Ezekiyele 23 - Livulu lya Shukulu Kalunga

Vukwizi vwa vandokazi vavali

¹ Shukulu Kalunga wendekele kuli yange ngwendi,

² “Muna munu, kwakele vandokazi vavali inavo umo.

³ Omo vakele mu Ingito vapwile vambanda, kuvapwile lalo vambanda vaje kanda valimone na vanalume, co vapwile vikwizi.

⁴ Wa mukulunu lizina lyendi Ohola (ikeye wemanenene Samaliya), co wa shongo lizina lyendi Oholimba (ikeye wemanenene Yelusalema). Voshe muvuvali vwavo njavambatele nakukita navo vana.

⁵ Nameme Ohola wapwile wange, oloni wapwile cikwizi, co wazemene vikwizi vendi va ku Asilya.

⁶ Vakevo vapwile mashwalale vaje vazalele vikoveyo vya linyu vyakulifwa vya vushwalale, vapwile vamyata va vulemu, voshe vapwile vakwenje vavavwa vaka-kwendela a tuvalu.

⁷ Ohola wapwile cikwizi wakama kuli vamyata voshe va vaAsilya, co mashungu endi amutwalele kukulijwalesa ikeye vavenya akulemesa tumponya va vaAsilya.

⁸ Kasezele vukwizi vwendi, vuje vwashangumukile mu Ingito omo wapwile mumbanda uje kanda alimone na munalume. Kutunda a simbu ije omo wapwile mumbanda, vanalume valalele nendi nakumupwisa cikwizi.

⁹ Ngecivene, njamukundikile kuli vikwizi vendi va vaAsilya vaje vazemene manene.

¹⁰ Vamushulwile vuzalo vwendi, co vakwatele vana vendi va vanalume na ava va vanakazi, co vamutsiile na mukwale. Ngecivene, vanakazi kwoshe-ikwoshe vendekele a cifwa ca kutsa kwendi.

¹¹ “Nameme ndokazi yendi Oholimba wamwene vyuma evi, oloni ikeye kombileko mbunge, wahyanene vukwizi kutuvakana ndokazi yendi Ohola.

¹² Oholimba wazemene manene vaka-kufuka na vamyata va vaAsilya na mashwalale vaje vazalele vikoveyo vyavivwa vyakulifwa vya vushwalale, na vakulunu vakwendela a tuvalu, na vakwenje voshe vaje vapwile vavavwa manene.

¹³ Co njamwene ngeci Oholimba wapwile wamuvi manene, ngecivene, Ohola na Oholimba muvuvali vwavo, vilinga vyavo vyapwile vyavivi manene.

¹⁴ “Oholimba wahyanesele vukwizi vwendi, omwo wamwene vifwa vya vaMbambilone vyakusoneka a vivumbe na mufwitilo wakuvenga,

¹⁵ vanazala miva ya kandombe mu vimbunda vyavo, na tulupusa twatuvwa ku mitwe yavo, co akuvakenga voshe, vamwanukisile vamyata va vaMbambilone vaka-kwendela a tuvalu.

¹⁶ Omo wavamwene, co wavazemene, watumine tunganda ku Mbambilone ngeci vakavashake.

¹⁷ Co vaMbambilone vezile nakulinga nendi vupangala. Vamupangesele nakumujwalesa manene, co ku mamaneselelo vamwenukwile.

¹⁸ Washolokele ku mesho a vanu voshe, mukumwesa munu woshe ngeci ikeye wapwile cikwizi. Co njamwenukwile ngwe munjenukwile ndokazi yendi Ohola.

¹⁹ Wanukile vukwizi vwendi omo wakele mu Ingito te mumbanda.

²⁰ Ikeye wazemene vikwizi vendi, vaje vakele na mashungu ngwe a tuvalu twa nkomba.

²¹ (Oholimba, yove washakele kwilukila lalo vilinga vyove vyavivi vije viwalingile mu Ingito te u mumbanda, omo vanalume vakele nakulinga nove vupangala.)

Njambi asompa ndokazi wa mwanike

²² “Ngecivene, Oholimba, evi vikevyo vinjendeka kuli yove yange Kalunga wa Akamwa ya Vyoshe. Unenukwa vikwizi vove, oloni yange njikavalingisa ngeci valuvale nove nakuvanena ngeci vakuzengeleke.

²³ Njikakunenela vaMbambilone na vaKalendeya, na vanalume vakutunda ku Pekonde, na ku Showa, na ku Kowa, na vaAsilya voshe. Njikakungulula voshe vaje vakwenje vavavwa vakufuka na vamyata, na voshe vaje vamyata va vanalume, na vakulunu va vulemu vaka-kwendela a tuvalu.

²⁴ Vakaija kutunda ku kunto nakukulwisa, vakaija na matemba, na makalu na mashwalale vavangi. Vakakuzengeleka kwoshe-ikwoshe nakukulwisa oku vanazala vintelo na vitepa vya vikuvo ku mitwe yavo. Co njikakukundika ku mavoko avo, ngeci vakakusompe ngwe ku mashiko avo.

