Esita 7 - Livulu lya Shukulu Kalunga

¹ Ngecivene, mwene na Hamane vezile nakulya amo na Lishano Esita,

² Co mwene wendekele lalo na Esita ku litangwa lyamucivali lya ciwano ca vinyu ngwendi, “Lishano Esita, vikajo ushaka? Njileke, co ukacitambula. Njikakwana nameme litambelo lya vumwene!”

³ Co Lishano Esita wamukumbulwile ngwendi, “Nga njinawana kutetela ku mesho ove shukulu, tava kulomba kwange kwa kulilumbilisa, njishaka ngeci njiyoye na vavushoko vwange lalo vayoye.

⁴ Omwo vavushoko vwange nange vanatulandesa ngeci vatunyongese. Kukwesi cuma cimo cakuhyana nga vatulandesela mu vunzinda, nga njinoloka kuluu kujeneka kukutatokesa ngeci, oloni tuli kuyehi nakutunyongesa, kutuzilula vene zilu!”

⁵ Asinoni Mwene Sheleshe wehwile Lishano Esita ngwendi, “Iyajo owo muka-kwamuka alinga cuma cakufwa ngoco? Ali kulijo owo munalume?”

⁶ Co Esita wamukumbulwile ngwendi, “Muka-n̄ole yetu, na citozi cetu ikeye ou vene munalume wamuvi Hamane!” Co Hamane wazivile lyova kuli mwene na kuli lishano.

⁷ Co mwene wakatukile na vukalu ku ciwano ca vinyu, watundile mu mulili, co watuukile anja kuya mu citungu ca mu lipela. Co Hamane wakatukile walambelelele Lishano Esita ngeci ayoyese mwonyo wendi omwo wamwene ngeci mwene nayongola kumulinga mwamuvi.

⁸ Co walyumbilile asi ku vulili vwa Esita nakumulomba ngeci amuzivileko mema ku mbunge. Omo mwene welukile kutunda mu citungu ca lipela, omo wamwene eci, co watambekele ngwendi, “Ou munalume anjutukile lishano ano vene nakulala nendi ku mesho ange mu lipela lyange vavenya ndi?” Co vwasi-vwasi omo mwene acili nakwendeka, vayunuke vafwikile Hamane ku mesho.

⁹ Asinoni cikola umo, lizina lyendi Halevona, wendekele ngwendi, “Hamane washimbikile viti vyavilaja ku njuvo yendi ngeci ashukikeo Molendekai, uje waamenene mwonyo wove shukulu. Viti evi vinapu mamita makumi avali na mamita avali mu vulaja vwa akamwa!” Co mwene washikile ngwendi, “Shukikeniho Hamane!”

¹⁰ Ngecivene, vashukikile Hamane a viti vije vyashimbikilile Molendekai. Asinoni vukalu vwa mwene vwahwile.