ikeye Mwene Nevukaneza wa ku Mbambilone mukulwisa Tile. Akaija kutundilila ku kunto na mahunzi a mbunga ya mashwalale na tuvalu na matemba na vaka-kulonda a tuvalu.

⁸ Co vaje valinakukala mu vinganda mu lifuti lyakama vakavatsiila mu nzita. Vitozi vakenda tupila nakulinga masito nakutunga civumbe cakukola cakulivingilikiya kuli yove.

⁹ Vakavujula vivumbe vyove kulikwasesa vyuma vimo vyakuwisa civumbe nakusiwula tuposhi twove na vivulo vya vikuvo.

¹⁰ Co likungu lya tuvalu twavo likakufwika. Muyoyo wa tuvalu twavo twakukoka makalu na matemba vikaningangesa vivumbe vyove, omo vaketa mu vikolo vya nganda ije ya vivumbe vyakusiwuka.

¹¹ Vaka-kulonda tuvalu twavo vaketa mu vitapalo vyove, nakutsiya vanu vove na mikwale yavo. Vimanda vyove vyakukola vakaviwisila asi.

¹² Co vitozi vove vakapukula vufuko vwove vwa seo. Vakasiwula vivumbe vyove nakupukula vinjuvo vyove vyavivwa. Vakanona mamanya na viti na vyoshe vya mazilo, co vakavyumbila mu mema a kalunga.

¹³ Njikolwesa myaso yove yoshe, co njikakuvindika kwimba tulyalya.

¹⁴ Njikakupwisa limanya lyangoco, aje vaka-kuta visi vakashandao manimbwa avo. Co nganda nalumo lwai lalo vakaitungulula. Munjinendeka yange Kalunga wa Akamwa ya Vyoshe.”

¹⁵ Evi vikevyo vyalinakwendeka Shukulu Kalunga wa Akamwa ya Vyoshe ku nganda ya Tile ngwendi, “Omo vakamifungulula, co vanu vaje valinakukala ku ngenge ya cikuma ca mema a kalunga vakalijajela akuziva kuteta nakulila kwa vaje vavalinakutsiya.

¹⁶ Vimyene voshe va ku vikuma vya mema a kalunga vakashuluka a matanda avo. Vakashulula vikoveyo vyavo vyavilaja mavoko, na vuzalo vwavo vwakushelasana, co vakatumbama asi nakujaja. Vakakala na lyova a kayando kove ngeci kuvakasa kulikela kujaja.

¹⁷ Co vakakwimbila mwaso wa vusiwa ngwavo, ‘Nganda yakutsimana vanainyongesa! Mato ayo vanaatundisa mu mema a kalunga nakuwongumwina kuti. Vanu va mu nganda eyi vakele na nzili a mema a kalunga, nakuzivisa lyova vaje vakele ku ngenge ya cikuma ca mema a kalunga.

¹⁸ A litangwa lije omo nganda yawile, man̄anda ajajele, co vanu vamwo valishoshomwenene akuwa kwa cifwa cangacije.’ ”

¹⁹ Shukulu Kalunga wa Akamwa ya Vyoshe alinakwendeka ngwendi, “Njikakupwisa ngundu ngwe vinganda vyakunyonga muje naumo wai wakalamo. Njikakufwika na mema a kalunga a nzinga yakulova.

²⁰ Njikakushelumwisa kwisi mu lifuti lya vukalo vwa vatsi, ukalipandakana na vanu vaje vakeleko ku simbu ya ku san̄ulu. Ukakala muje mu lifuti lya vatsi myaka yoshe nakulipandakana amo na vatsi. Kuje vene kuukasa kwiluka mukutambula mutambela wove lalo mu lifuti lya vaka-kuyoya.

²¹ Njikakupwisa cimweso cakuzivisa lyova, co aje akapwa mamaneselelo ove. Vanu vakakushakezeka, oloni kuvakakuwana.” Mukemwo mwanendeka Shukulu Kalunga wa Akamwa ya Vyoshe.