Ezekiyele 20 - Livulu lya Shukulu Kalunga

Cizango ca Shukulu Kalunga na kaleulwizi ka munu

¹ Lyapwile litangwa lyamulikumi, ku ngonde yamucitanu mu mwaka wamucitanu na ivali a simbu ya vunzinda vwetu. Co vantwama vamo va mbunga ya vaIsalele vezile nakunjihula cizango ca Shukulu Kalunga, co vatumbamene asi kulutwe lwange.

² Asinoni Shukulu Kalunga wendekele kuli yange ngwendi,

³ “Muna munu, endeka kuli vanu ava nakuvaleka ngwove Shukulu Kalunga wa Akamwa ya Vyoshe alinakwendeka ngwendi, ‘Munaija nakwihula cizango cange, indi vati? Mwa vushunga akupwa nji Njambi wakuyoya, kunjikamitava kunjihula cuma cimo embwe,’ munjinendeka yange Kalunga wa Akamwa ya Vyoshe.

⁴ “Muna munu, unalivwaesela cimweja kuvasompa ndi? Unapande kuvasompa. Vanukise vyuma vya vunyengwe vije vivalingile vakukulwila vavo.

⁵ Valeke vije vinjilinakwendeka. Omwo njaangwile Isalele, njavapwisile lizivasano. Njalisholwele kuli vakevo mu Ingito nakuvaleka ngwange yange njapwa nji Kalunga Njambi yeni.

⁶ Njavakulaesele kuvatundisa mu Ingito nakuvatwamenena ku lifuti lije njavaangwilile, lifuti lya vufuko na vwilo, lifuti lyalivwa manene kutuvakana mafuti oshe.

⁷ Njavalekele kumbila kuti tumponya twa vunyengwe tuje tuvazemene, co kesi valijwalese vakevo vavenya na tumponya twa vinjambi va Ingito, omwo yange njapwa Kalunga Njambi yavo.

⁸ Oloni vanjitengulukilile, co kuvanjitolililile. Kuvombilile kuti tumponya twa vunyengwe, nambe kwecela vinjambi va vaka-Ingito. Njalivwaesela cimweja kuvatava ngeci vazive nzili ya vukalu vwange vwoshe muje mu Ingito.

⁹ Oloni kunjalingilemo, nga njalingilemo, nga lizina lyange lyashaukile, omwo ku mesho a vanu vaje vakele nakukala amo kuje, njambulwile ngwange njikatundisa Isalele mu Ingito.

¹⁰ “Co njavatundisile mu Ingito nakuvatwala mu mambo.

¹¹ Co njavanene mashiko ange nakuvalongesawo, mashiko aje aana mwonyo kuli munu na munu uje awononoka.

¹² Njavanene kunyunga Litangwa Lyakuhwima kupwa cimweso ca cikumiiyo akati ketu, mukuvanukisa ngeci yange njapwa Kalunga, muka-kuvajelesa.

¹³ Oloni nameme mu mambo vanjitengulukilile. Vapokwele mashiko ange, nakuwavyana, mashiko aje aana mwonyo kuli munu na munu uje awononoka. Mwa vushunga vene vazilwile Litangwa Lyakuhwima. Njalivwaeselele kuvatava ngeci vazive nzili ya vukalu vwange muje mu mambo nakuvanyongesa.

¹⁴ Oloni kunjalingilemo, nga njalingilemo, nga lizina lyange lyashaukile akati ka miyati ya vanu vaje vanjimwene njitwamenena vaIsalele kutunda mu Ingito.

¹⁵ Ngecivene, njalisingile muje mu mambo ngwange kunjikasa kuvatwala ku lifuti lije linjavanene, lifuti lya vufuko na vwilo, lifuti lyalivwa manene kutuvakana mafuti oshe.

¹⁶ Njalisingile omwo vavyanene kushika kwange nakupokola mashiko ange nakuzilula Litangwa Lyakuhwima. Co vazemene kulemesa tumponya twavo.

¹⁷ “Oloni njavazivilileko mema ku mbunge. Co njayongwele ngwange kesi njivatsiile muje mu mambo.

