Ezekiyele 12 - Livulu lya Shukulu Kalunga

Muka-kwimanena apwa muka-kuliita

¹ Shukulu Kalunga wendekele kuli yange ngwendi,

² “Muna munu, yove uli akati ka vanu vaka-kutengulukila. Vali na mesho, oloni nacimo cai vamona, vali na matwi, oloni nacimo cai vaziva, omwo vapwa vanu vaka-kutengulukila.

³ “Ololo, muna munu, longekeya citele ngwe mwakalingi munu muka-kuliita, co ya omo kanda vutsiki vucete. Tava ngeci vanu voshe vakumone omo uya ku mutambela weka. Amo vaje vaka-tengulukila vakakumona.

⁴ Simbu kucili mutanya, longekeya citele cove ca ku vunzinda, ngeci vase kukumona, co vatave ngeci vakukengelele omo uya ku cingwezi ngwe munu aya mu vunzinda.

⁵ Simbu vacili nakukengelela, co tuva mbengwa akati ka civumbe ca njuvo yove, co ambata citele cove nakucituwisila mu mbengwa.

⁶ Tava ngeci vakukengelele omo wambata citele a citsili cove nakuya mu lisusulungu oku unalalameka, ngeci kesi umone kuje kuulinakuya. Eci ciwulinga cikapwa kunangula Isalele.”

⁷ Co njalingile vije vyanjilekele Shukulu Kalunga kuvilinga. A litangwa lije vene njalongekeyeye citele ngwe mwakalingi muka-kuliita, co cingwezi cije omo kwakele lisusulungu, njatuvile mbengwa a civumbe na mavoko ange nakutuuka anja. Simbu vanu voshe vanjikengelelele, njaakele citele cange a citsili, co njaile.

⁸ Co alikaki mutondo, Shukulu Kalunga wendekele kuli yange ngwendi,

⁹ “Muna munu, ololo vaje vaIsalele vaka-kutengulukila valinakukwihula vije viwulinakulinga,

¹⁰ valeke vije yange Kalunga wa Akamwa ya Vyoshe, njilinakwendeka kuli vakevo. Majwi awa anapu a muna mwene wa munalume uje alinakushwana mu Yelusalema, na vanu voshe vaje valimo lalo.

¹¹ Valeke ngwove vije viwunalingi vinapu cimweso ca vije vikalingiwa kuli vakevo, vakavafungulula nakuvapwisa vinzinda.

¹² Muna mwene wa munalume uje alinakuvashwana, akambata vitele vyendi a citsili mu lisusulungu, nakutewa nakutuukila mu mbengwa ije ivakamutuvila mu civumbe. Akalalameka, co kakamono kuje kwalinakuya.

¹³ Oloni njikajangumuna linimbwa lyange nakumukwatelao. Asinoni njikamutwala ku nganda ya Mbambilone, akatsila kuje kujeneka kuyimona.

¹⁴ Co njikashandwela mu mitambela yoshe vanu voshe va mu mbanja yendi vaka-kumunangula na vaka-kumunyunga, co vanu vakavashakezeka ngeci vavatsiye.

¹⁵ “Omo njikavashandwela akati ka miyati ya vanu veka na mu mafuti eka, co vakazivuka ngeci kuma yange Kalunga.

¹⁶ Njikatava vavandondo lika kuputumuka mu nzita, na ku njala ya lyangengela, na ku mushongo, ngeci akati ka miyati ije, vakananguke vati muvyafwa vilinga vyavo vya vunyengwe, co vakazivuka ngeci kuma yange Kalunga.”

Cimweso ca muka-kwimanena wakujaja

¹⁷ Shukulu Kalunga wendekele kuli yange ngwendi,

¹⁸ “Muna munu, jaja omo ulya, co lijujukile na lyova omo unwa.

¹⁹ Leka muyati woshe ngwove awa akewo majwi a Shukulu Kalunga wa Akamwa ya Vyoshe kuli vanu va mu Yelusalema, vaje vacili nakuyoya mu lifuti lyavo ngwove vakajaja omo vakalya, nakulijujukila na lyova omo vakanwa. Lifuti lyavo likemuka ngundu, omwo vanu voshe vaje valinakukalamo kuvesi nakukava mashiko.

²⁰ Vinganda vije vinashulu na vanu ololo vakavinyongesa, co lifuti likapwa mambo yangoco. Asinoni vakazivuka ngeci yange Kalunga.”

Visimo vije vivazivuka vavangi na majwi aje kuvazivuka vavangi

²¹ Shukulu Kalunga wendekele kuli yange ngwendi,

²² “Muna munu, omwo vikajo vanu va Isalele valinakwilukila-ilukila cisimo eci ngwavo, ‘Simbu ilinakuya, co vuka-kwimanena vunapu vwangoco!’

²³ Ololo valeke vije yange Kalunga wa Akamwa ya Vyoshe, njilinakwendeka a vyuma evi. Yange njikamanesa cisimo cije. Co kuvakaciilukila-ilukila lalo mu Isalele embwe. Valeke ngwove, ‘Simbu inete, co vuka-kwimanena vukapwa vwa vushunga!’

²⁴ “Akati ka vanu va Isalele, kuwakakala lalo vimona vya makuli, nambe vuka-kwimanena vwakuungumwisa.

²⁵ Yange Kalunga, njikendeka kuli vakevo, co vije vinjikendeka vikalingiwa. Kwishwala kucikakalako lalo embwe. Mu simbu yakuyoya kweni kwoshe, yeni vaka-kutengulukila, njikalinga vije vinjaminangwile ngeci njikavilinga. Yange njinendekamo,” mwalinakwendeka Shukulu Kalunga wa Akamwa ya Vyoshe.

²⁶ Shukulu Kalunga wendekele kuli yange ngwendi,

²⁷ “Muna munu, vaIsalele valinakuyongola ngeci vimona vyove na vuka-kwimanena vwove vinapu vya kulutwe manene.

²⁸ Ngecivene, valeke ngwove yange Kalunga wa Akamwa ya Vyoshe, njilinakwendeka ngwange, ‘Kukukakala lalo kwishwala embwe. Evi vinjinendeka vikalingiwa. Munjinendeka yange Kalunga.’ ”