Esita 6 - Livulu lya Shukulu Kalunga

Mwene asingimika Molendekai

¹ Ku vutsiki vuje vene mwene kasele kulala tulo, ngecivene, washikile ngeci vanene livulu lya mashiko a vumwene, co valinenele nakumulavelalyo.

² Co mutambela uje uvamulavelele wakele na vin̄anda vya Molendekai muje mwasholwele vutumbe vwakutsiya mwene, vutumbe vuje vatumbile va Mbingetane, na Teleshe, vayunuke vavali va ku lipela vaje vakele nakunyunga milili ya mwene.

³ Co mwene wehwile ngwendi, “Vatijo twasingimikile Molendekai nakumwana cikandelela a cuma eci?” Vangamba vendi vamukumbulwile ngwavo, “Nacimo cai vamulingilile.”

⁴ Co mwene wehwile ngwendi, “Kuma kukwesi mwata umo wange mu lipela ndi?” Aje vene Hamane te akovela mu cipango ca lipela, ikeye wezile kuli mwene nakumulomba ngeci vashukike Molendekai a viti vije vyashimbikilile cimweja.

⁵ Ngecivene, vangamba va mwene vamukumbulwile ngwavo, “Hamane uno ali kuno, ashaka ngeci akumone.” Co mwene wendekele ngwendi, “Mulekeni akovele.”

⁶ Ngecivene, Hamane wakovelele, co mwene wendekele kuli ikeye ngwendi, “Kwali munu umo injishaka kusingimika manene. Vikajo njikalinga ali munu ou?” Co Hamane waliyongwele ikeye vavenya ngwendi, “Iyajo ou yashaka mwene kusingimika manene? Mwa vushunga yange vene.”

⁷ Ngecivene, Hamane wakumbulwile mwene ngwendi, “Omu mukemwo mwanapande mwene kulinga kuli munu uje yashaka kwana vulemu.

⁸ Vanene vuzalo vwa vumwene vuje vwakazala mwene vavenya, na kavalu uje yakendela mwene vavenya. Co vamuzike cilongo ca vumwene ku mutwe wendi.

⁹ Cooni uwaneo munu umo wa ali vanu vove va vulemu ngeci azike ou munu mu vuzalo ovu vwa vulaja, co amwendese a kavalu mu tapalo ya nganda, na mutambi wa vulemu omo valinakwenda ngwendi, ‘Kengeni mwakalingi mwene na munu uje yashaka kwana vulemu!’ ”

¹⁰ Asinoni mwene walekele Hamane ngwendi, “Zambula ukashake vuzalo na kavalu, co ana kasingimiko aka kuli Molendekai kaYunda. Linga kuli ikeye vyoshe vije viwunendeka. Ukamuwana natumbama ku cikolo ca ku lipela.”

¹¹ Ngecivene, Hamane wakashakele vuzalo na kavalu, co wavuzikile Molendekai. Molendekai walondele a kavalu, co Hamane wamwendesele mu tapalo ya nganda, watambekele kuli vanu oku valinakwenda ngwendi, “Kengeni mwakalingi mwene na munu uje yashaka kwana vulemu.”

¹² Asinoni Molendekai welukile lalo ku cikolo ca lipela oloni Hamane wazambwilile ku njuvo yendi, wavandesele cihanga cendi omwo shwamwa.

¹³ Co ikeye walekele munakazi wendi na vasamba vendi voshe vyuma vyoshe vije vyalingiwile kuli ikeye. Asinoni munakazi wendi na vaje vasamba vendi vaka-mana vamulekele ngwavo, “Molendekai nashangumuka kukuhyana ku moko. Ikeye wapwa kaYunda, co kuwasa kumuhyana. Mwa vushunga vene akakufungulula.”

Hamane vamutsiya

¹⁴ Simbu vacisimutwiya, vayunuke va ku lipela vezilile Hamane nakumutwala vwasi ku ciwano cakulya ca Esita.