Esita 5 - Livulu lya Shukulu Kalunga

Esita alanya mwene na Hamane ku ciwano cakulya

¹ A litangwa lyamucitatu lyakulikela kulya, Esita wazalele vuzalo vwendi vwa vushano, co waile nakwimana mu cipango ca mukati ka lipela, kushungama ku mulili wa litanda. Mwene wakele mukati, watumbamene a litanda lya vumwene, kukengesa ku cikolo.

² Omo mwene wamwene Lishano Esita nemana anja, co camuvwasele manene, co wajundwile mulamu wendi wa ngolinde nakuwinika kuli Esita. Asinoni Esita washwenyeleko wakwatele ku shongo yawo.

³ Co mwene wehwile ngwendi, “Lishano Esita, vika ushaka? Njileke vikajo ushaka kulomba, co ukavitambula, nameme litambelo lya vumwene vwange.”

⁴ Co Esita wamukumbulwile ngwendi, “Nga camuvwasa shukulu, njishaka yove na Hamane kupwa vangenzi vange ku vutsiki ku ciwano cakulya eci njilinakumivwaesela.”

⁵ Co mwene washikile ngeci Hamane aye vwasi ngeci vakapwe vangenzi va Esita. Ngecivene, mwene na Hamane vaile ku ciwano cakulya kuli Esita.

⁶ Omo vakele nakunwa vinyu mwene wehwile Esita ngwendi, “Njileke ciwushaka, co ukacitambula. Njitava kulomba kwove, nameme nga ulomba litambelo lya vumwene vwange.”

⁷ Co Esita wamukumbulwile ngwendi,

⁸ “Nga yove shukulu uli na ngozi yakutava kulomba kwange, njishaka yove na Hamane imene lalo mukapwe vangenzi vange ku ciwano cikwavo cakulya cije njikamivwaesela. Co a simbu ije vene njikakuleka vije vinjishaka.”

Vutumbe vwa Hamane vwakutsiya Molendekai

⁹ Omo Hamane watundile ku ciwano cakulya wavwaelelele nakujolela mu mbunge yendi. Oloni omo wamwene Molendekai ku cikolo ca lipela, omo Molendekai kakatukile nambe kumwesa cimweso ca kasingimiko omo Hamane wakele nakwita, co Hamane waluvalele manene na Molendekai.

¹⁰ Oloni wolokele kuluu, co waile ku njuvo yendi. Asinoni Hamane walanyele vasamba vendi ku njuvo yendi nakulomba munakazi wendi Zeleshe ngeci akale amo navo.

¹¹ Co walishashele kuli vakevo a vufuko vwakele navwo, na vana vangai wakele navo, na ngila ije vamujundwile nayo kuli mwene kupwa wakama, na vukama vuje vwakele navwo kutuvakana vamyata vakwavo.

¹² Co Hamane watwaleleo ngwendi, “Lishano Esita katavele munu weka wai kuya ku ciwano cakulya kuvanga yange lika na mwene, co vanatulanya lalo na imene twilukileko.

¹³ Oloni kuli yange evi vyoshe kuvyesi na seo omo njimona uje kaYunda Molendekai natumbama ku cikolo ca lipela.”

¹⁴ Ngecivene, munakazi wendi na vasamba vendi voshe vatumbile vutumbe ngwavo, “Omwo vikajo kuushimbika viti vya vilaja vyakupwa mamita makumi avali na mamita avali? Co imene ukalombe mwene ngeci vakashukikeo Molendekai, asinoni ukaya ku ciwano cakulya nakuvwaelela.” Co Hamane wayongwele ngeci cije capwile ciyongola cacivwa, ngecivene, washimbikile viti.