Efeso 6 - Livulu lya Shukulu Kalunga

Vana na visemi

¹ Eni vanike, ononokeni kuli visemi veni muli Mwene, omwo eci cikeco cuma cacivwa kucilinga.

² “Singimikeni vaishweni na vanyokweni” eli likelyo lishiko lyakulivanga livawezelelako ku cikulaeso ngwavo,

³ “Ngeci vyoshe vikapwe vyavivwa kuli yeni, co mukayoya simbu yakama mu lifuti.”

⁴ Eni visemi, kesi mushangumune vana veni, oloni valeleni mu kalemeso na mu vilongesa vya vuka-Yesu.

Vindungo na vashukulu vavo

⁵ Eni vindungo, ononokeni kuli vashukulu veni va ano asi na lyova nakujaja, co lingeni eci na mbunge ya lyovwa-ovwa, ngwe vene mulinakupangela Kilistu.

⁶ Lingeni eci kesi omo valinakumikengelela, omwo mushaka kuvwaesa ku vimbunge vyavo embwe, oloni na vimbunge vyeni vyoshe lingeni vije vyashaka Njambi, ngwe vindungo va Kilistu.

⁷ Lingeni vipangi vyeni vya vundungo nakujolela, ngwe mulinakupangela Mwene, kesi ngwe vanu.

⁸ Anukeni ngeci Mwene akafweta munu na munu, nambe ndungo nambe wakupatuka, kupwisa ku vipangi vyendi vyalinakulinga.

⁹ Eni vashukulu vavo, lingeni lalo cifwa cimo kuli vindungo veni, co kesi muvashungwiye. Anukeni ngweni yeni na vindungo veni muvavoshe mwakundama kuli Shukulu umolika ali mwilu, uje asompa munu na munu mu cifwa cimolika.

Vitwa vyoshe vya Njambi

¹⁰ Akukotoka, koleseniko muli Mwene na mu nzili ya vukama vwendi.

¹¹ Zaleni vitwa vyoshe vije vyanamyana Njambi, ngeci mwase kwimana nakulwisa matumbe amavi a Liyavola.

¹² Omwo kutwesi nakulwa na vanu embwe, oloni tulinakulwa na nzili yavivi vya minzinzime ya a mukambwila na vaka-kushwana na vaka-moko ya kushika na ava vaka-kushwana na nzili mu lisusulungu eli lya myaka ino iliko.

¹³ Ngecivene, zaleni vitwa vya Njambi ololo! Co omo litangwa lyalivi liketa, mukase kwimana nakulwisa uje citozi akamilwisa, co omo munalu nakweta ku shongo, mukasa kwimana mbe.

¹⁴ Ngecivene, livwaeseleni cimweja, na vushunga munalizitikavwo ngwe mwiva mu vimbunda vyeni na kulongwa ngwe ntelo a vinulo vyeni,

¹⁵ co ngwe vin̄aku ku myanja yeni, mukulivwaesela cimweja kwambulula Vin̄anda Vyavivwa vya kwoloka.

¹⁶ Simbu yoshe ambateni kukulaela ngwe ntelo, omwo na ikeyo mwase kuzima mikili ya tuhya ya Uje Muka-vuvi.

¹⁷ Co zaleni tepa yakwovoka, na lijwi lya Njambi ngwe moko ya mukwale ije yanamyana Munzinzime.

¹⁸ Lingeni vyoshe evi mukulombela, lombeni Njambi ngeci amikwase. Lombeleni simbu yoshe ngwe omo Munzinzime amitwamenena. Omwo a cuma eci toneni kesi mujuke, lombeleni visimbu vyoshe ali vanu va Njambi.

¹⁹ Co nange lalo njilombeleleniko, ngeci Njambi anjane lijwi omo njalivwaesela kwambulula, ngeci njambulule nakusimpa nakusholola cisin̄iko ca muzimbu wauvwa.

²⁰ Omwo a lizina lya lijwi eli yange njinapu nji muka-kwimanenako, nambe ololo njili mu kamenga. Lombeleni ngeci njisimpe mukwambulula muzimbu wauvwa ngwe munjinapande.

Viindu vyakumanesela

²¹ Ngecivene, Taikikase, ndolome yetu na ngamba yetu itwazema mu vipangi vya Mwene, akamileka muzimbu woshe wa ali yange, ngeci muzivuke vati njinendukila.

²² Eci cikeco cuma njamutumina kuli yeni, ngeci akumileke vati yetu voshe mutunendukila, co akatakamesa lalo vimbunge vyeni.

²³ Njambi Tatetu na Mwene Yesu Kilistu vaane kuli vaka-Yesu voshe kwoloka na cizemo mukukulaela.

²⁴ Kutetela kwa Njambi kukale na voshe vaje vazema Mwene yetu Yesu Kilistu na cizemo ca ku myaka yoshe.