Esita 3 - Livulu lya Shukulu Kalunga

Hamane ayongola kunyongesa vaYunda

¹ Munima yevi, Mwene Sheleshe waanene citumbamo cakama kuli munalume umo lizina lyendi Hamane, kupwa mukulunu wakwata kuli mwene. Hamane wapwile muna Hamendata, mutekulwila wa Angange.

² Co mwene washikile vamyata voshe kusingimika Hamane kumutsikamena a mavuli nakumulemesa. Co voshe valingile ngacije, kuvanga lika Molendekai, ikeye wavyanene kulingamo.

³ Co vakwavo vamyata vaka-kupangela mwene vamwihwile omwo vikajo kononokele lishiko lya mwene,

⁴ co vendekele nendi a litangwa na litangwa, oloni kavatolililile, co wavalekele ngwendi, “Yange nji kaYunda, kunjasa kutsikamena Hamane embwe.” Ngecivene, valekele Hamane cuma eci, nakumona nga Hamane asa kutava futisi ya Molendekai.

⁵ Hamane waluvalele manene omo wamwene ngeci Molendekai kamutsikamenene a mavuli nakumulemesa,

⁶ omo Hamane wanangukile ngeci Molendekai wapwile kaYunda, co wayongwele kulinga cuma cakama kutuvakana kuhisa Molendekai endi lika. Co watumbile vutumbe vwakutsiya kaYunda woshe mu vumwene vwa Pelesha mwoshe.

⁷ Mu mwaka wamulikumi na ivali wakushwana kwa Mwene Sheleshe, ku ngonde yakulivanga, ngonde ya Nisane, Hamane washikile ngeci vate n̄ela, ije vatumbwile ngwavo “pulime” mukuwana litangwa lyalivwa na ngonde yakulinga vutumbe vwendi. Co a litangwa lyamucitatu ku ngonde yamulikumi na vivali, ngonde ya Andale, ikeyo ivayongwele.

⁸ Ngecivene, Hamane walekele mwene ngwendi, “Kuli vanu vamo vanashandokela mu vumwene vwove vwoshe, co vali mu mafuti ove oshe. Co mashiko avo analyangunuka na mashiko a vanu voshe, co lalo kuvesi nakunyunga lishiko lyove mwene embwe, ngecivene, shukulu kumwapandele kuvatava ngoco embwe.

⁹ Nga cakuvwasa shukulu, imika lishiko ngeci vavanyongese. Nga utava, njilikumiiya ngeci njikaka makilo akupwa 340,000 a siliva mu mbango ya vumwene, ngeci vavipangese mu vumwene.”

¹⁰ Co mwene washomwene kanzeya ku mulavo wendi. Co wakaanene kuli citozi ca vaYunda Hamane muna Hamendata mutekulwila wa Angange.

¹¹ Co mwene wamulekele ngwendi, “Vanu na vimbongo vyavo vinapu vyove, co linga navo mwoshe muushakela.”

¹² Ngecivene, a litangwa lyamulikumi na atatu ku ngonde yakulivanga, Hamane wasanene vaka-kusoneka va mwene nakuvaleka lishiko ngeci valinungulule mu miyati yoshe na cifwa cakusoneka cije vapangesele mu vumwene, co valitume lalo kuli vaka-kushwana voshe, na vanguvulu, na vamyata. Lishiko eli valisonekele mu lizina lya Mwene Sheleshe nakwakao cimweso ca kanzeya kendi.

¹³ Co vatumine vanu kutwala mikanda eyi ku mafuti oshe a vumwene. Co mwakele mashiko avasonekele ngwavo, “A litangwa lyamulikumi na atatu, litangwa lya Andale, ngonde yamulikumi na vivali, vaYunda voshe, vakwenje na vakulunu, vanakazi na vanike, vanapande kuvatsiya kujeneka kuvazivilako mema ku mbunge, nakupukula vufuko vwavo. Eci cikalingiwa a litangwa limo.”

¹⁴ Co mikanda eyi vaitumine ku mafuti oshe kupwa lishiko, ngeci munu na munu alivwaesele cimweja a litangwa lije omo liketa.

¹⁵ Co miluwa vashatukile lumbisi kutwala muzimbu mu mafuti oshe ngwe muje mwashikile mwene. Co vambulwile lije lishiko na mu nganda ya Susa. Co mwene na Hamane vatumbamene amo nakunwa, oloni vanu vaje vakele mu nganda ya Susa vakele na kuuya-uya.