Ezekiyele 18 - Livulu lya Shukulu Kalunga

Cipangi ca muna munu

¹ Shukulu Kalunga wendekele kuli yange

² ngwendi, “Cisimo mukajo eci vanu valinakwendeka mu lifuti lya Isalele? ‘Visemi valile mikolovozi ya vushuka vwa vinyu vyakungangamena, oloni vana vavo vakevo vazivile kungangamena ku mayo.’ ”

³ Shukulu Kalunga wa Akamwa ya Vyoshe alinakwendeka ngwendi, “Mwa vushunga akupwa nji Njambi wakuyoya, cisimo eci kuvakacendeka lalo mu Isalele.

⁴ Mwonyo wa munu woshe wakundama kuli yange, mwonyo wa cisemi na mwonyo wa mwanike lalo. Munu uje alinga vuvi ikeye akatsa.

⁵ “Nga kuli munu wamuvwa, wa vushunga na kulongwa.

⁶ Kesi kulemesa tumponya twa vaIsalele, nambe kulya situ ije vanakombelela ku tumponya. Kesi kukokweya munakazi wa mukwavo, nambe kulala na munakazi uje kakwata ku liko.

⁷ Kesi kukwisa nambe kwivila munu umo embwe. Akelwisa vije vyakamwana muka-kukumuna kupwa cishimbikiya, muka-kulisa vaka-njala, nakwana vuzalo kuli vaje vali na vuzu.

⁸ Kesi kukumwisa vimbongo ngeci awaneo kakondweso embwe. Akavyana kulinga vuvi, co akatete mulonga mu ngila ya vushunga.

⁹ Munu wa cifwa cangacije muka-kwononoka kushika kwange nakunyunga mwamuvwa mashiko ange. Ikeye muka-vushunga, co akayoya. Mwalinakwendeka Shukulu Kalunga wa Akamwa ya Vyoshe.

¹⁰ “Co nga munu ou ali na munendi muka-kwiva nakutsiya, uje alinga cimo a vyuma evi,

¹¹ vije ishe kavilingile. Akali situ yakukombelela ku tumponya, nakukokweya vanakazi va vakwavo.

¹² Muka-kukwisa tuutu, nakwiva, nakushweka vije vyamwanene muka-kukumuna kupwa cishimbikiya. Muka-kuya ku mitambela ije vakalemesela vaka-kujeneka kukulaela, nakulemesa tumponya twa vunyengwe,

¹³ nakukumwisa vimbongo ngeci awaneo kakondweso. Kuma akayoya ndi? Embwe, kakayoyo. Nalingi vyuma vyoshe evi vya vunyengwe, co akatsa. Maninga endi akakala a mutwe wendi vavenya.

¹⁴ “Nga co munalume ou wamucivali ali na munendi. Munendi amona vuvi vwoshe vwalingile ishe, oloni kasa kumutembunwina.

¹⁵ Kesi kulemesa tumponya twa vaIsalele, nambe kulya situ yakukombelela ku tumponya. Kesi kukokweya munakazi wa munalume weka,

¹⁶ nambe kuyandesa munu umo, nambe kwivila munu umo. Akelwisa vije vyaanene muka-kukumuna kupwa cishimbikiya. Akalisa vaka-njala nakwana vuzalo kuli vaka-vuzu.

¹⁷ Akavyana kulinga vuvi, co kesi kukumwisa vimbongo ngeci awanao kakondweso embwe. Muka-kunyunga mashiko ange nakwononoka kushika kwange. Munu ou kasa kutsa, omwo a vuvi vwa ishe, oloni mwa vushunga akayoya.

¹⁸ Ishe wakele nakukwisa nakwiva, co simbu yoshe wakele nakulinga vuvi kuli munu na munu. Ishe watsile omwo vuvi vwendi vavenya vuje vwalingile.

¹⁹ “Oloni wihula ngwove, ‘Omwo vikajo mwana kayandela a vuvi vwa ishe?’ Kukumbulula cinapu ngeci, uje mwana walingile vushunga na vuvwa. Wanyungile mashiko ange nakuwakava mwamuvwa, co mwa vushunga akayoya.

²⁰ Kuvanga munu uje alinga vuvi ikeye lika atsa. Mwana kasa kuyanda omwo vuvi vwa ishe embwe, nambe ishe kasa kuyanda omwo vuvi vwa munendi embwe. Munu wamuvwa vakamwana cikandelela omwo akulinga vuvwa, co munu wamuvi akayanda omwo a vuvi vwakalingi.

²¹ “Nga muka-vuvi alikela kulinga vuvi, co anyunga mashiko ange, nga alinga vije vya vushunga na vuvwa, co kakatsi embwe, mwa vushunga akayoya.

²² Co vuvi vwendi vwoshe vakavusambesa, co akayoya, omwo nalingi vya vushunga.

²³ Shukulu Kalunga wa Akamwa ya Vyoshe ehula ngwendi, kuma uyongola ngwove njijolela akumona muka-vuvi atsa ndi? Embwe, njikashaka njimumone ngeci natenguluka nakuyoya.

²⁴ “Oloni nga muka-vushunga alikela kulinga mwamuvwa, co ashangumuka kulinga vuvi, na vyuma vyoshe vya vunyengwe vije vivakalingi vaka-vuvi, munu ou napande kutwalao kuyoya ngacije ndi? Embwe! Nacimo cai cacivwa calingile civakanuka. Akatsa omwo akujeneka kulongwa kwendi na a vuvi vwendi.

²⁵ “Oloni mwendeka ngweni, ‘Vije vyalinakulinga Shukulu Kalunga kesi vya vushunga embwe.’ Tolilileni kuli yange, yeni vaIsalele. Kuma mulinakuyongola ngweni ngila ije njilinakulingilamo vyuma kesi ya vushunga ndi? Ngila yeni ikeyo kesi ya vushunga.

²⁶ Omo muka-vushunga alikela kulinga vuvwa, co ashangumuka kulinga vuvi, co atsa, atsa omwo vuvi vuje vwanalingi.

²⁷ Omo muka-vuvi alikela kulinga vuvi, co alinga vije vya vushunga na vuvwa, alinakwamena mwonyo wendi.

²⁸ Ananguka vije vyalinakulinga, co alikela kulinga vuvi, mwa vushunga kakatsi embwe, oloni akatwalao kuyoya.

²⁹ Co yeni vaIsalele mulinakwendeka ngweni, ‘Vije vyalinakulinga Shukulu Kalunga kesi vya vushunga embwe.’ Muyongola ngweni ngila yange kesi ya vushunga, mukemwo ndi? Ngila yeni ikeyo kesi ya vushunga.”

³⁰ Shukulu Kalunga wa Akamwa ya Vyoshe alinakwendeka ngwendi, “Ngecivene, yange Kalunga wa Akamwa ya Vyoshe, njilinakumileka yeni vaIsalele ngwange, njikasompa munu na munu a vije vyanalingi. Tengulukeni mutunde ku vuvi vweni vwoshe vuje vumulinakulinga, kesi mutave vuvi vuminyongese.

³¹ Sezeni vuvi vwoshe vuje munakele nakulinga, co kaleni na mana amaha na vimbunge vyaviha. Omwo vikajo yeni vaIsalele mushaka kutsa?

³² Kunjashakele munu umo ngeci atse, tengulukeni nakutunda ku vuvi vweni, co mukayoya.” Mwanendeka Shukulu Kalunga wa Akamwa ya Vyoshe.