¹⁸ Oloni njanangwile vakwenje akati kavo ngwange, ‘Kesi munyunge mashiko aje valingile vakukulwila veni, kesi mukavangeye futisi yavo nambe kulijwalesa na tumponya twavo.

¹⁹ Yange Kalunga Njambi yeni. Ononokeni mashiko ange nakushika kwange.

²⁰ Litangwa Lyakuhwima lipwe lyakujela, ngeci lipwe cimweso ca cikumiiyo cije twalikumiiye, co likamyanukisa ngeci kuma yange njapwa Kalunga Njambi yeni.’

²¹ “Oloni cisemwa cije lalo vanjitengulukilile. Vapokwele mashiko ange, co kuvanyungile kushika kwange, mashiko aje aana mwonyo kuli munu na munu uje awononoka. Vazilwile Litangwa Lyakuhwima. Njalivwaeselele kuvatava ngeci vazive nzili ya vukalu vwange vwoshe muje mu mambo, nakuvatsiya voshe.

²² Oloni kunjalingilemo, nga njalingilemo, nga lizina lyange lyashaukile akati ka miyati ya vanu vaje vanjimwene njitwamenena vaIsalele kutunda mu Ingito.

²³ Ngecivene, njalikumiiye lalo cikumiiyo cikwavo mu mambo. Njalisingile ngeci njikavashandwela mu kaye mwoshe.

²⁴ Njalingile eci omwo vavyanene kushika kwange nakupokola mashiko ange nakuzilula Litangwa Lyakuhwima, co valemesele tumponya tuje vene tuvapangele vakukulwila vavo.

²⁵ “Asinoni njavanene mashiko amavi, nakushika kwakuvi ngeci kesi vase kuyoya.

²⁶ Njavatavele kulijwalesa na vin̄ombelo vyavo vavenya, co njavatavele kukombelela vana vavo va va ntwatwa va vanalume. Eci capwile kuvanyanyamesa, nakuvamwesa ngeci yange njapwa Kalunga.

²⁷ “Co ololo, muna munu, leka vaIsalele vije yange Kalunga wa Akamwa ya Vyoshe, njilinakwendeka kuli vakevo. Eyi inapu ngila ikwavo ivanjishawililemo vakukulwila vavo akujeneka kulongwa kwavo.

²⁸ Njavanenele ku lifuti lije linjavakulaesele kuvana. Omo vakevo vamwene malundu amalaja na miti yakutonola, co vakombeleleleko vin̄ombelo. Co vanjiluvalesele a vin̄ombelo vije venyekele na a vinyu vije vivanenele kupwa milambu.

²⁹ Co njavehwile ngwange, ‘Kulijo mukai nakulemesa vinjambi?’ Co vakumbulwile ngwavo, ‘Tukai ku mitambela yakulemesela.’

³⁰ Ololo leka vaIsalele vije njilinakwendeka yange Kalunga wa Akamwa ya Vyoshe ngwove, ‘Omo vikajo mulinakulinga vuvi vwa muyati umo ngwe vuje vuvalingile vakukulwila veni, akulemesa tumponya twavo?’

³¹ Nameme ku litangwa lya lelo vene mucili nakwana vwana vwa cifwa cimo, nakulijwalesa na tumponya tuje vene akukombelela vana veni ku tumponya mu tuhya. Co yeni lalo vaIsalele mucili nakwija nakwihula vati mucapwa cizango cange! Mwa vushunga vene omo yange njapwa Kalunga wa Akamwa ya Vyoshe, Njambi wakuyoya, kunjikamitava ngeci munjihule cuma cimo embwe.

³² Munayongola ngeci mushaka kupwa ngwe miyati yeka, nakufwa ngwe vanu vaje vayoya mu mafuti eka nakulemesa tumponya twa viti na mamanya. Oloni eci kucikalingiwa embwe.”

Cihiso ca Njambi nakusambesa

³³ “Mwa vushunga vene yange Kalunga wa Akamwa ya Vyoshe, njapwa Njambi wakuyoya njiminangula ngwange mukuluvala kwange njikamishwana na livoko lya nzili, na nzili yange yoshe.

