Esita 8 - Livulu lya Shukulu Kalunga

VaYunda vavaleka kulwa nakulyamena

¹ A litangwa lije vene Mwene Sheleshe waanene Lishano Esita vufuko vwoshe vwa Hamane, citozi ca vaYunda. Co Esita walekele mwene ngeci Molendekai wapwa kavushoko kendi, co tunde aje Molendekai vamutavesele kusholoka ku mesho a mwene.

² Co mwene washomwene kanzeya kendi kaje kakele na cizivukiso, (kaje katundisile kuli Hamane,) wakaanene kuli Molendekai. Co Esita wapwisile Molendekai muka-kunyunga vufuko vwa Hamane.

³ Asinoni Esita wendekele kuli mwene lalo, nakulyumbila ku mendi a mwene nakulila. Ikeye wamulombele kulinga cuma cimo cakuvindika vutumbe vwavuvi vwa Hamane, mutekulwila wa Angange, vuje vwatumbile vwakulwisa vaYunda.

⁴ Co mwene wajundwile mulamu wa ngolinde nakumwinikawo, ngecivene, Esita wakatukile nakwimana nakwendeka ku mesho a mwene ngwendi,

⁵ “Nga cinakuvwasa yove shukulu, nakunjitolilila, co nga cinasholoka kupwa ca vushunga kuli yove, tambeka mutambi wakuvindika mashiko a Hamane ngeci kesi alingiwe, mashiko aje aanene muna Hamendata mutekulu wa Angange akutsiya vaYunda voshe mu vumwene vwa Sheleshe.

⁶ Vatijo njikakala nga vukalu ovu vukawana vanu vange, co na vavushoko vwange vene vavatsiye?”

⁷ Co Mwene Sheleshe wendekele kuli Lishano Esita na Molendekai uje kaYunda ngwendi, “Kenga, njinashukika Hamane a vutumbe vwendi vwakulwisa vaYunda, co njinaana Esita vufuko vwa Hamane.

⁸ Oloni lishiko lije lyatambekele Hamane mu lizina lya mwene nakwakao cizivukiso cakusatesa ca vumwene kulitava kulizimangana embwe. Ngecivene, wasa kusoneka kuli vaYunda vyoshe vije viwushaka, visoneke mu lizina lyange nakwakao cizivukiso cakusatesa ca vumwene.”

⁹ Co evi vyalingiwile a litangwa lyamumakumi avali na atatu ku ngonde yamucitatu, ngonde ya Sivane. Co Molendekai wasanene vaka-kusoneka va mwene ngeci vasoneke mikanda kuli vaYunda, na kuli vanguvulu, na kuli vaka-kutwamenena, na kuli vamyata voshe vakupwa 127 va mu mafuti kutunda ku Indiya nakutwala ku Sundane. Mikanda ije vaisonekele ku lifuti limo na limo mu lilimi lyavo na mu cifwa cavo cakusoneka na kuli vaYunda lalo mu lilimi lyavo na mu cifwa cavo cakusoneka.

¹⁰ Co Molendekai wasonekele mikanda mu lizina lya Mwene Sheleshe, nakuyaka cizivukiso ca vumwene ca kasateso. Co waitumine na vanu vaka-kulonda a tuvalu vakushatuka lumbisi vakutunda ku litanga lya mwene.

¹¹ Mikanda eyi yalumbunwine muje mwene wasele kutava ngeci vaYunda mu nganda na nganda vanapande kulyamena vakevo vavenya. Nga vaYunda vavalwisa vanu va ku muyati woshe-iwoshe na va ku lifuti lyoshe-ilyoshe, ngeci vakevo vaYunda vanapande kuvalwisa nakuvanyongesa amo na vanakazi vavo, na vana vavo nakuvatsiya voshe njwa nakutambula vufuko vwavo.

¹² Lishiko eli linapande kulingiwa na nzili mu vumwene vwa Pelesha mwoshe a litangwa lije vemikile lyakutsiya vaYunda, ku litangwa lyamulikumi na atatu lya Andale, ngonde yamulikumi na vivali.

¹³ Wapwile mutambi wa lishiko, uje uvazivukile kuli munu na munu mu lifuti mwoshe, ngeci vaYunda vase kulivwaesela cimweja kulinga shambandinga vitozi vavo omo litangwa lije liketa.

¹⁴ Omo mwene washikile, vaka-kulonda a tuvalu valondele a tuvalu twa vumwene, co vashatukile lumbisi lwakama. Co lalo lishiko eli walishikile ku mbunga ya vanu voshe va mu Susa, nganda yakama.

¹⁵ Co Molendekai watuukile mu lipela lya vumwene, oku nazala vuzalo vwa vumwene vwa mavala akuzivuluka naa akutoka na cikoveyo cacilaja ca linyu cakuletuka na cilongo ca vumpau ca ngolinde. Co mu vitapalo vya mu Susa vatwile vingunda na mutambi wakuvwaelela.

¹⁶ Co kuli vaYunda kwakele kujolela, nakuvwaelela nakuhwima kwakuhyana.

¹⁷ Co mu vinganda vyoshe na mu lifuti lyoshe, kuje kuvalavele lishiko lya mwene, vaYunda valingile ciwano cakuhwima nakulikela kulya nakuvwaelela. Co mu ngila eyi, vanu vavangi veka vemukile kupwa vaYunda, omwo vakele na lyova ali vakevo.