Ezekiyele 22 - Livulu lya Shukulu Kalunga

Milonga ya Yelusalema

¹ Shukulu Kalunga wendekele kuli yange ngwendi,

² “Muna munu, utava kusompa nganda eyi inashulu na vaka-kutsiya ndi? Ileke vyuma vyoshe vya vunyengwe vije viinalingi.

³ Leka nganda vije vinjendeka yange Kalunga wa Akamwa ya vyoshe ngwove, ‘Yelusalema, yove unapu nganda ije ilinakutsiya vanu vaje valinakukalamo, omwo ulinakulijwalesa akulemesa tumponya, simbu yove inete.

⁴ Yove uli na mulonga omwo vanu vaje vawatsiile, nakulijwalesa na tumponya tuje tuwalingile, ngecivene, litangwa lyove lilinakwija, simbu inete. Mukemwo njinatava miyati yoshe vakushendumune, na mafuti oshe vakuyeluwise.

⁵ Mafuti amuyehi na mafuti a kulyala vakuyeluwisa, omwo tuyando twove.

⁶ Vantwama voshe va Isalele vakulaela mu nzili yavo namukutsiya.

⁷ Naumo wai ali muno mu nganda alinakusingimika visemi vendi. Mulinakukwisa vaka-kwija nakuyandesa vifwile na visiwa.

⁸ Yeni kumwesi nakusingimika mitambela yakujela, co kumwesi nakunyunga Litangwa Lyakuhwima.

⁹ Vanu veni vamo valinakuvangela vakwavo vya makuli ngeci vavatsiye. Vamo valinakulya vin̄ombelo vyakukombelela ku tumponya. Vamo valinakukutisa mashungu avo.

¹⁰ Vamo valinakulinga vupangala na vanakazi va vaishavo. Vamo valinakusindiya vanakazi vaje kuvakwata ku liko kulinga navo vupangala.

¹¹ Vamo valinakulinga vupangala, co vamo valinakukokweya vainamwenwavo kulinga navo vupangala nambe vandokazi vavo va vana va lwale.

¹² Vanu vove vamo valinakutsiya vanu ngeci vavafwete vimbongo. Vamo valinakufwetesa kakondweso a makongo aje valinakwana kuli vavushoko vwavo vaIsalele, co valinakufuka mu ngila ya makuli. Vananjivala yange.’ ” Shukulu Kalunga wa Akamwa ya Vyoshe nendekamo.

¹³ “Njikapangesa nzili yange ali yeni omwo vinganyo vyeni vya makuli vimunanganyala nakutsiya kuje munakala nakutsiya vanu.

¹⁴ Anga ukapwa uwakunyanyama ndi? Anga ukakala na nzili omo njikalinga evi nove ndi? Munjinendeka yange Kalunga, co njikacilinga.

¹⁵ Njikashandwela vanu vove ku mafuti oshe na ku miyati yoshe, co njikamanesa vilinga vyove vya kupenga-penga.

¹⁶ Ngecivene, kuukakala na kasingimiko ku miyati yeka, oloni ukazivuka ngeci yange njapwa Kalunga.”

Lutengo lwa Njambi

¹⁷ Shukulu Kalunga wendekele kuli yange ngwendi,

¹⁸ “Muna munu, vaIsalele kuvesi na seo ku mesho ange. Vanapu ngwe vinyanya vya cikuvo, ngwe vutale, na citasu, na vunengu, na shumbu vije vyakusalao omo vanamanesa kuvwaesa siliva mu lutengo.

¹⁹ Ngecivene, yange Kalunga wa Akamwa ya Vyoshe, njivaleka ngwange voshe vanapu ngwe vinyanya. Yange njikavakungulwila voshe mu Yelusalema,

²⁰ mu ngila imo vene ngwe muvakavwaesa vinyanya vya siliva, na vunengu, na vutale, na shumbu, na citasu mu lutengo. Co vukalu vwange na litoto lyange, vikavasangununa, ngwe tuhya mutukasangununa vinyanya vya siliva.

²¹ Eyo, njikavakungulwila mu Yelusalema, co njikavaekela na tuhya twa mu lutengo, njikavasangununa na vukalu vwange.

²² Vakavasangunwina mu Yelusalema ngwe muvakasangununa siliva mu lutengo, cooni vakazivuka ngeci yange Kalunga njinavanyanyamesa na vukalu vwange.”

Vuvi vwa vantwama va Isalele

²³ Shukulu Kalunga wendekele kuli yange lalo ngwendi,

²⁴ “Muna munu, leka vaIsalele ngwove lifuti lyeni kulyajelele, ngecivene, mu vukalu vwange njilinakuminyanyamesa.

²⁵ Vantwama vavo vanapu ngwe vindumba valinakwaana omo vasanyozola tusitu vaje vavanatsii. Vatsiya vanu nakwambata vimbongo vyoshe na vufuko vuje vuvawana, co akutsiya kwavo oku, valinakupwisa vanakazi vavangi vifwile.

²⁶ Vaka-kukombelela valinakupokola mashiko ange, kujeneka kusingimika vije vyakujela. Kuvasa kwangununa vije vyakujela na vije vyakujeneka kujela. Kuvasa kutepesa akati ka vije vyakujela na vije vyakujeneka kujela, co lalo kuvesi kusingimika Litangwa Lyakuhwima, mukemwo vanu va Isalele kuvesi kunjisingimika.

²⁷ Vamyata va vaka-kushwana vanalifu na tungunga vaje vakasanyozola tusitu vaje vavanatsii. Vakevo vakatsii ngeci vawane vufuko.

²⁸ Vaka-kwimanena vanashweke vuvi ovu ngwe vanu muvakakwiti civumbe na mufwitilo wakutoka. Vakamono vimona vya makuli, co vambulula vyuma vya makuli. Vendeka ngwavo evi vikevyo vyanendeka Shukulu Kalunga wa Akamwa ya Vyoshe, oloni yange Kalunga, kunjendekele kuli vakevo embwe.

²⁹ Vaka-kufuka valinakukwisa nakwiva. Co vayandesa tuutu nakunyanyamena vaka-kwija.

³⁰ Yange njashakezekele munu umo uje asa kutunga civumbe, nakwimana mu mitambela muje munatavozoka vivumbe, nakunyunga lifuti omo vukalu vwange vushaka kulinyongesa, oloni naumo wai njawanenemo.

³¹ Ngecivene, vukalu vwange vukakala ali vakevo omwo vije vivanalingi, co njikavanyongesa ngwe muje mutukanyongesa tuhya.” Shukulu Kalunga wa Akamwa ya Vyoshe nendekamo.