Ezekiyele 24 - Livulu lya Shukulu Kalunga

Ndeo yakuliwa na n̄alawe

¹ A litangwa lyamulikumi ku ngonde yamulikumi mu mwaka wamucitanu na iwana ya vunzinda vwetu, Shukulu Kalunga wendekele kuli yange ngwendi, “Muna munu,

² soneka litangwa lya lelo vungai ku ngonde, omwo litangwa lya lelo vene mwene wa Mbambilone azengeleka Yelusalema.

³ Leka vanu vange vaka-kunjitengulukila cisimo eci yange Kalunga wa Akamwa ya Vyoshe njendeka ngwange, ‘Aka ndeo a liko, co itilamo mema.

⁴ Tetanga situ vipuka-vipuka, vipuka vyavivwa vya mavoko na mendi, co shulisa ndeo na vipuka-vipuka vya vitsiya vyakwangula.

⁵ Pangesa situ yaivwa manene ya vimanga, shambeya vitale ku ndeo ngeci mema atupuke, asinoni teleka vitsiya na situ.’ ”

⁶ Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Inavindama nganda ya vaka-kutsiya! Ikeyo inalifu ngwe ndeo ya n̄alawe ije kuvesi kuvwaesa. Vatundisamo cipuka cimo na cimo noo vipuka vyoshe vinahu.

⁷ Kwakele kutsiya vanu mu nganda, oloni maninga vawetilile a limanya, kuvawetilile asi ngeci vofweleo livu.

⁸ Aje maninga njetilile a limanya lyangoco kujeneka kuwofwela, yange njawetilileo mukushangumuna vukalu vwange na shambandinga.”

⁹ Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Inavindama nganda ya vaka-kutsiya! Yange njikalundika vitale mutumbo.

¹⁰ Lundikeniho vitale vyavingi! Co vwekeni tuhya! Telekeni situ! Shingileniho n̄undu! Co enyekeni vitsiya!

¹¹ Asinoni tumbikeni ndeo ya vunengu yamupulungwa a manungu a tuhya, ngeci yenye. Asinoni ndeo ikajela omo n̄alawe inenye,

¹² nameme ngoco n̄alawe yoshe kuyikenye mu milangi.

¹³ Yove Yelusalema, vilinga vyove vya vupangala vinakujwalesa. Nameme njesekele kukujelesa, anga vene wajwalele. Yove kuukajele lalo kuvanga noo unazivi vukalu vwange.

¹⁴ Munjinendeka yange Kalunga. Cikalingiwa, yange njikacilinga. Kunjikombuko mbunge ku vuvi vwove, nambe kumwesa ngozi nambe kuziva mema ku mbunge. Njikakuhisa a vije viwunalingi.” Munjinendeka yange Kalunga wa Akamwa ya Vyoshe.

Kutsa kwa munakazi wa muka-kwimanena

¹⁵ Shukulu Kalunga wendekele kuli yange ngwendi,

¹⁶ “Muna munu, njikatundisa vwasi-vwasi munu uje iwazema manene. Kesi ukalinyenge nambe kulila.

¹⁷ Linyenge kamandondo, kesi ulile mutsi. Zala kalupusa kove ku mutwe, co zala vin̄aku ku mendi ove. Kesi ufwike cihanga cove nambe kulya vyakulya vije vivakali vaka-kulila.”

¹⁸ Ngecivene, njakele nakusimutwiya na vanu ku mutanya. Co ku cingwezi munakazi wange watsile, co alikaki njalingile ngwe muvanjilekele.

¹⁹ Co vanu vanjihwile ngwavo, “Omwo vikajo ulinakulinga ngacije?”

²⁰ Ngecivene, njendekele kuli vakevo ngwange, “Shukulu Kalunga wendekele kuli yange,

²¹ ngeci njileke vaIsalele ngwange, ‘Mulinakulyalesela a Njuvo ya Shukulu Kalunga. Yeni mulinakushaka kuyikenga nakusikamenamo, oloni Shukulu Kalunga akaishawisa. Co vana veni va vanalume na ava va vanakazi vaje vanasala mu Yelusalema vakavatsiila mu nzita.

²² Asinoni mukalinga ngwe munjinalingi yange. Kumukafwiki ku vihanga vyeni nambe kulya vyakulya vije vivakali vaka-kulila.

²³ Mukazala tulupusa ku mitwe yeni, nakuzala vin̄aku ku mendi eni, kumukalinyenge, nambe kulila, oloni mukanyonga omwo vuvi vweni, co umo na umo weni akakemanga.

²⁴ Asinoni njikapwa cimweso kuli yeni, vyuma vyoshe vije vinjinalingi, vikevyo vimukalinga neni. Shukulu Kalunga nendeka ngwendi omo eci cikasholoka, co mukazivuka ngeci ikeye napu Shukulu Kalunga wa Akamwa ya Vyoshe.’ ”

²⁵ Shukulu Kalunga wendekele ngwendi, “Muna munu, ololo njikatundisa kuli vakevo Njuvo yange ya nzili ije vakele nakulyalesela nakujolela, ije ivazemene kukengako nakusikamenako. Co njikavanyeka vana vavo va vanalume na ava va vanakazi.

²⁶ A litangwa lije njikalinga vyuma evi, co munu uje akovoka kukunyonga akaija nakukuleka vije vinalingiwa.

²⁷ A litangwa lije vene, kanwa kove kakashokoloka, co ukasimutwiya nendi. Mu ngila eyi vene, ukapwa cimweso kuli vanu, co vakevo vakazivuka ngeci yange njapwa Kalunga.”