Ezekiyele 16 - Livulu lya Shukulu Kalunga

Yelusalema yakujeneka kulongwa

¹ Shukulu Kalunga wendekele lalo kuli yange ngwendi,

² “Muna munu, leka Yelusalema vyuma vya vunyengwe vije vyalingile.

³ Leka Yelusalema vije vyalinakwendeka nendi Shukulu Kalunga wa Akamwa ya Vyoshe ngwendi, “Yove wasemukilile mu lifuti lya Kanana. Isho wapwile kaAmoli, co vanyoko vapwile kaHiti.

⁴ Omo wasemukile naumo wai wavatwile n̄owa yove, nambe kukujwelesa, nambe kukukwita mwongwa, nambe kukuzengela a nanga.

⁵ Naumo wai wakuzivilileko mema ku mbunge nakukulingilako vyuma evi. Omo wasemukile, naumo wai wakuzemene. Vakumbilile mushandangala yangoco.

⁶ “Asinoni omo njetile kuyehi nove, njakumwene ulivulunga mu maninga ove, walivulungile mu maninga, oloni njakuyoyesele.

⁷ Yange njakukolesele ngwe muti wauvwa. Wakolele na nzili na vulaja, co wapwile mumbanda. Mavele ove apwile amavwa, co vin̄ambu vyove vyakolele, oloni yove wakele mushelengwa.

⁸ “Co omo njetile kuli yove lalo, njamwene ngeci simbu yove inete yakukala na cizemo. Njakufwikile na kazaku kange, co njakulaesele kukuzema. Eyo, njalikumiiye nove cikumiiyo ca vulo, co yove wapwile u wange.” Evi vikevyo vyanendeka Shukulu Kalunga wa Akamwa ya Vyoshe.

⁹ “Asinoni njambatele mema nakujwelesa maninga ove. Co njakuvwavesele mazi a olive a cikonde cove.

¹⁰ Njakuzikile vuzalo vwakushelasana, nakukuzika vin̄aku vyavivwa vya cipapa ku mendi ove, nakukuzika lilesu lyakuseneta ku mutwe, na kazaku ka linyu.

¹¹ Njakuzikile vya senga, maseka a ku mavoko, na sungu mu mukoshi.

¹² Njakwakele kanzeya ku majulu ove, na vimbilingwa ku matwi ove, nakukuzika cilongo cacivwa ku mutwe wove.

¹³ “Wazalele maseka a ngolinde na siliva, co wazalele vinanga vya linyu na nanga yakuseneta yakucakeya. Yove walile likende lyalivwa lyakupanga na vunga vwavuvwa vwa tiliku na vuki na mazi a olive. Vuvwa vwove vwavyazimine, co wapwile vamwene.

¹⁴ Yove watsimanene ku miyati yoshe omwo vuvwa vwove, omwo yange njakulingisile ngeci upwe uwamuvwa manene.” Evi vikevyo vyanendeka Shukulu Kalunga wa Akamwa ya Vyoshe.

¹⁵ “Oloni yove wakulaelele vuvwa vwove, na lutsimo lwove, co walingile vupangala na munu woshe uje wezile kuli yove.

¹⁶ Wapangesele vuzalo vwove nakuvucakeya mu mitambela yove yakulemesela ngeci mwa cikwizi, walikundikile kuli munu woshe-iwoshe.

¹⁷ Wambatele siliva na ngolinde ya senga ije injakwanene, co wayipangesele kuyipwisa tumponya twa vanalume nakulinga navo vupangala.

¹⁸ Wambatele vuzalo vwakushelasana vunjakwanene wavuzikile tumponya, co wakombelelele ku tumponya mazi a olive na insense vije vinjakwanene.

¹⁹ Njakwanene vyakulya, na vunga vwavuvwa vwa tiliku na mazi a olive na vuki, oloni yove wavikombelelele ku tumponya ngeci uvavwaelelese. Evi vikevyo vyanendeka Shukulu Kalunga wa Akamwa ya Vyoshe.

²⁰ “Co lalo watambwile vana va vanalume na ava va vanakazi vaje vawanjikitilile nakuvakombelela kupwa n̄ombelo ku tumponya. Kuma kucapwile cacivi manene kujeneka kulongwa kuli yange,

²¹ nakujeneka kwambata vana vange nakuvakombelela ku tumponya ndi?

²² A simbu yakuyoya kwove kwa vunyengwe omo wapwile cikwizi, kuwanukile simbu ya vwanike vwove, omo wakele mushelengwa nakulivulunga mu maninga ove.”

