Ezekiyele 11 - Livulu lya Shukulu Kalunga

Kuhisa Yelusalema

¹ Munzinzime wa Njambi wanjijundwile nakunjitwala ku cikolo ca mu ngangela ca ku Njuvo ya Shukulu Kalunga. Co kuyehi na cikolo njamwene vanalume makumi avali na vatanu, amo na Njazaniya muna Azule na Pelatiya muna Mbenaya, vantwama vavali va muyati.

² Co Njambi wendekele kuli yange ngwendi, “Muna munu, vanalume ava vaka-kutumba matumbe amavi, nakwana kunangula kwakuvi muno mu nganda.

³ Valinakwendeka ngwavo, ‘Kutukatungu vinjuvo ololo. Eyi nganda inapu ngwe ndeo yakuteleka, co yetu tunapu ngwe situ ilimo, oloni ilinakutunyunga ku tuhya.’

⁴ Ngecivene, ololo, muna munu, vambulwile vuka-kwimanena vwakuvahisa.”

⁵ Munzinzime wa Shukulu Kalunga wezile ali yange, co Shukulu Kalunga wanjilekele kwendeka kuli vanu ngwange, “Vanu va Isalele, njazivuka vimulinakwendeka, na matumbe mulinakutumba.

⁶ Munatsii vanu vavangi manene muno mu nganda, co mu vitapalo mwoshe munashulu na mivila ya vanu vaje munatsii.

⁷ “Ngecivene, evi vikevyo vinjendeka kuli yeni, yange Kalunga wa Akamwa ya Vyoshe. Mwa vushunga nganda eyi inapu ndeo yakuteleka, oloni situ inapu veyajo? Situ inapu mivila ya vanu vaje munatsii! Co yeni kumukakala muno embwe! Njikamyumbila anja ya nganda!

⁸ Kuma yeni muziva lyova lya mikwale ndi? Njikanena vanu vaka-mikwale vakumilwise.

⁹ Njikamitundisa mu nganda nakumyana ku mavoko a vangenzi. Njinamisompela kutsa,

¹⁰ co vakamitsiila mu nzita mu lifuti lyeni. Asinoni munu woshe akazivuka ngeci yange njapwa Kalunga.

¹¹ Nganda eyi kuyikaminyungu, ngwe ndeo muyikanyungu situ embwe. Njikaminyanyamesela kwoshe kuje kumukakala mu lifuti lya Isalele.

¹² Co mukazivuka ngweni yange njapwa Kalunga, omwo kumwanyungile mashiko ange, nambe kulinga vije vinjamishikile, oloni munononoka mashiko a miyati ya vaje vanamizengeleka.”

¹³ Omo njambulwile vuka-kwimanena, Pelatiya muna Mbenaya watsile. Co vwasi-vwasi njakulamene asi nakutambeka ngwange, “Embwe, Shukulu Kalunga wa Akamwa ya Vyoshe! Kuma ukanyongesa vanu voshe vaje vanasalao mu Isalele ndi?”

Cikulaeso ca Njambi kuli vinzinda

¹⁴ Shukulu Kalunga wendekele kuli yange ngwendi,

¹⁵ “Muna munu, vanu vali mu Yelusalema valinakwendeka ali yove, na ali vavushoko vwove vaIsalele vaje vali mu vunzinda. Valinakwendeka ngwavo, ‘Vinzinda vali kulyala nakulemesa Shukulu Kalunga. Shukulu Kalunga natwana lifuti lino kupwa vufuko vwetu.’

¹⁶ “Ngecivene, leka vakweni vinzinda vije vinjendeka. Yange njavatumine kukakala akati ka miyati ya kulyala, nakuvashandwela akati ka mafuti eka. Nameme ngoco, a simbu ino vene, njikakala amo navo ku mafuti kuje kuvanai.

¹⁷ “Ngecivene, valeke evi yange Kalunga wa Akamwa ya Vyoshe, njendeka. Njikavakungulula kuvatundisa ku mafuti aje njavashandwelele, co njikavana lifuti lya Isalele.

¹⁸ Omo vakeluka, vakatundisa vyoshe vije vyakujwala na tumponya va vunyengwe vaje vakawana.

¹⁹ Njikavana vimbunge vyaviha na mana amaha. Njikatundisa vimbunge vyavo vyakukola ngwe mamanya, co njikavana vimbunge vyakwononoka.

²⁰ Asinoni vakanyunga mashiko ange, nakwononoka vilongesa vyange vyoshe. Vakapwa vanu vange, nange njikapwa Njambi yavo.

²¹ Oloni njikanyanyamesa lika vanu vaje vazema kulemesa vyakujwala, na tumponya twa vunyengwe. Njikavanyanyamesa omwo vije vivanalingi.” Shukulu Kalunga wa Akamwa ya Vyoshe, nendekamo.

Vumpau vwa Njambi vutunda mu Yelusalema

²² Vikashama vakuyoya vashangumukile kupulula, na mavalo aile amo navo. Co vumpau vwa Njambi ya Isalele vwakele ali vakevo.

²³ Asinoni vumpau vwa Shukulu Kalunga vwatundile a nganda, vwaile a munkinda wa mu ngangela.

²⁴ Mu cimona, Munzinzime wa Njambi wanjijundwile nakunjiilwisila lalo ku vinzinda ku Mbambilone. Asinoni cije cimona njamwene caile,

²⁵ co njalekele vinzinda vyuma vyoshe vije vyanjimwesele Shukulu Kalunga.