Amose 8 - Livulu lya Shukulu Kalunga

Cimona ca mutonga wa vushuka

¹ Njamwene cimona cikwavo lalo cakutunda kuli Shukulu Kalunga wa Akamwa ya Vyoshe. Co mu cimona cije njamwene mutonga wa vushuka.

² Shukulu Kalunga wanjihwile ngwendi, “Amose, vika unamono?” Co njamukumbulwile ngwange, “Njamono mutonga wa vushuka.” Co Shukulu Kalunga wendekele kuli yange ngwendi, “Kukotoka kwa vanu vange va Isalele kunete. Kunjikatengulula lalo viyongola vyange vyakuvanyanyamesa.

³ A litangwa lije myaso ya mu lipela ikapwa mitambi yakulila. Vivimbi vakapwa vavangi vakalala kwoshe-ikwoshe. Vakavombila anja kujeneka kulinga muyoyo.”

Kuvindama kwa Isalele

⁴ Tolilileni kuli evi, yeni vaka-kulyatangela vaka-kujeneka, nakunyongesa tuutu mu lifuti.

⁵ Co mulinakwendeka ngweni, “Matangwa akujela ahwe vwasi ngeci tulandese vimbuto vyetu. Litangwa Lyakuhwima lihwa simbu ikajo ngeci tulandese lalo vimbuto? Asinoni tukawezelele ku vindando vyetu, nakupangesa viseteko vya makuli, nakupangesa vipeseleso vyakunyanyamena vaka-kwija mukulanda kuli yetu.

⁶ Tukalandesa ndando yakama tiliku ije kuyesi na seo. Co tukawana kautu umo uje kasa kufweta likongo lyendi, nameme kufweta ndando ya vin̄aku, co tukamulanda akapwe ndungo.”

⁷ Shukulu Kalunga Njambi ya Isalele, nalisingi ngwendi, “Kunjikevala vilinga vyavo vya vuvi.

⁸ Ngecivene, asi akajaja, co munu woshe ali mu lifuti akalinyenga. Lifuti lyoshe likajaja, likakatuka nakunyekumuka ngwe muyikalingi Ndonga ya Nailo.

⁹ Simbu ikaija omo litangwa likazivala akati ka mutwe, co njikatengulula mutanya kuupwisa lisusulungu. Yange Kalunga wa Akamwa ya Vyoshe, njinendekamo.

¹⁰ Njikatengulula viwano vyeni kuvipwisa vusiwa, na myaso yeni yakujolela kuyipwisa mitambi yakulila. Mukateula mitwe yeni, co mukazala vikeleya. Mukapwa ngwe visemi vaje valila munavo umolika wa munalume. Litangwa lije likapwa lyalikalu akukotoka kwalyo.

¹¹ “Simbu ikaija omo njikatuma njala ya lyangengela mu lifuti. Vanu vakakala na njala, oloni kesi njala ya vyakulya, vakaziva lihwila, oloni kesi lihwila lya mema. Vakakala na njala na lihwila vya lijwi lya Shukulu Kalunga. Yange Kalunga wa Akamwa ya Vyoshe, njinendekamo.

¹² Vanu vakendangana kutunda ku Lishali lya Mwongwa nakweta ku Lishali lya Menditelenyani, asinoni vakatunda ku kunto nakweta mu ngangela. Vakashakezeka lijwi lya Shukulu Kalunga noku-noku, oloni kuvakaliwana.

¹³ A litangwa lije nameme vambanda vavavwa na vakwenje va nzili vakalezumuka omwo lihwila.

¹⁴ Co vaje vakalisingi na tumponya twa ku Samaliya, vaje vakendeka ngwavo, ‘Ali njambi wa ku Ndani,’ nambe ngwavo, ‘Ali njambi wa ku Mbeleshemba,’ co vanu va cifwa eci vakawa, kuvakenduka lalo.”