Efeso 4 - Livulu lya Shukulu Kalunga

Kulitombola kwa mbunga

¹ Ngecivene, njilinakumisindiya, yange njinapu cinzinda omwo kupangela Mwene ngwange, yoyeleni a mwonyo uje unaliseteka na seteko ije yanamyakela Njambi omo wamisanene.

² Simbu yoshe pweni vaka-kulilumbilisa, vaka-kulikeesa na vaka-lukakateya. Shololeni cizemo ceni mukuliyandela umo na mukwavo.

³ Nyungeni mwamuvwa manene kulitombola kwa mbunga ije yanamyana Munzinzime a kwoloka cije cinamikutila amolika muvavoshe.

⁴ Kuli muvila umo na Munzinzime umo, ngwe ngeci mukuli cinyangavili cimo kuje Njambi namisanena.

⁵ Kuli Mwene umo, kukulaela kumo, kumbwitika kumo,

⁶ kuli Njambi umo ikeye wapwa Ishe ya vanu voshe, ikeye Mwene ya vyoshe, wapanga mu vyoshe, co lalo wakala mu vyoshe.

⁷ Munu na munu woshe natambula vwana ngwe mu seteko ya vije vyanatwana Kilistu.

⁸ Ngwe muje muvyendeka visoneka ngwavyo, “Omo ikeye waile mwilu, wambatele vinzinda vavangi amo nendi, co waanene vwana kuli vanu.”

⁹ Co ololo “ikeye waile mwilu” cinalumbunuka vikajo? Cinalumbunuka ngeci akulivanga washelumukile mwisi ya asi mwa kulova manene.

¹⁰ Ngecivene, uje wezile ano asi ikeye umolika lalo uje waile mwilu, akamwa ya mwilu lya melu, ngeci ashulise vyuma vyoshe mu kaye mwoshe.

¹¹ Ou ikeye uje “waanene vwana kuli vanu”. Wemikile vamo kupwa miluwa, vakwavo kupwa vaka-kwimanena, vakwavo kupwa vaka-kwambulula, vakwavo kupwa tunyungi na valongisi.

¹² Walingile eci mukuvwaesela vanu va Njambi vipangi vya vuka-Yesu, mukutunga muvila wa Kilistu.

¹³ Ngecivene, yetu voshe tukapwa vamolika mukukulaela kumolika na mukuzivuka kwetu kwa Muna Njambi, tukapwa vanu vakukola nakweta ku seteko ije ya ciseteko cakushula ca Kilistu.

¹⁴ Co kutukapu lalo vanike, vaje vauungumuka na mankimba nakupekumuka noku-noku na lihunzi lya vilongesa vya vanu vaka-makuli, vaje valinakutwamenena vakwavo mu kusevuka na linyanyamena lije valinga.

¹⁵ Oloni akwendeka vushunga mu munzinzime wa cizemo, tunapande kukola mu vingila vyoshe muli Kilistu, uje napu mutwe.

¹⁶ Ali ikeye vilyo vyoshe vya muvila vilinungakana amolika, co muvila woshe vanautungu amo mu manunga oshe ngwe kuseteko yawo. Ngecivene, omo cilyo cimo na cimo cipanga ngwe ku vipangi vyaco, co muvila woshe wamutunu ulinakukola, co ulinakulitunga ukewo vavenya mu cizemo.

Mwonyo wauha muli Kilistu

¹⁷ Ngecivene, mu lizina lya Mwene, njiminangula ngwange, kesi muyoye ngwe vaje vaka-kujeneka kukulaela, vaje viyongola vyavo vyapwa vyangoco,

¹⁸ co mana avo ali mu lisusulungu. Vakevo kuvesi na mutambela mu mwonyo uje wakana Njambi, omwo vakevo vali ku nzimba na mukukaluwa kwa vimbunge vyavo.

¹⁹ Vakevo voshe vanakundwila na shwamwa yai, vanalyecelela nakulyumbila mu vuvi nakulinga vyoshe vya mazilo kujeneka kulikela.

²⁰ Eci kesi cikeco mwalilongesele ali Kilistu!

²¹ Mwa vushunga yeni mwaziva laja vya ali ikeye, co akupwa vaka-kumukava vamilongesele vushunga vuje vuli muli Yesu.

²² Ngecivene, umbileni kuti vunu vweni vwalaja, vuje vwamilingisile ngeci muyoye ngwe muje mwayoyele, vunu vwalaja vuje vuya nakunyonga na mashungu avwo a makuli.

²³ Vimbunge vyeni na mana eni vinapande kupwa vyaviha,

²⁴ co munapande kuzala vunu vwavuhwa, vuje vuvanatanga mu cifwa ca Njambi, co vunasholoka vukewo vavenya mu mwonyo wa vushunga uje wauvwa nakujela.

²⁵ Ngecivene, kesi mwendeke makuli lalo! Munu na munu napande kwendeka vushunga kuli mukwavo muka-kukulaela, omwo yetu voshe tunapu vilyo vimolika mu muvila wa Kilistu.

²⁶ Nga muluvala, kesi mutave kuluvala kweni kumitwale ku vuvi, co kesi mutokese litangwa mukuluvala lika embwe.

²⁷ Kesi mutave kwana Liyavola mwela.

²⁸ Munu uje wevile kapandele lalo kwiva, napande kushangumuka kupanga, ngeci ayoye mwamuvwa ikeye vavenya, co ase kukwasa lalo tuutu.

²⁹ Kesi mupangese majwi amavi omo mwendeka, oloni pangeseni majwi amavwa akukwasa, aje asa kutunga nakumyana vije vimunajeneka, ngeci vyoshe mwendeka vikapwe vyavivwa kuli voshe vaje vamitolilila.

³⁰ Co kesi muviililise Munzinzime Wakujela wa Njambi, omwo Munzinzime Wakujela wapwa cimweso ca Njambi ca vundambo ali yeni, napu cishimbikiya ngeci litangwa likaija omo Njambi akamipatula.

³¹ Tundiseni kulula kwoshe na mashungu na vukalu. Kesi kukale lalo kulijokota nambe kulishaula, kesi kukale lalo matumbe amavi akati keni.

³² Oloni pweni vaka-ngozi na vaka-mbunge ya lyovwa-ovwa kuli umo na mukwavo, co lisambeseni umo na mukwavo, ngwe mwanamisambesa Njambi muli Kilistu.