Efeso 2 - Livulu lya Shukulu Kalunga

Kutunda ku kutsa kukovela ku mwonyo

¹ Laja mwapwile mu vatsi ku munzinzime omwo kumwononokele, co mwalingile vuvi.

² A simbu ije mwakavangeyeye vingila vya vuvi vwa ano a kaye, mwononokele ku mwene wa vushwana vwa mu mukambwila, ku munzinzime ou ololo alinakutwamenena vanu vaje kuvesi nakwononoka Njambi.

³ Mwa vushunga vene tuvavoshe twafwile ngwe vakevo, co twayoyele vene ngwe ku cisemwa ca mashungu etu a vunu, twalingile vije vyoshe mivila yetu na mana etu akele nakuvilinga. Ku cisemwa cetu ca vunu ngwe vanu voshe, vatwimikilile tuyande ku vukalu vwa Njambi.

⁴ Oloni Njambi wapwa muka-mema ku mbunge, co na cizemo cendi kuli yetu capwa cakama manene

⁵ ngeci nambe omo twatsile ku munzinzime akujeneka kwononoka kwetu, watuyoyesele amo na Kilistu. Akutetela kwa Njambi ngeci munovoka.

⁶ Akukala kwetu muli Kilistu Yesu watusangwile amo nendi ngeci tukashwane amo nendi mu lifuti lya mwilu.

⁷ Walingile evi kupwa cimweso ku visimbu vyoshe vije vikaijako akumwesa vukama vwa kutetela kwendi kuje kutwasa kuseteka mu cizemo cije catumwesele muli Kilistu Yesu.

⁸ Omwo a kutetela munovoka akukulaela. Eci kesi ngwe a vilinga vyeni embwe, oloni cinapu vwana vwa Njambi,

⁹ kesi a vilinga, kutewa munu alishashe.

¹⁰ Njambi natupwisa muje mutunafu, co akukala kwetu muli Kilistu Yesu watutangelele mwonyo wa vipangi vyavivwa, vije watuvwaeselelevyo laja ngeci tuvilinge.

Tunapu tu umo muli Kilistu

¹¹ Yeni kesi mu vaYunda ku cisemwa, vaje vatumbula ngwavo “vaka-kujeneka kutuuka” ngwe ku futisi ya vaYunda, vaje valitumbula ngwavo vaka-kutuuka (eci cilinakwinika vanu vivalinakulinga ku mivila yavo), anukeni vati mwafwile mu simbu yalaja.

¹² A simbu ije mwangunukile kuli Kilistu. Mwapwile mu vangenzi kumwakundamene ku vanu va Njambi vakwangula. Kumwakele na mutambela mu mazivasano, aje emanene a vikulaeso vya Njambi kuli vanu vendi, co yeni mwayoyele ano a kaye kujeneka cinyangavili nakujeneka Njambi.

¹³ Oloni ololo muli Kilistu Yesu, yeni mwakele kulyala, vanaminena kuyehi a maninga a Kilistu.

¹⁴ Omwo Kilistu natunenela kwoloka akupwisa vaYunda na vaje kesi vaYunda kupwa munu umolika. Na muvila wendi vavenya, wavujwile civumbe cije cavangunwine nakuvapwisa vitozi.

¹⁵ Wamanesele lishiko lya vaYunda amo nakushika kwalyo na futisi yalyo, ngeci muli ikeye a miyati ivali atange muyati umolika, ngeci kukale kwoloka.

¹⁶ A kutsa kwendi a cilindakano Kilistu wanyongesele cizindo, a cilindakano napandakana miyati ivali nakuyipwisa muvila umolika nakuvanena kuli Njambi.

¹⁷ Ngecivene, Kilistu wezile nakwambulula Vin̄anda Vyavivwa vya kwoloka kuli voshe, kuli yeni kesi vaYunda, vaje vakele kulyala na Njambi na kuli vaYunda vaje vakele muyehi nendi.

¹⁸ Ali Kilistu yetu voshe, vaYunda na vaje kesi vaYunda, tunasa kwija mu Munzinzime umolika ku mesho a Tate.

¹⁹ Ngecivene, yeni kesi vaYunda kumwapwile lalo mu vangenzi nambe vaka-kwija embwe, yeni ololo munapu mu vandambo amo na vanu va Njambi, yeni ololo munapu naanga ya Njambi.

²⁰ Neni lalo vanamitungu a luvula luje luvajalele miluwa na vaka-kwimanena, limanya lije lya mu mbango likelyo Kilistu Yesu vavenya.

²¹ Muli ikeye njuvo yoshe vanainungasana mwamuvwa, ilinakukola nakuyipwisa njuvo yakujela ya Shukulu Kalunga yakukundika kuli Mwene.

²² Muli ikeye neni lalo valinakumitunga mumo na vakweni veka ngeci mupwe njuvo ya Njambi ali Munzinzime wendi.