Esita 1 - Livulu lya Shukulu Kalunga

Lishano Vashiti ayengula Mwene Sheleshe

¹ Eci calingiwile a matangwa a Sheleshe, uje vene washwanene mafuti akupwa 127, kutunda ku Indiya nakweta ku Sundane.

² A matangwa aje Sheleshe wakele a litanda lyendi lya vumwene mu Pelesha mu Susa nganda yakama.

³ Mu mwaka wamucitatu wakushwana kwendi, Sheleshe walingile ciwano ca vamyata vendi voshe, amolika na vakulunu va vipangi. Mashwalale va Pelesha na Mendiya amo na vanguvulu na vaka-kufuka va mu mafuti aje, voshe vakele ku ciwano cije.

⁴ Co a vingonde vyoshe vije vitanu na imo, Sheleshe wavamwesele vufuko na vuvwa vwa mu lipela lya vumwene, na vukama vwa vumwene vwendi.

⁵ Munima yevi, mwene walingile ciwano ca vyakulya ca vanu voshe va mu nganda ya Susa, vaka-kufuka amolika na tuutu. Capwile ciwano ca matangwa atanu na avali, vacilingilile mu citungu ca ku lipela.

⁶ Co lije lipela valicakeyeye na mavamba a vwanda vwakuzivuluka, na vwanda vwakutoka, vwakukuta na mikole yakuvenguluka na tunzeya twa siliva ku mitwe ya vimanda. Myela ya ngolinde na siliva ije yakele mu lipela, vaicakeyeye na mamanya akutoka naa akuvenga akuliseza-seza na makwalale akama akuvyazima na takwoise yakuzivuluka.

⁷ Vakele nakwana vyakunwa mu vinganja vya ngolinde, kukwakele vivala vivali vyakulifwa mumo, co mwene wakele na cizango cakwana vinyu vya vumwene.

⁸ Co vyakunwa kuvyakele naa avihwila, omwo mwene waanene mashiko kuli vangamba vendi va ku lipela ngeci munu na munu nasa kunwa ngwe mwanashakela vavenya.

⁹ A simbu ije vene mu lipela, Lishano Vashiti walingilile vanakazi ciwano ca vyakulya.

¹⁰ Co a litangwa lyamucitanu na avali lya ciwano cendi, omo mwene wakele nakunwa nakuvwaelela, wasanene Mehumane na Mbizeta na Halevona na Mbingeta na Ambangeta na Zetale na Kalekase vayunuke vatanu na vavali vaje vapangele kuli mwene ngeci

¹¹ vanene Lishano Vashiti, oku nazala cilongo cendi ca vumwene. Lishano Vashiti wapwile wamuvwa manene, co mwene washakele kumwesa vuvwa vwendi kuli vamyata vendi na kuli vangenzi vendi voshe vaje vakungulukile kuje.

¹² Oloni omo vangamba valekele Lishano Vashiti kushika kwa mwene, co lishano wavyanene kuyako. Eci caluvalesele manene mwene.

¹³ Co mwene wehwile vinguli vya mana kuli vaje vazivukile mashiko nakusompa, co wasanene vaka-kunangula vendi, vaje vazivukile mwakulingila.

¹⁴ Vaje vamukwasele manene kumunangula vapwile, Kaleshena na Shetale na Andemata na Tashishi na Melese na Malesena na Memukane vamyata vatanu na vavali va mu Pelesha na Mendiya vaje vakele na vitumbamo vyakama mu vumwene.

¹⁵ Co wendekele kuli ava vanalume ngwendi, “Yange Mwene Sheleshe, njatumine vangamba vange kuli Lishano Vashiti ngeci aije kuli yange, oloni wavyanene kwija! Tulinga vati nendi ngwe muwanendeka mashiko?”

¹⁶ Co Memukane wakumbulwile kuli mwene na kuli vamyata vendi ngwendi, “Lishano Vashiti kashawile mwene lika embwe, oloni nashaula na vamyata vendi lalo, na vanalume voshe vali mu lifuti lya vumwene!

¹⁷ Omwo cuma eci canalingi Lishano Vashiti vakaciziva vanakazi voshe, co voshe vakayengula vanalume vavo. Co vakendeka ngwavo, ‘Mwene Sheleshe washikile Lishano Vashiti ngeci aye kuli ikeye, oloni wavyanene.’

¹⁸ Omo vanakazi va vamyata va vumwene vwa Pelesha na Mendiya vakaziva vyakujeneka kwononoka kwa Lishano, co vakalekako vanalume vavo mu vwasi-vwasi. Co kwoshe-ikwoshe vanakazi kuvakasingimika vanalume vavo, co vanalume vakaluvala na vanakazi vavo.

¹⁹ Nga eci civwaelelesa shukulu, shika lishiko lya vumwene ngeci tunde ano Vashiti kesi akasholoke lalo ku mesho a mwene. Shika ngeci lishiko eli valisoneke mu mashiko a Pelesha na Mendiya, ngeci kesi valitengulule. Co mwene apwise weka lishano kutuvakana Vashiti.

²⁰ Omo lishiko lyove vakaliziva mu vumwene vwove vwoshe ovu vwakama, co munakazi woshe akasingimika munalume wendi na kasingimiko kakavwa, nambe munalume wendi wapwa muka-kufuka nambe wapwa kautu.”

²¹ Ngecivene, mwene na vamyata vendi vatavele ciyongola eci, co mwene walingile vije vyamulekele Memukane.

²² Co watumine mikanda mu lilimi na visoneka vya lifuti na lifuti lyoshe lya vumwene vwendi vwoshe, nakwendeka ngeci munalume woshe napande kupwa mutwe wa njuvo yendi nakushika na nzili yoshe.