Ezekiyele 13 - Livulu lya Shukulu Kalunga

Vuka-kwimanena vwakulwisa vaka-kwimanena va vanalume va makuli

¹ Shukulu Kalunga wendekele kuli yange ngwendi,

² “Muna munu, hisa vaka-kwimanena va Isalele vaje valinakulilingila vuka-kwimanena vwavo vavenya. Valeke vatolilile lijwi lya Shukulu Kalunga.”

³ Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Ava vaka-kwimanena va vilema vanavindama! Valinakwendeka viyongola vyavo vavenya nakwambulula vimona vyavo vavenya.

⁴ Yeni vanu va Isalele, vaka-kwimanena veni vanapu ngwe vimbanje vangoco vaje valinakuyoya mukati ka ngundu.

⁵ Kuvesi nakunyunga ku mitambela kuje kunaviya vivumbe, nambe kutungulula vivumbe, ngecivene, Isalele kasa kulyamena omo nzita ikaija a litangwa lya Shukulu Kalunga.

⁶ Vimona vyavo vinapu vya makuli, na vuka-kwimanena vwavo vunapu vwa makuli. Valinakwendeka ngwavo valinakwambulula majwi ange, oloni kunjavatumine embwe. Oloni vashaka ngeci majwi avo apwe a vushunga!

⁷ Njivaleka ngeci vije vimona valinakumona vinapu vya makuli, na vuka-kwimanena vuje valinakwambulula vunapu vwa makuli. Yeni mulinakwendeka ngweni awa anapu majwi ange, oloni kunjendekele kuli yeni embwe!”

⁸ Ngecivene, Shukulu Kalunga wa Akamwa ya Vyoshe alinakwendeka kuli vakevo ngwendi, “Majwi eni anapu a makuli, co lalo na vimona vyeni vinapu vya makuli. Yange njilinakumilwisa.

⁹ Ololo njiminyanyamesa yeni vaka-kwimanena va vimona vya makuli, nakwambulula vuka-kwimanena vwakutanganesa. Kumukakalako, omo vanu vange vakalikungulula nakutumba matumbe, co mazina eni kuvakaakako ku mukana wa mazina a vandambo va Isalele, kumukeluka ku lifuti lyeni. Asinoni mukazivuka ngeci yange Kalunga wa Akamwa ya Vyoshe.

¹⁰ “Vaka-kwimanena valinakuungumwisa vanu vange akwendeka ngwavo vyuma vyoshe vinapu vyavivwa. Oloni mwa vushunga vyuma vyoshe kesi vyavivwa embwe! Vanu vange vanatungu civumbe ca mamanya akushengenya, co vaka-kwimanena vanaija nakucikwita mufwitilo wakutoka.

¹¹ Leka vaka-kwimanena ngwove civumbe cavo cikawila asi. Njikanyokesa nyonzi ya mungole. Nyonzi yakama ya mamanya ikanyokelao, na lihunzi lyakama likahuwilao.

¹² Co civumbe cikasiwukila asi, co vanu voshe vakamihula ngwavo seo mukajo walingile uje mufwitilo wakutoka?”

¹³ Ngecivene, evi vikevyo vyalinakwendeka Shukulu Kalunga wa Akamwa ya Vyoshe ngwendi, “Mukuluvala kwange, njikatuma lihunzi lyakama, na nyonzi ya mungole, na nyonzi ya mamanya mukunyongesa civumbe.

¹⁴ Njilinakuyongola kusiwula civumbe cije civakwitile mufwitilo wakutoka, nakucivujula, nakuseza luvula lwa mamanya mwangoco. Cikawa nakumitsiya muvavoshe. Asinoni vanu voshe vakazivuke yange Kalunga.

¹⁵ “Civumbe na vaje vacikwitile mufwitilo wakutoka vakaziva vukalu vwange. Asinoni njikamileka ngwange cije civumbe cinanyongo, na vaje vacikwitile mufwitilo wakutoka vananyongo,

¹⁶ vakevo vaje vaka-kwimanena vakulaesele Yelusalema ngwavo vyuma vyoshe vinapu vyavivwa, kuma vyuma kuvyapwile vyavivwa embwe!” Mwanendeka Shukulu Kalunga wa Akamwa ya Vyoshe.

Vuka-kwimanena vwakulwisa vaka-kwimanena va vanakazi va makuli

¹⁷ Shukulu Kalunga wendekele ngwendi, “Ololo, muna munu, kenga vanakazi vaje vali akati ka vanu vove vaje vambulula vya vuka-kwimanena. Vaile,

¹⁸ co valeke vije vyalinakwendeka Shukulu Kalunga wa Akamwa ya Vyoshe kuli vakevo ngwove, “ ‘Yeni vanakazi munavindama! Mulinakutungila vanu voshe mikalo ya ku mavoko, co lalo mulinakulingila vanu voshe vinanga vya ku mitwe vya mikalo ya manseno, ngeci vakele na nzili a myonyo ya vakwavo vanu. Mushaka kukala na nzili ya mwonyo na nzili ya kutsa a vanu vange nakuyipangesa ku nganyo yeni vavenya.

¹⁹ Mulinakunjishaula ku mesho a vanu vange, ngeci mushulise mavoko eni na mbale ya maumwa na mikasha yaindondo ya makende. Mukatsii vanu vaje kuvapandele kutsa, nakuyoyesa vaje vanapandele kutsa. Mwambulula makuli kuli vanu vange, co vamitava.’ ”

²⁰ Evi vikevyo vyalinakwendeka Shukulu Kalunga wa Akamwa ya Vyoshe ngwendi, “Njazinda mikalo ya ku mavoko ije mulinakupangesa ngeci mukale na nzili a mwonyo na kutsa. Njikayitongonona nakuyitundisa ku mavoko eni, nakupatula vanu vaje mwakele nakupangesa.

²¹ “Njikatundisa mikalo yeni nakutava vanu vange kupatuka ku mavoko eni a simbu imolika. Asinoni mukazivuke ngeci yange Kalunga.

²² “A makuli eni, mulinakutanganesa vanu vavavwa, vaje kunjashakele ngeci vavulumuke. Mulinakuvindika vaka-vuvi kwecela vuvi vwavo ngeci vayoye.

²³ “Ngecivene, ololo vimona vyeni vya makuli na vuka-kwimanena vweni vwakuungumwisa vunahu. Njilinakupatula vanu vange vatunde ku mavoko eni, muzivuke ngeci yange Kalunga.”