Amose 7 - Livulu lya Shukulu Kalunga

Cimona ca vimbimba mikumbi

¹ Njamwene cimona cakutunda kuli Shukulu Kalunga wa Akamwa ya Vyoshe. Co mu cimona cije njamwene Shukulu Kalunga atanga njame ya vimbimba mikumbi te vanateje laja vimbuto vya mwene, co vimbuto vikwavo vyashangumukile kujovelela lalo.

² Mu cimona cange njamwene vimbimba valya vimena vyoshe mu lifuti, co njendekele ngwange, “Shukulu Kalunga wa Akamwa ya Vyoshe sambesa vanu vove! Vatijo vayoya? Omwo vakevo vapwa vavandondo, vakuzeya!”

³ Co Shukulu Kalunga watengulwile viyongola vyendi, co wendekele ngwendi, “Evi viwunamono kuvikalingiwa.”

Cimona ca tuhya

⁴ Njamwene cimona cikwavo lalo cakutunda kuli Shukulu Kalunga wa Akamwa ya Vyoshe. Mu cimona cije njamumwene alivwaesela kunyanyamesa vanu vendi na cihiso ca tuhya. Co tuhya twenyekele nzinga yakama ya mema a kalunga, co twashangumukile kwenyeka lifuti.

⁵ Asinoni njendekele ngwange, “Likele, Shukulu Kalunga wa Akamwa ya Vyoshe! Vatijo vanu vove vasa kuyoya? Omwo vakevo vapwa vavandondo, vakuzeya!”

⁶ Co Shukulu Kalunga watengulwile viyongola vyendi, co wendekele ngwendi, “Evi kuvikalingiwa lalo embwe.”

Cimona ca mukole wakusetekesa vinjuvo

⁷ Njamwene cimona cikwavo lalo cakutunda kuli Shukulu Kalunga. Co mu cimona cije njamwene Shukulu Kalunga nemana kumukulo wa civumbe cije vatungisile na mukole wakusetekesa, co mu livoko lyendi mwakele mukole wakusetekesa vinjuvo.

⁸ Co wanjihwile ngwendi, “Amose, vika unamono?” Co njamukumbulwile ngwange, “Njamono mukole wakusetekesa. Asinoni wendekele kuli yange ngwendi, ‘Njilinakupangesa mukole ou mukukumwesa ngeci vanu vange vanapu ngwe civumbe cakwongomokela anja ya mukole. Co kunjikatengulula lalo viyongola vyange vyakuvanyanyamesa.

⁹ Ku mitambela kuje kuvakalemesela vatekulwila va Isake vakainyongesa. Co myela yakujela ya Isalele ikasiwuka. Njikatsiya naanga ya Yelovowame na mukwale.’ ”

Amose na Amaziya

¹⁰ Asinoni Amaziya, muka-kukombelela wa ku Mbetele, watumine majwi kuli Mwene Yelovowame wa mu Isalele ngwendi, “Amose nakulingila munga yakukulwisa akati ka vanu va Isalele. Co majwi endi asa kuviisa lifuti lyoshe.

¹¹ Amose alinakwendeka ngwendi, ‘Yelovowame akatsila mu nzita, co vanu va Isalele vakavatundisa mu lifuti lyavo nakuvatwala ku vunzinda.’ ”

¹² Asinoni Amaziya wendekele kuli Amose ngwendi, “Muka-kwimanena unapwisamo oni! Iluka ku Yunda ukapangeleko vipangi vyakwambulula. Vanapande kukufweta a vipangi evi.

¹³ Kesi wambulwile lalo vuka-kwimanena kuno ku Mbetele embwe. Ou unapu mwela wa mwene wakulemesela, njuvo ya njambi yendi yakulemesela vanu voshe va mu lifuti.”

¹⁴ Co Amose wakumbulwile ngwendi, “Yange kesi nji muka-kwimanena wakwambulwila fweto embwe. Yange nji kanyungi, nji muka-kunyunga miti ya mikuyu.

¹⁵ Oloni Shukulu Kalunga ikeye wanjitundisile ku vipangi vyange vyakunyunga, co wanjishikile ngeci njambulule vuka-kwimanena kuli vanu vendi va mu Isalele.

¹⁶ Ngecivene, ololo tolilila ku majwi a Shukulu Kalunga. Yove ngwove kesi njambulwile Isalele vuka-kwimanena, co lalo ngwove kesi njambulwile lijwi njuvo ya Isake.

¹⁷ Ngecivene, yove Amaziya, Shukulu Kalunga nendeka kuli yove ngwendi, ‘Munakazi wove akapwa cikwizi wa mu vitapalo, co vana vove vakavatsiila mu nzita. Lifuti lyove vakalitepesa nakulyana kuli vanu veka, co yove ni ukatsila mu lifuti lya vaka-kujeneka kukulaela. Co vanu va mu Isalele vakavatundisa mu lifuti lyavo nakuvatwala ku vunzinda.’ ”