Ezekiyele 2 - Livulu lya Shukulu Kalunga

Njambi asana Ezekiyele kupwa muka-kwimanena

¹ lijwi lyendekele ngwalyo, “Muna munu, katuka. Njishaka kwendeka kuli yove.”

² Omo lijwi lyacikele nakwendeka, co Munzinzime wa Njambi wakovelele muli yange, nakunjimika, co lijwi lyatwaleleo ngwalyo,

³ “Muna munu, njilinakukutuma kuli vanu va Isalele. Vananjitengulukila nakunjilwisa na simbu ino anga vene vananjitengulukila, ngwe muvalingile vakukulwila vavo.

⁴ Vanakaluwisa vimbunge vyavo, co kuvesi nakunjisingimika, ngecivene, njilinakukutuma ukavaleke vije yange Kalunga wa Akamwa ya Vyoshe njendeka kuli vakevo.

⁵ Nambe vaje vaka-kunjitengulukila vakakutolilila nambe kuvakakutolilila, oloni vakazivuka ngwavo muka-kwimanena ali akati kavo.

⁶ “Oloni yove, muna munu, kuwapandele kuvazivila lyova nambe kuziva lyova lya vije vendeka. Vakevo vakakuleulula nakukuyeluwisa, cikapwa ngwe ulinakukala akati ka manyewe. Nameme ngoco, kesi ukazive lyova lya vaje vaka-kunjitengulukila nambe kuziva lyova lya vije vendeka.

⁷ Ukavaleka vyoshe vinjikuleka ngeci ukavyendeke, nambe vakakutolilila nambe kuvakakutolilila. Anuka ngeci vakevo vapwa vaka-kutengulukila.

⁸ “Muna munu, tolilila vinjikuleka. Kesi upwe muka-kutengulukila ngwe vakevo embwe. Ishama kanwa kove ulye evi vinjikwana.”

⁹ Njamwene livoko lyakwolola liija kuli yange, lyakwatele livulu lyakuzenga.

¹⁰ Co livoko lije njamwene lyazengunwine lije livulu lyakuzenga, co njamwene visoneka ku mitambela yoshe ya livulu mukati na anja, vasonekeleo majwi akulila nakulinyenga, nakukemanga na vusiwa.