Ezekiyele 17 - Livulu lya Shukulu Kalunga

Cisimo ca vangonga na mukolovozi wa vushuka vwa vinyu

¹ Shukulu Kalunga wendekele kuli yange ngwendi,

² “Muna munu, leka vaIsalele cisimo eci,

³ vazivuke vije vinjilinakwendeka yange Kalunga wa Akamwa ya vyoshe. Kwakele ngonga wakama wa maunga amavwa na mambava akama akujanjavala. Ngonga ou wapulwile ku Minkinda ya Lembanone, nakupokola shongo-shongo ya munango wa muti wa Kendale,

⁴ co watwalele uje munango ku lifuti lya vaka-kulanda nakulandulula nakuwaka mu nganda yavo.

⁵ Asinoni wambatele kamuti kakandondo mu lifuti lya Isalele, co wakakakunine mu lihya lya vwilo, muje mwakele mema simbu yoshe akukakolesa.

⁶ Co kaje kamuti kamenene nakupwa nsina yakutalavala, nakujanjavala kupwa mukolovozi wa vushuka vwa vinyu. Minango yakolele nakujanjavalela ku ngonga, co mizi yakovelele manene mu livu. Co mukolovozi wa vushuka vwa vinyu walifwikile na minango na maputa.

⁷ “Co kwakele ngonga wakama mukwavo wa mambava akama manene na maunga a kuhima. Uje mukolovozi wa vushuka vwa vinyu washalaveselele mizi yawo nakutepwisila maputa awo kuli uje ngonga, mukukulaela ngeci asa kuwana mema amangi manene kutuvakana muje mu lihya muwamenene.

⁸ Oloni uje mukolovozi wa vushuka vwa vinyu vaukunine laja mu lihya lya vwilo, mwa mema amangi ngeci wase kumena mwamuvwa maputa nakwima vushuka nakupwa mukolovozi wa vushuka vwa vinyu vyavivwa.

⁹ “Ngecivene, yange Kalunga wa Akamwa ya Vyoshe, njihula ngwange, ‘Ou mukolovozi wa vushuka vwa vinyu ukayoya nakukola ndi? Kuma uje ngonga wakulivanga kakautukula na mizi yawo, nakupotola vushuka vwawo, nakupokozola minango nakuyecelela ngeci ijujwame ndi? Uje ngonga akanyongesa uje mukolovozi wa vushuka vwa vinyu kujeneka kupangesa nzili yakama nambe muyati wa vanu va nzili kumukwasa.

¹⁰ Eyo, vaukunine, oloni ukayoya nakukola ndi? Kuma kuukajujwama omo lihunzi lya mu ngangela likahuwila kuukewo ndi? Kuma kuukajujwama kuje kuulinakukulila ndi?’ ”

Kulumbunuka kwa cisimo

¹¹ Shukulu Kalunga wendekele kuli yange ngwendi,

¹² “Ihula ava vaka-kutengulukila nga vazivuka muje mucinalumbunukila eci cisimo. Valeke ngwove mwene wa Mbambilone wezile ku Yelusalema nakukwata mwene na vamyata vendi nakuvatwala ku Mbambilone.

¹³ Co waangwile umo wa ku naanga ya mwene, walingile nendi cikumiiyo, nakumusingisa ngeci apwe wa kulongwa. Watwalele vanalume va vulemu kupwa vakwatika,

¹⁴ mukuvindika muyati ngeci kesi winduke lalo, nakumona ngeci mwa vushunga cikumiiyo vase kucinyunga.

¹⁵ Oloni mwene wa mu Yunda watengulukilile Mbambilone, co watumine tutumwa twendi ku Ingito kukashaka tuvalu, na mbunga ya mashwalale yakama. Kuma asa kuhyana ndi? Kuma asa kupatuka akulinga ngacije ndi? Kasa kupokola cikumiiyo kujeneka kumunyanyamesa!

¹⁶ “Shukulu Kalunga wa Akamwa ya Vyoshe alinakwendeka ngwendi, mwa vushunga akupwa nji Njambi wakuyoya, mwene ou akatsila mu Mbambilone, omwo wapokwele cikumiiyo cendi na lizivasano lije lyalizivasanene na mwene wa ku Mbambilone, uje wamupwisile mwene.

¹⁷ Nameme mbunga ya mashwalale va nzili va mwene wa Ingito kuvakasa kumukwasa kulwa omo vaMbambilone vakalinga mikinya ya livu nakwinda vingunja ngeci vatsiye vanu vavangi.

¹⁸ Wapokwele cikumiiyo cendi na lizivasano lije lyalingile. Walingile vyuma vyoshe evi, co ololo kasa kuputumuka embwe.”

¹⁹ Shukulu Kalunga wa Akamwa ya Vyoshe alinakwendeka ngwendi, “Mwa vushunga akupwa nji Njambi wakuyoya, njikamunyanyamesa omwo napokola cikumiiyo cije calikumiiye mu lizina lyange kucinyunga.

²⁰ Njikajangumuna linimbwa lya ciyambi nakulita, co akatsao. Njikamutwala ku Mbambilone nakumunyanyameselako, omwo kapwile muka-kulongwa kuli yange.

²¹ Mashwalale vendi va nzili vakavatsiila mu nzita, co vaje vakasalao vakalishandokela mu mitambela yoshe. Asinoni mukazivuka ngeci yange Kalunga, njinendekamo.”

Cikulaeso ca Njambi ca cinyangavili

²² Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Njikapokola shongo ya njovolwezi ya muti waulaja wa kendale, co njikaukuna a munkinda waulaja,

²³ a munkinda wa Isalele uje waulaja manene. Minango yawo ikakola nakwima vushuka, co ukemuka muti wa kendale wauvwa. Co tuzila va miyati yoshe vakakalako, vakavanda mu munzinze wawo.

²⁴ Miti yoshe ya mu lifuti ikazivuka ngeci yange Kalunga. Njikashinjila asi miti yailaja, nakumenesa miti yaindondo kupwa yailaja. Njikajujwamesa miti yakutonola nakutonolwesa lalo miti yakuma. “Yange Kalunga, njinendekamo, njikalinga vije vinjinendeka ngwange njikavilinga.”