Vuyoye vwa Yelusalema vwa vukwizi

²³ Shukulu Kalunga wa Akamwa ya Vyoshe wendekele ngwendi, “Unanyongo! Unanyongo! Yove walingile vuvi vwoshe vuje,

²⁴ co watungile mitambela yakulemesela tumponya kumukulo wa vingila vyoshe nakulingilako vupangala.

²⁵ Yove wakokelele vuvwa vwove mukati ka mandova. Yove walyanene kuli munu woshe uje wezile kuyehi nove, co yove walipwisile cikwizi a litangwa na litangwa.

²⁶ Unalingi vupangala na vaka-Ingito va mashungu vaje vawalyata navo, co vupangala vwove vwanjiluvalesele.

²⁷ “Co ololo njinolola livoko lyange, nakukuhisa, co njinakunyeke vivezikiso vyange. Njinakukundika ku mavoko a vaFilisitiya, vaje vakuzinda, co vanazivi vunyengwe vwa vilinga vyove vya vukwizi.

²⁸ “Unalingi lalo vupangala na vaAsilya, omwo kuwakutile na mashungu. Co wapwile cikwizi cavo, oloni nameme ngoco kuvakukutisile na mashungu.

²⁹ Yove lalo wapwile u cikwizi ca vaMbambilone, muyati uje wa vanu vakunganyala, oloni anga vene kuvakukutisile na mashungu.”

³⁰ Evi vikevyo vyendeka Shukulu Kalunga wa Akamwa ya Vyoshe ngwendi, “Unalingi vyoshe evi ngwe cikwizi wakujeneka shwamwa.

³¹ A tapalo na tapalo watungilileo mitambela yakulemesela tumponya, nakulingilao vupangala. Oloni yove kuwatondele vimbongo ngwe vikwizi vamo.

³² Yove unapu ngwe munakazi uje alinga vupangala na vangenzi oloni kazeme munalume wendi.

³³ Vikwizi voshe vakavondo, oloni yove waanene vwana kuli vikwizi vove voshe kupwa lizika-kanwa, ngeci vatunde ku mitambela yoshe valinge nove vupangala.

³⁴ Yove lalo vukwizi vwove vunalyangunuka na vuje vwa vakweni. Naumo wai wakusindiiye kulinga vupangala. Yove kuwesi kutambula fweto, yove ulinakuvafweta! Eyo, mukemwo muunalyangunuka na vakweni.”

Kusompa kwa Njambi a Yelusalema

³⁵ Ngecivene, Yelusalema, yove cikwizi! Tolilila evi vyendeka Shukulu Kalunga.

³⁶ Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Washulwile vuzalo vwove, co akupwa cikwizi, walyanene ku vikwizi vove, na ku tumponya twove twoshe twa vunyengwe, co watsiile vana vove nakuvakombelela ku tumponya.

³⁷ Omwo a cuma eci njikakungulwila amo vikwizi vove voshe valaja, vaje vawashakele na vaje vawazindile. Cooni njikakukungulwilavo ku mitambela yoshe, asinoni njikakushulula vuzalo vwove ngeci vakamone mushelengwa wove.

³⁸ Njikakuhisa akulinga vupangala nakutsiya, co mukuluvala kwange na mu vukalu vwange, njikakusompela kutsa.

³⁹ Njikakukundika mu mavoko avo, co vakasiwula mitambela kuje walingilile vupangala nakulemeselako tumponya. Vakambata vuzalo vwove na sungu yove, co vakakuseza mushelengwa.

⁴⁰ “Vakashongangeya munga ngeci vakwashe mamanya, vakakutetanga vipuka-vipuka na mikwale yavo.

⁴¹ Vakenyeka vinjuvo vyove nakutava mbunga ya vanakazi kumona cihiso cove. Co njikakuvindika kupwa cikwizi, nakukuvindika lalo kwana vwana ku vikwizi vove.

⁴² Asinoni vukalu vwange vukahwa, njikoloka kuluu. Kunjikaluvala lalo nambe kulinga lifuwa.

⁴³ Yove unevala munjakulingile omo wapwile u mwanike, co unanjiluvalesa a vyuma vyoshe vije viwalingile. Mukemwo njinakulingisa ngeci ufwete omwo a vije vyoshe. Omwo vikajo unaakelako lalo vupangala ku vyuma vyoshe vya vunyengwe vije viwalingile?” Mwanendeka Shukulu Kalunga wa Akamwa ya Vyoshe.

Muvafwa vaina mukemwo mwafwa na mwana

⁴⁴ Shukulu Kalunga wendekele ngwendi, “Vanu vakata cisimo eci ali yove Yelusalema ngwavo, ‘Muvafwa vaina mukemwo mwafwa na mwana.’

