Ezekiyele 25 - Livulu lya Shukulu Kalunga

Vuka-kwimanena vwakulwisa Amoni

¹ Shukulu Kalunga wendekele kuli yange ngwendi,

² “Muna munu, ololo ambulula vuka-kwimanena ku lifuti lya Amoni.

³ Valeke vatolilile vije vinjendeka yange Kalunga wa Akamwa ya Vyoshe, ngwange, ‘Munakele nakuvwaelela omo mwamwene Njuvo yange inaviya, nakumona lifuti lya Isalele linashandoka, nakumona vanu va mu Yunda valinakuya ku vunzinda.

⁴ Omwo yeni mwavwaelelele, njikamikundika ku mavoko a vanu vakutunda mu mambo ya mu ngangela ngeci vakamifungulule. Co vakatunga vilombo vyavo mu lifuti lyeni nakukalamo. Vakalya vushuka nakunwa mavele vije vyapandele kupwa vyeni.

⁵ Njikatengulula nganda ya Lamba kupwa mutambela wakulila tumelo, na lifuti lya Amoni kupwa mutambela wakulila vimanga ngeci mukazivuke ngweni yange njapwa Kalunga.’

⁶ “Evi vikevyo vyalinakwendeka Shukulu Kalunga wa Akamwa ya Vyoshe ngwendi, ‘Yove wakandelelele na mavoko ove, nakujombozoka nakujolela. Washawile lifuti lya Isalele.

⁷ Omwo walingile vyuma evi, co njikakwana ku mavoko a miyati yeka ngeci vakakwivile vyove. Co mwa vushunga vene njikakunyongesa, co kuukapu lalo muyati nalumo lwai nambe kukala na lifuti lyove embwe. Asinoni ukazivuka ngeci kuma yange njapwa Kalunga.’ ”

Vuka-kwimanena vwakulwisa Mowavi

⁸ Co Shukulu Kalunga wa Akamwa ya Vyoshe wendekele ngwendi, “Omwo Mowavi vendeka ngwavo Yunda nalifu na miyati yoshe yeka,

⁹ njikatava vinganda vije vilinakuvingilikiya nginga ya Mowavi ngeci vavilwise, kuwezelelako nameme vinganda vije vyavivwa manene Mbete Njeshimote na Mbale Meone na Kilyataime.

¹⁰ Njikatava ngeci miyati ya mu mambo ya mu ngangela vakafungulule Mowavi, amolika na Amoni, ngecivene, Mowavi nalumo lwai lalo vakapwa muyati.

¹¹ Njikanyanyamesa Mowavi, co vakazivuka ngeci yange njapwa Kalunga.”

Vuka-kwimanena vwakulwisa Endome

¹² Shukulu Kalunga wa Akamwa ya Vyoshe wendekele ngwendi, “Vanu va Endome vakele na muuka wa shambandinga ali Yunda, shambandinga ije yanenele mulonga simbu yoshe ali Endome.

¹³ Ngecivene, njendeka ngwange njikanyanyamesa Endome nakutsiya vanalume voshe na tusitu voshe. Njikaipwisa mupulungwa, kutunda ku nganda ya Temane nakweta ku nganda ya Ndendane, co vanu vakavatsiila mu nzita.

¹⁴ Vanu vange va Isalele vakanjilingila shambandinga ali Endome, co vakazivisa Endome vukalu vwange vwakama. Co Endome vakazivuka kulumbunuka kwa shambandinga yange eyi.” Munjinendeka yange Kalunga wa Akamwa ya Vyoshe.

Vuka-kwimanena vwakulwisa Filisitiya

¹⁵ Shukulu Kalunga wa Akamwa ya Vyoshe wendekele ngwendi, “VaFilisitiya vali na muuka wa shambandinga a vitozi vavo valaja, nakuvanyongesa mu cizindo cavo.

¹⁶ Ngecivene, njilinakwendeka ngwange njikalwisa vaFilisitiya nakuvanyongesa. Njikanyongesa voshe vaje vanasala mu cana ca Filisitiya.

¹⁷ Njikavanyanyamesa manene nakuvalinga shambandinga. Co vakaziva vukalu vwange. Asinoni vakazivuka ngeci yange njapwa Kalunga.”