²⁵ Omo njinaluvala nove, vukalu vwavo vukaija ali yove. Co vakavatula lijulu lyove na matwi ove nakutsiya vana vove. Eyo, vakambata vana vove va vanalume na ava va vanakazi, co vakavenyeka mu tuhya.

²⁶ Vakatavozola vuzalo vwove nakukunyeka vyakuzala vyove vya senga.

²⁷ Njikavindika vuvi vwove na vupangala vwove vuje vuwashangumukile omo wakele mu Ingito. Kuukakenge lalo ku tumponya, nambe kuyongola cuma cimo ca mu Ingito.”

²⁸ Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Yange njikakukundika ku mavoko a vanu vaje vawazinda nakwenukwa.

²⁹ Omwo vakevo vakuzinda, vakambata vyuma vyoshe vije viwapangelele, co vakakushulula nakukuseza mushelengwa, ukasholoka ngwe u cikwizi. Mashungu ove na vukwizi vwove

³⁰ vikevyo vinanena evi ali yove. Yove wapwile cikwizi ca miyati yoshe, co walijwalesele na tumponya twavo.

³¹ Yove wakavele vilinga vya ndokazi yove, co nange lalo njikakwana nganja ya cihiso ya cifwa cimo ngeci uyinwe.”

³² Shukulu Kalunga wa Akamwa ya Vyoshe alinakwendeka ngwendi, “Nove ukanwa ku nganja ya ndokazi yove, inapu nganja yakama yakulova. Munu woshe akakuyeluwisa nakukushendumuna, omwo nganja eyi inashulu na vyavingi.

³³ Nganja ya ndokazi yove Samaliya, ikashula nakupenda na vusiwa.

³⁴ Ukainwa nakuyimanesa njwa, co ukaitsiya vimbazuvwila-mbazuvwila, co na vimbazuvwila vyayo ukalengozola mavele ove. Munjinendeka yange Kalunga wa Akamwa ya Vyoshe.”

³⁵ Ngecivene, evi vikevyo vyalinakwendeka Shukulu Kalunga wa Akamwa ya Vyoshe ngwendi, “Omwo unanjivala nakunjikengesa nima, ngecivene, njikakuhisa a mashungu ove na a vukwizi vwove.”

Njambi asompa vandokazi voshe vavali

³⁶ Shukulu Kalunga wendekele kuli yange ngwendi, “Muna munu, unalivwaesela cimweja kusompa Ohola na Oholimba nakuvaleka vilinga vyavo vya vunyengwe ndi?

³⁷ Vanalingi vupangala nakutsiya, vanalingi vupangala akulemesa tumponya, nakutsiya vana vaje njakitile navo. Vanakombelela vana vaje vanjakitile navo kupwa vin̄ombelo vyakwenyekela ku tumponya.

³⁸ Co evi kesi vikevyo lika vivalingile embwe. Vajwalesele Njuvo yange, nakushaula Litangwa Lyakuhwima lije njemikile.

³⁹ A litangwa lije vene vatsiile vana vange nakuvakombelela ku tumponya, likelyo litangwa vezile ku Njuvo yange nakuyijwalesa!

⁴⁰ “Co lalo vatumine tunganda mukulanya vanalume vakutunda kulyala vaije kuli vakevo, omo vaje vanalume vezile, co vaje vandokazi vavali vajwelele nakusona ku mesho avo nakuzala vya senga.

⁴¹ Vatumbamene a vulili vwavuvwa, na mesa yakujala mwamuvwa kulutwe lwavo. Co a mesa yavo akele insense, na mazi a olive anjavanene.

⁴² Co vazivile muyoyo wa mbunga ya vanu vavangi vakele kuje, yapwile mbunga ya vanalume vaje vatundile mu mambo. Vazikile vaje vanakazi makai ku mavoko avo na vilongo vyavivwa ku mitwe yavo.

⁴³ Co njalyendekesele yange vavenya ngwange valinakulinga vukwizi na munakazi uje wezilila laja kulinga vupangala.

⁴⁴ Vanalume ava vakele nakuya ku vikwizi ava kushwakumo. Vakele nakuya kuli Ohola na Oholimba vanakazi va vupangala.

⁴⁵ Vaka-vushunga vakasompa vanakazi ava va vupangala a mulonga wakutsiya, omwo vanakazi vanalingi vupangala, co ku mavoko avo kuli maninga.”

⁴⁶ Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Njikanena munga ya vanu vavavi mu kuvahisa nakuvevila.

⁴⁷ Munga eyi vakavasha mamanya nakuvalwisa na mikwale, nakutsiya vana vavo, nakwenyeka vinjuvo vyavo.

⁴⁸ Njikavindika vupangala mu lifuti lyoshe ngeci vanakazi voshe valilongese kesi valinge vupangala ngwe muvalingile.

⁴⁹ Ngecivene, yeni vandokazi vavali njikamihisa a vupangala vweni na a vuvi vweni vwakulemesa tumponya. Asinoni mukazivuka ngeci yange njapwa Kalunga wa Akamwa ya Vyoshe.”