Ezekiyele 14 - Livulu lya Shukulu Kalunga

Njambi ahisa tumponya

¹ Vamo vantwama va vaIsalele vezile nakunjihula cizango ca Shukulu Kalunga.

² Co Shukulu Kalunga wendekele kuli yange ngwendi,

³ “Muna munu, ava vanu vanaaka vimbunge vyavo ku tumponya, co vanecelela tumponya kuvatwamenena mu vuvi. Kuma vanayongola ngwavo yange njikavakumbulula ndi?

⁴ “Ololo endeka kuli vakevo nakuvaleka vije vinjendeka yange Kalunga wa Akamwa ya Vyoshe, ngwange, kaIsalele woshe uje naaka mbunge yendi ku tumponya nakutava ngeci vamutwamenene mu vuvi, co lalo aija nakwihula muka-kwimanena, co njikamukumbulula kukumbulula kuje kunapande tumponya twendi twatungi!

⁵ Tumponya tuje twoshe tunatengulula vaIsalele nakuvatundisa kuli yange, oloni kukumbulula kwange kukavatengulula, co vakanjisingimika lalo.

⁶ “Ngecivene, ololo, leka vaIsalele vije vinjendeka yange Kalunga wa Akamwa ya Vyoshe, ngwange, ilukeni, co sezeni tumponya tweni twa vunyengwe.

⁷ “Simbu yoshe omo umo wa vaIsalele nambe umo wa vaka-kwija uje alinakukala mu munga ya vaIsalele atunda kuli yange nakulemesa tumponya, co aya nakwihula kuli muka-kwimanena, co yange Kalunga njikamukumbulula!

⁸ Co njikamupopolola. Njikamulinga cimweso. Njikamutundisa ku munga ya vanu vange, ngeci ukazivuke ngwove yange njapwa Kalunga.

⁹ “Nga muka-kwimanena akumbulula vya makuli, yange Kalunga njinamulingisa ngeci akumbulule vya makuli. Co njikamutundisa ku vanu va Isalele.

¹⁰ Muvuvali vwavo muka-kwimanena na uje namwihula vakavanyanyamesa mu cifwa cimolika.

¹¹ Njikalinga cuma eci mukunyunga vaIsalele kutewa vatunda kuli yange nakulijwalesa vakevo vavenya na vuvi vwavo. Vanapu vanu vange, nange njinapu Njambi yavo.” Mwanendeka Shukulu Kalunga wa Akamwa ya Vyoshe.

Nowa na Ndanele na Yombi

¹² Shukulu Kalunga wendekele kuli yange ngwendi,

¹³ “Muna munu, nga lifuti lilinga vuvi, nakujeneka kulongwa kuli yange, co njikolola livoko lyange nakuviisa vyakulya vyamwo. Co njikatumamo njala ya lyangengela nakutsiya vanu na tusitu mu cifwa cimolika.

¹⁴ Nameme nga vaje vanalume vatatu, Nowa na Ndanele na Yombi, vakelemo, nga vanamena lika myonyo yavo. Mukemwo mwanendeka Shukulu Kalunga wa Akamwa ya Vyoshe.

¹⁵ “Nambe nga njituma tusitu mukutsiya vanu, co lifuti likale mu vushonde, ngeci munu naumo wai ase kwitamo,

¹⁶ nameme nga vaje vanalume vatatu vakele muje, mwa vushunga vene yange Kalunga wa Akamwa ya Vyoshe, njapwa Njambi wakuyoya, nga kuvasele kwamena nameme myonyo ya vana vavo. Nga vanamena lika myonyo yavo, oloni lifuti likapwa mambo.

¹⁷ “Nambe nga njanenele nzita a lifuti lije, nakutuma vitwa vyakunyongesa, nakuzilula vanu na tusitu mu cifwa cimolika,

¹⁸ nameme nga vaje vanalume vatatu vakele muje, mwa vushunga vene yange Kalunga wa Akamwa ya Vyoshe, njapwa Njambi wakuyoya, nga kuvasele kwamena nameme myonyo ya vana vavo, oloni nga vanamena lika myonyo yavo.

¹⁹ “Nambe nga njituma mushongo wakulitambwisa a lifuti lije, co kuluvala kwange kukatsiya myonyo ya vanu vavangi, kutsiya vanu na tusitu,

²⁰ nameme nga Nowa na Ndanele na Yombi vakele muje, mwa vushunga vene yange Kalunga wa Akamwa ya Vyoshe, njapwa Njambi wakuyoya, nga kuvasele kwamena nameme myonyo ya vana vavo, oloni nga vanamena lika myonyo yavo.”

²¹ Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Njikatuma vihiso vyange viwana vyakama manene a Yelusalema, nzita, na njala ya lyangengela na vikashama na mushongo, mukunyongesa vanu na tusitu mu cifwa cimo.

²² Ngecivene, nga mukasala vamo vakovoka, co vakamena vana vavo, munapande kuvakenga mwamuvwa omo vaija kuli yeni. Kengeni vingila vyavo na vilinga vyavo, co taveni ngeci cihiso cinjilinakunena a Yelusalema cinapu ca vushunga,

²³ asinoni mukazivuke ngeci kuma cihiso cange ali vakevo capwile ca vushunga.” Mwanendeka Shukulu Kalunga wa Akamwa ya Vyoshe.