⁴⁵ Mwa vushunga yove u muna vanyoko. Vanyoko vasezele munalume wavo na vana vavo. Yove wafwa ngwe vandokazi vove, vaje vazindile vanalume vavo na vana vavo. Yove amolika na vinganda vije walifwa navyo mwakele na vanyoko kaHiti, co ishweni wapwile kaAmoli.

⁴⁶ “Ndokazi yove wa mukulunu, wapwa Samaliya, wakala ku kunto na vana vendi. Co ndokazi yove wa mwanike, wapwa Sondoma, wakala mu mbwela na vana vendi.

⁴⁷ Kuma yove kuwapwisilemo kukava vingila vyavo, nambe kulinga vilinga vyavo vya vunyengwe vije vivalingile? Oloni mu kasimbu kakandondo lika, yove walingile vyavivi kutuvakana vije valingile vakevo.

⁴⁸ “Shukulu Kalunga wa Akamwa ya Vyoshe alinakwendeka ngwendi, mwa vushunga vene omo yange njinapu Njambi wakuyoya, ndokazi yove Sondoma na vana vendi kuvalingile vuvi vuje vuulinakulinga yove na vana vove.

⁴⁹ Sondoma na vana vendi valyalesele, omwo vakele na vyakulya vyavingi, co vayoyele mu kwoloka namukuhwima, oloni kuvakwasele tuutu na vanu vaka-kujeneka.

⁵⁰ Valyalesele nakukaluwisa vimbunge vyavo, co valingile vyuma vije vinjazinda, ngecivene, njavanyongesele, ngwe muunazivukila.

⁵¹ “Samaliya kalingile vuvi ngwe vumwalingile yeni. Yeni mwalingile vya vunyengwe manene kutuvakana vuje vwalingile ikeye. Omwo vyuma vyoshe vije vya vunyengwe walingile, wasambesele vandokazi vove kupwa vakujeneka mulonga.

⁵² Ngecivene, ololo, yove ukakala na shwamwa omwo wavangelele vandokazi vove. Vuvi vwove vwapwile vwa vunyengwe manene kutuvakana vuvi vwavo. Vakevo vanasholoka kupwa vakulongwa kutuvakana yove. Ngecivene, ukaziva shwamwa nakushauka omwo wapwisile vandokazi vove kupwa va kulongwa.”

Sondoma na Samaliya vakavelwisa

⁵³ Shukulu Kalunga wendekele ku Yelusalema ngwendi, “Njikavezikisa Sondoma na membo endi, na Samaliya na membo endi. Eyo, nove lalo njikakuvezikisa.

⁵⁴ Ukalizivisa shwamwa yove vavenya, co kushauka kwove kukamwesa vandokazi vove vuvwa vwavo.

⁵⁵ Vakakala lalo mwamuvwa, co yove na membo ove akeluka lalo.

⁵⁶ Kuma kuwashendumwine ndokazi yove Sondoma a matangwa aje omo walyalesele,

⁵⁷ simbu kanda vuvi vwove vuje vuwalingile vusholoke? Co ololo unafu ngwe ikeye, vaEndome na vaFilisitiya na vandambo vove veka vaje vakuzinda valinakukushendumuna.

⁵⁸ Yove unapande kuyanda nakushauka, a vyuma vya vunyengwe vije viwalingile.” Shukulu Kalunga nendekamo.

Cikumiiyo cije cikakala myaka yoshe

⁵⁹ Shukulu Kalunga wa Akamwa ya Vyoshe alinakwendeka ngwendi, “Yange njikakupangesa ngwe mu ngila ije inakupande, omwo kuwombile mbunge ku vikulaeso vyove, co wapokwele cikumiiyo.

⁶⁰ Oloni njikanuka cikumiiyo cije njalikumiiye nove omo wapwile u mwanike, co njikalikumiiya cikumiiyo nove cije cikakala myaka yoshe.

⁶¹ Asinoni ukanuka vije viwalingile, co ukaziva shwamwa omo njikelwisa ndokazi yove wa mukulunu na ndokazi yove wa shongo. Njikakwanavo ngeci vakapwe vana vove va vanakazi, oloni kesi ngwe ku cikumiiyo cove.

⁶² Njikakolesa cikumiiyo nove, co ukazivuka ngeci yange njapwa Kalunga.

⁶³ Njikasambesa kupenga-penga kwove kwoshe kuwalingile, oloni ukavyanuka, co ukakala na shwamwa manene yakuvyendeka na kanwa kove.” Mwanendeka Shukulu Kalunga wa Akamwa ya Vyoshe.