Efeso 3 - Livulu lya Shukulu Kalunga

Vipangi vya Paulu kuli vaje kesi vaYunda

¹ Omwo a cuma eci, yange Paulu, cinzinda ca Yesu Kilistu njilomba kuli Njambi omwo ali yeni kesi vaYunda.

² Mwa vushunga vene yeni mwaziva ngeci Njambi mu kutetela kwendi nanjana vipangi evi ngeci njimikwase.

³ Njambi wajombolwele vutumbe vwendi vwakushweka nakuvusholola kuli yange. (Njasonekele vukaleo vwavundondo a cuma eci,

⁴ co nga mukalava vije vinjasoneka mwasa kulilongesa nakuzivuka visin̄iko vya Kilistu.)

⁵ Mu simbu ya kunima vanu kuvavalekele visin̄iko evi, oloni Njambi navisholola ololo ali Munzinzime wendi kuli miluwa vendi vakujela na kuli vaka-kwimanena vendi.

⁶ Cisin̄iko cije cinapu eci, ngeci a lijwi lya muzimbu wauvwa vaje kesi vaYunda ololo vali na mutambela amo na vaYunda mu vivezikiso vya Njambi, vakevo vanapu vilyo vya muvila umo nakulipangela mu cikulaeso ca Njambi cije calingile ali Kilistu Yesu.

⁷ Vanjipwisile ngamba ya muzimbu wauvwa a vwana vwa Njambi vwakama, vuje vwanjanene a vipangi vya nzili yendi.

⁸ Yange njapwa wamundondo kutuvakana voshe vanu va Njambi, oloni Njambi wanjanene vwana ovu vwakutwala Vin̄anda Vyavivwa vya vufuko vuje vwa myaka yoshe vwa Kilistu kuli vaje kesi vaYunda,

⁹ nakumwesa vanu voshe muje vutumbe vwa cisin̄iko ca Njambi vukalingiwa. Njambi uje Ishamatanga wa vyuma vyoshe, washwekele cisin̄iko cendi ku myaka yoshe ya kunima,

¹⁰ ngeci mu simbu ino iliko, ya cikungulukilo, tungelo vaka-kuswana na vaka-nzili mu lifuti lya mwilu ngeci valilongese muwafwa mana a Njambi na muje mwalitepesela.

¹¹ Njambi walingile eci ngwe ku vutumbe vwendi vwa myaka yoshe, vuje vwalingile muli Kilistu Yesu Mwene yetu.

¹² Akukala muli ikeye na akukulaela kwetu muli ikeye, twasa kuya ku mesho a Njambi nakusimpa kwoshe.

¹³ Ngecivene, njimilomba ngwange kesi muzeye a n̄avava yange njilinakuwana omwo ali yeni, vyoshe evi vinapu vije vimuwanao.

Cizemo ca Kilistu

¹⁴ Omwo a cuma eci, njilinakutsikama a mavuli ange ku mesho a Tate,

¹⁵ kuli ikeye naanga yoshe ili mwilu na ano asi ilinakutumbula lizina lya vushunga.

¹⁶ Njilomba kuli Njambi a vufuko vwa vumpau vwendi ngeci amyane nzili ali Munzinzime wendi ngeci mukale na nzili mukati ka mivila yeni,

¹⁷ co njilomba ngwange Kilistu akale mu vimbunge vyeni akukulaela. Njilomba ngwange mushalave mizi na luvula lweni mu cizemo,

¹⁸ ngeci ali yeni, amo lika na vanu va Njambi voshe, mukakale na nzili yakuzivuka mwamuvwa vukama na vulaja vwa asi na kutunuka na kulova mu mucinapu cizemo ca Kilistu.

¹⁹ Eyo, munapande kuzivuka cizemo cendi, nambe kumwasa kucizivuka mwamuvwa, co mushulilile na cifwa ca Njambi.

²⁰ Kuli ikeye a nzili ije ilinakupanga muli yetu asa kupanga manene kutuvakana vije twasa kumulomba, nambe kutuvakana vije vitwasa kuyongola,

²¹ kuli Njambi kukale vumpau mu cikungulukilo na muli Kilistu Yesu ku simbu yoshe, ku myaka yoshe! Ewa.