Amose 9 - Livulu lya Shukulu Kalunga

Kusompa kwa Shukulu Kalunga

¹ Njamwene Shukulu Kalunga nemana kumukulo wa mutula. Co washikile lishiko ngwendi, “Pupeni manene mitwe ya vimanda vya Njuvo yange ngeci vipamba vijaje. Vipokozoleni ngeci viwile a mitwe ya vanu. Co njikatsiila mu nzita vanu vaje vakasalao. Naumo wai akasalao, naumo wai akaputumuka.

² Nameme nga vakainda vingila vyavo kwisi ya livu mu vukalo vwa vatsi, anga njikavawana. Nameme nga vakalonda mwilu, anga njikavashulwisamo nakuvanena ano asi.

³ Nga vakavanda akamwa ya Munkinda wa Kalemele, njikavashakezeka nakuvatundisao. Nambe nga vanjivandela kwisi ya mema a kalunga, co njikashika cikashama wa mu mema a kalunga ngeci avashume.

⁴ Nambe nga vitozi vavo vakavatwala ku vunzinda, co njikavashika ngeci vakavatsiye. Njinayongola kuvanyongesa, kesi kuvakwasa embwe.”

⁵ Shukulu Kalunga wa Akamwa ya Vyoshe ikeye akwata asi oshe, co asi ajaja, co voshe valiho valinyenga na vusiwa. Kaye koshe kakajalela nakunyekumuka ngwe Ndonga ya Nailo.

⁶ Shukulu Kalunga natungu limbo lyendi mwilu ya melu, co najala luvula lwendi ano asi. Ikeye akasana mema a kalunga nakuwetila ano asi. Lizina lyendi ikeye Shukulu Kalunga!

⁷ Shukulu Kalunga alinakwendeka ngwendi, “Yeni vanu va mu Isalele, njikamisinganyeka ngeci munjikasinganyeka vanu va ku Sundane. Njatundisile vaFilisitiya ku Kelete, na vaSilya njavatundisile ku Kile, ngwe munjamitundisile ku Ingito.

⁸ Yange Kalunga wa Akamwa ya Vyoshe, njilinakukenga a vumwene vwa Isalele ovu vwavuvi, co njikavunyongesa kuvutundisa ano asi. Oloni kunjikanyongesa vatekulwila voshe va Yakomba.

⁹ “Njikashika lishiko, co vanu va mu Isalele vakavasala ngwe munu asala vimbuto mu musalo. Njikavasala akati ka miyati nakutundisa vaje voshe vangoco.

¹⁰ Vaka-vuvi vaje vali akati ka vanu vange vakavatsiila mu nzita, voshe vaje vendeka ngwavo, ‘Njambi kakatava vuvi ngeci vwete kuli yetu.’ ”

Kwiluka kwa Isalele kwa kulutwe

¹¹ Shukulu Kalunga alinakwendeka ngwendi, “Litangwa likaija omo njikelwisa vumwene vwa Ndaviti vuje vunapu ngwe njuvo yakusiwuka. Co njikavwaesa vivumbe vyayo, nakuyiindula. Njikaitungulula nakuyipwisa ngwe muyafwile laja.

¹² Co vanu va mu Isalele vakafungulula vije vyasalele mu lifuti lya Endome na miyati yoshe vaje vapwile vange laja.” Mukemwo mwalinakwendeka Shukulu Kalunga, uje akatava evi ngeci vilingiwe.

¹³ Shukulu Kalunga alinakwendeka ngwendi, “Matangwa akaija, omo vimbuto vikamena vwasi-vwasi ngeci simbu yakuviteja ikapwa yaindondo, na mikolovozi ya vushuka vwa vinyu, ikasalao kutunda ku mwaka umo nakweta ku mwaka ukwavo. Mikolovozi ya vushuka vwa vinyu ikafwika a minkinda, na a malundu akakala lalo mikolovozi ya vushuka vwa vinyu.

¹⁴ Njikelwisa vanu vange ku lifuti lyavo. Vakatungulula vinganda vyavo vije vyasiwukile, co vakakalamo, vakakuna vitungu vya mikolovozi ya vushuka vwa vinyu, nakunwa vinyu, vakalima vitungu nakulya vije vanalimimo.

¹⁵ Njikaka vanu vange mu lifuti lije linjavanene, co naumo wai akavatundisamo lalo.” Shukulu Kalunga Njambi yeni ikeye nendekamo.