Ezekiyele 21 - Livulu lya Shukulu Kalunga

Mukwale wa Shukulu Kalunga

¹ Shukulu Kalunga wendekele kuli yange ngwendi,

² “Muna munu, endeka ku Yelusalema. Ambulwila lijwi ku mitambela kuje vakalemesela vanu. Ambulula vuka-kwimanena ku lifuti lya Isalele,

³ ngwove yange Kalunga njinendeka ngwange, ‘Nji citozi ceni, njikashomona mukwale wange mu cindalo cawo, co njikamitsiya yeni voshe vaka-vushunga na vaka-vuvi.

⁴ Mukwale wange ukatapa munu woshe wa ku kunto na ku mbwela.

⁵ Co munu woshe akazivuka ngeci yange Kalunga, njinashomona moko yange ya mukwale, co kunjikaiilwisila mu cindalo lalo.’

⁶ “Muna munu, kemanga na mbunge yakuzeya na vusiwa manene ngeci munu woshe akumone.

⁷ Omo vakwihula ngwavo omwo vikajo ulinakukemanga, valeke ngwove omwo muzimbu uje ulinakwija. Omo muzimbu ukaija, co vimbunge vyavo vikakala na lyova, mavoko avo akazeya, vakalijujukila, co mavuli avo akajaja. Vyuma evi vikalingiwa ololo-lolo.” Mwanendeka Shukulu Kalunga wa Akamwa ya Vyoshe.

⁸ Shukulu Kalunga wendekele kuli yange ngwendi,

⁹ “Muna munu, ambulula vuka-kwimanena ngwove yange Kalunga njinendeka ngwange, ‘Mukwale vanaukalula nakuwotola.

¹⁰ Vanawotola ngeci utsiye vanu, co vanaukalula ngeci uvyakule ngwe muhyato. Kukwesi kujolela, omwo vanu vange vanapokola kunangula kwoshe nakunyanyamesa kwoshe.

¹¹ Mukwale vanaukalula laja ngeci vaupangese. Vanawotola nakuukalula, ngeci vawake mu livoko lya muka-kutsiya.

¹² Muna munu, kemanga mu vusiwa, omwo mukwale ou vanaushomwena vanu vange, na vantwama voshe va Isalele. Vakavatsiya amolika na vanu vange voshe. Cinyangavili cove coshe cinapande kuhwa.

¹³ Njilinakwilula vanu vange, nga vavyana kutenguluka, co vyuma vyoshe evi vikalingiwa kuli vakevo.’

¹⁴ “Ngecivene, muna munu, ambulula vuka-kwimanena. Kanda vimbanda na mavoko ove, co mukwale ukavativa kwilukilao nakwilukilao. Ou unapu mukwale wakutsiisa, mukwale wakujujwisa nakutsiya.

¹⁵ Unapu mukwale wakuzeyesa vanu vange nakuvatanukisa. Njilinakulishungwiya nganda yavo na mukwale wakuvyakula ngwe muhyato, vanawinika ngeci utsiye vanu.

¹⁶ Vatozola ku cilyo na ku cimoshwe, yove mukwale wakuvambuka! Tapa kwoshe kuutengulukila.

¹⁷ Nange lalo njikakanda vimbanda na mavoko ange, co vukalu vwange vukahwa. Munjinendeka yange Kalunga.”

Mukwale wa mwene wa ku Mbambilone

¹⁸ Shukulu Kalunga wendekele kuli yange ngwendi,

¹⁹ “Muna munu, aka cimweso mu vingila vivali muje mwakezilila mwene wa ku Mbambilone na mukwale wendi. Vingila vyoshe vivali vishangumukile mu lifuti limo. Aka vimweso ku masambwa-ngila.

²⁰ Ngila imo ikamwesa mwene ngila yakuya ku nganda ya vaAmoni ku Lamba, co ngila ikwavo yakuya ku Yunda, ku Yelusalema nganda ya cimpaka.

²¹ Mwene wa ku Mbambilone nemana ku masambwa-ngila ku manda ya cimweso. Mukweseka kuwana ngila ika yaila, alinakuningangesa mikili yendi, nakwihula tumponya twendi, nakwilula mwamuvwa lishuli lya kasitu wakukombelela.

²² Ku livoko lyendi lya cilyo nakwata mukili wakusoneka ngwavo ‘Yelusalema.’ Uje mukili umuleka kuya nakwaka vyuma vimo vyakulikwasesa kuwisa civumbe mu mwela yavyo, nakutambeka mutambi wa nzita, nakwaka vyuma vimo vyakulikwasesa kuwisa civumbe kuyehi na vikolo, nakulinga mikinya ya livu kuzengeleka cimpaka, nakwinda tupila.

²³ Oloni vanu va mu Yelusalema kuvakakulaela vyuma evi, omwo lizivasano lije livalingile. Oloni cuma eci cinapu cakuvanukisa vuvi vwavo nakuvanangula ngeci vakavafungulula.

²⁴ Eci cikeco yange Kalunga wa Akamwa ya Vyoshe njilinakwendeka. Vuvi vweni vunasholoka. Munu woshe nazivuka milonga yeni. Mulinakusholola vuvi vweni a vilinga vyeni vyoshe. Vanamihisa laja, co njikamyana kuli vitozi veni.

²⁵ “Yove muka-vuvi, muka-kushwana wa Isalele wakujela, litangwa lya cihiso cove cakumanesela lilinakwija.

²⁶ Munjinendeka yange Kalunga wa Akamwa ya Vyoshe. Tundisa cilongo cove na kalupusa kove. Cuma nacimo cai cikalifwa lalo. Aka ku vukama vaje vavandondo, co lalo aka kuvundondo vaje valinakushwana.

²⁷ Kunyongesa, kunyongesa! Eyo, njikanyongesa eyi nganda. Oloni kucikalingiwa kuvanga naija uje injinaangula kuhisa nganda. Asinoni njikamwanayo.

Mukwale na vaAmoni

²⁸ “Muna munu, ambulula vuka-kwimanena. Ambulula evi yange Kalunga wa Akamwa ya Vyoshe, njilinakwendeka kuli vaAmoni vaje valinakushaula Isalele, endeka kuli vakevo ngwove, ‘Mukwale vanauvwaesela cimweja kunyongesa, vanaukalula mukutsiya, uvyakula ngwe muhyato.’

²⁹ “Vimona vije mulinakumona vinapu vya makuli, na vyuma vije mulinakutumbula vinapu vya makuli. Yeni munapu vaka-vuvi na vaka-kupenga-penga, co litangwa lyeni lya cihiso cakumanesela lilinakwija. Co mukwale ukatapa mikoshi yeni.

³⁰ “Shomekeni mukwale weni mu cindalo cawo! Njikamisompesa ku mutambela uje vamitangelele, na mu lifuti muje vamikitilile.

³¹ Vukalu vwange vukaija ali yeni ngwe tuhya twakushukuma. Co njikamyana ku mavoko a vanu vavavi, vaje vazivuka manene kunyongesa vanu.

³² Yeni mukanyonga ku tuhya. Co maninga eni aketikila mu lifuti, naumo wai akamyanuka lalo.” Munjinendeka yange Kalunga.