Ezekiyele 10 - Livulu lya Shukulu Kalunga

Vumpau vwa Shukulu Kalunga vutunda mu Njuvo ya Shukulu Kalunga

¹ Njakengele ku mushongwa uje wakele akamwa ya mitwe ya vaje vikashama vakuyoya, akamwa yavo akele cuma cimo cakufwa ngwe litanda lije livapangele na limanya lya safile.

² Co Njambi wendekele kuli uje munu wazalele vuzalo vwa nanga ya linyu ngwendi, “Ya mukati ka mavalo mwisi ya vaje vikashama, shulisa mavoko ove na manungu a tuhya. Asinoni shandwela manungu akamwa ya nganda.” Co njamukengelelele omo waile.

³ Vikashama vemanene mu mbwela ya Njuvo ya Shukulu Kalunga, omo wakovelelemo, co lishelwa lyashulisile mukati ka cipango.

⁴ Co vumpau vwa Shukulu Kalunga vwasholokele muli vaje vikashama, co vwezile ku cikolo ca Njuvo ya Shukulu Kalunga. Asinoni lije lishelwa lyashulisile Njuvo ya Shukulu Kalunga, co cije cipango cavyazimine na ceke.

⁵ Co muyoyo wa mambava a vaje vikashama, vauzivile nameme mukati ka cipango. Muyoyo uje walifwile ngwe lijwi lya Njambi Muka-nzili yoshe.

⁶ Omo Shukulu Kalunga washikile uje munalume wazalele nanga ya linyu kwambata tuhya mukati ka mavalo aje akele mwisi ya vikashama, co uje munalume wakovelelemo, nakwimana kuyehi na livalo limo.

⁷ Co cikashama umo waakele livoko lyendi mu tuhya tuje twakele mukati kavo, wanonele manungu amo nakuwaka mu livoko lya uje munalume wazalele nanga ya linyu. Co uje munalume wambatele aje manungu waile.

⁸ Njamwene ngeci cikashama umo na umo wakele na livoko lije lyalifwile ngwe lya munu mwisi ya mambava avo voshe.

⁹ Co njamwene lalo mavalo awana kumukulo wa vaje vikashama umo na umo, co mavalo avyazimine ngwe mamanya a seo yakama.

¹⁰ Oshe afwile mumolika, ku livalo limo na limo kwakele livalo likwavo lyakovelele mukati ka livalo lyakama ku mutambela wa cilyo.

¹¹ Omo vaje vikashama vendele, co vakele nakuya ku mutambela uvashakele kuya, kujeneka kutenguluka. Voshe vakele nakwendela amolika kuya ku mutambela woshe uje uvashakele kuya, kutenguluka.

¹² Mivila yavo, na myongo, na mavoko, na mambava, na mavalo vyakele na mesho.

¹³ Mavalo awa alifwile mumolika na aje njamwene mu cimona cange cakulivanga.

¹⁴ Cikashama umo na umo wakele na vihanga viwana. Cihanga caakulivanga capwile cihanga ca ngombe wa nkomba, camucivali capwile cihanga ca munu, camucitatu capwile cihanga ca ndumba, co camuciwana capwile cihanga ca ngonga.

¹⁵ (Vapwile vikashama vakulifwa ngwe vaje vanjamwene kuyehi na Ndonga ya KeVaLe) Omo vaje vikashama vapululwile mu mukambwila

¹⁶ nakwenda, co mavalo avakavele, oshe aje avajangumwine mambava avo mukupulula, mavalo anga avakavele.

¹⁷ Omo vaje vikashama vemanene, co na mavalo emanene, omo vikashama vapululwile, co mavalo aile amolika navo, omwo akele nakwenda ku cizango ca vikashama.

¹⁸ Asinoni vumpau vwa Shukulu Kalunga vwatundile ku cikolo ca Njuvo ya Shukulu Kalunga, co vwezile ku mutambela uje wa akamwa ya vikashama.

¹⁹ Co vikashama vajangumwine mambava avo nakupulula kutunda asi oku njilinakuvakenga, mavalo aile amolika navo. Co vemanene kasimbu kakandondo ku cikolo ca mu ngangela ca Njuvo ya Shukulu Kalunga.

²⁰ Co njavanongonwene ngeci, vakevo vene vikashama vaje vanjamwene mwisi ya Njambi ya Isalele ku Ndonga ya KeVaLe

²¹ Umo na umo wavo wakele na vihanga viwana, na mambava awana, na livoko lya vunu mwisi ya limbava limo na limo.

²² Co vihanga vyavo vyafwile ngwe vihanga vije vene vinjamwene ku Ndonga ya KeVaLe Co cikashama umo na umo wendele mwakushungama kujeneka kutenguluka.