³⁴ Njikamimwesa nzili yange nakuluvala kwange, omo njikamikungulwila amolika, nakumiilwisa kutunda ku mafuti oshe kuje njamishandwelelele.

³⁵ Njikamitwala mu ‘Mambo ya Miyati ya Vanu.’ Co njikaliwana neni kuje mesho na mesho.

³⁶ Njikamisompa ngwe muje munjasompele vakukulwila veni mu mambo ya Sinai, mukemwo mwalinakwendeka Shukulu Kalunga wa Akamwa ya Vyoshe.

³⁷ “Njikamisindiya ngeci mwononoke cikumiiyo cange.

³⁸ Co njikatundisa vaje vaka-kutengulukila na vaka-vuvi akati keni. Njikavatundisa mu lifuti muje muvali nakukala ololo, oloni kunjikavatava lalo kwiluka ku lifuti lya vaIsalele embwe. Co mukazivuka ngeci yange njapwa Kalunga.”

³⁹ Co Shukulu Kalunga wa Akamwa ya Vyoshe wendekele ngwendi, “Ololo, yeni voshe vaIsalele, lizivasaneni! Twaleniho nakupangela tumponya tweni! Oloni njiminangula ngwange munima yevi, mukanjononoka nakulikela kushaula lizina lyange lyakujela akwana vwana ku tumponya tweni.

⁴⁰ Muje mu lifuti, a lilundu lyange lyakujela, munkinda waulaja wa Isalele, yeni voshe vanu va Isalele mukanjilemesa. Co njikavwaelela muli yeni, nakumikulaela ngeci munjinenele vin̄ombelo vyeni, na mulambu weni wauvwa manene, na vwana vweni vwakujela.

⁴¹ Omo njinamiilwisa laja kutunda mu mafuti muje njamishandwelelele, nakumikungulwila amolika, asinoni njikatambula vin̄ombelo vyeni vya kwenyeka, co miyati vakamona ngeci njapwa wakujela.

⁴² Omo njikamiilwisa mu Yelusalema, lifuti lije linjakulaesele kulyana kuli vakukulwila veni, asinoni mukazivuka ngeci yange njapwa Kalunga.

⁴³ Asinoni mukanuka vyuma vyoshe vya vunyengwe vimwalingile na muje mumwalijwalesele. Mukaziva vunyengwe omwo vyuma vyoshe vije vyavivi vimwalingile.

⁴⁴ Omo njikalinga mukunyunga kasingimiko kange, co mukazivuka ngeci yange njapwa Kalunga, njinalingi neni omwo lizina lyange, kesi ngwe omwo vingila vyeni vyavivi nambe ngwe omwo vilinga vyeni vyavivi vije munalingi yeni muyati wa Isalele.” Mwanendeka Shukulu Kalunga wa Akamwa ya Vyoshe.

Tuhya twakutunda mu mbwela

⁴⁵ Shukulu Kalunga wendekele kuli yange ngwendi,

⁴⁶ “Muna munu, kenga mu mbwela. Ambulula vuka-kwimanena ku mbwela nakwendeka majwi a vuka-kwimanena ku shwata ya mu mbwela.

⁴⁷ Leka shwata ya mu mbwela kuziva vije vyalinakwendeka Shukulu Kalunga wa Akamwa ya Vyoshe ngwendi, ‘Kengeni! Njilinakushwameka tuhya, co tukenyeka miti yoshe ije ili muli yove, nameme yakutonola nambe yakuma. Nacimo cai cikasa kutuzima. Tukashalava kutunda mu mbwela nakweta ku kunto, co munu na munu akaziva ntwima ya milangi.

⁴⁸ Co munu woshe akamona ngeci, yange Kalunga, njinashwameka tuhya a shwata, co naumo wai akasa kutuzima.’ ”

⁴⁹ Oloni njendekele ngwange, “Shukulu Kalunga wa Akamwa ya Vyoshe, kesi utave ngeci njicilinge! Munu na munu nalinyenge laja ngwendi simbu yoshe yange njikendeka mu tusau.”