Amose 5 - Livulu lya Shukulu Kalunga

Mutambi wakutenguluka

¹ Tolilileni, yeni vanu va Isalele, ku mwaso wa vusiwa ou njimimbila.

² Mumbanda wa Isalele nau, kakendukamo lalo. Nasala nalala mu livu, naumo wai amukwasa ngeci endukemo.

³ Shukulu Kalunga wa Akamwa ya Vyoshe alinakwendeka ngwendi, “Nganda imo ya Isalele ituma mashwalale vakupwa 1,000, oloni kukeluka lika vakupwa 100, co nganda ikwavo ituma mashwalale vakupwa 100, oloni kukeluka lika likumi.”

⁴ Shukulu Kalunga alinakwendeka kuli vanu va Isalele ngwendi, “Ilukeni kuli yange, co mukayoya.

⁵ Kesi muye ku Mbeleshemba nakukalemeselako. Kesi mukanjitondele ku Mbetele, omwo Mbetele ikapwa cuma cangoco. Kesi mukaye ku Ngilingale omwo vanu vendi vakaya ku vunzinda.”

⁶ Ilukeni kuli Shukulu Kalunga ngeci muyoye. Nga kumumushakezeka, co akaija ngwe tuhya ali vanu va Isalele. Tuhya tukenyeka vanu va ku Mbetele, co naumo wai akasa kutuzima.

⁷ Munanyongo, yeni vaka-kutengulula vushunga nakuvupwisa makuli, co mulyatangela vushunga!

⁸ Shukulu Kalunga ikeye watangele vingongonosi, Lishano Mutumbu na Muta-mbambi. Ikeye akatengulula vutsiki kuvupwisa mutanya, co mutanya aupwisa vutsiki. Ikeye akasana mena mu mema a kalunga nakuwanyokesela ano asi. Lizina lyendi ikeye Shukulu Kalunga.

⁹ Ikeye anyongesa mashwalale vaka-nzili nakusiwula vimpaka vyavo vyakukola.

¹⁰ Yeni vanu mwazinda munu woshe uje alwisa makuli nakwendeka vushunga mu mbanja.

¹¹ Yeni munayandesa tuutu nakuvevila vimbuto vyavo. Co kumukakala mu vinjuvo vya mamanya vije vimunatungu, nambe kunwa vinyu vya ku vitungu vyavivwa vije mwakunine.

¹² Njazivuka kutuma kwa milonga yeni na vuvi vweni vuje munalingi. Yeni mulinakupesa vanu va kulongwa, nakutambula lizika-kanwa, co muvindika tuutu ngeci kesi vawane vushunga mu vimbanja.

¹³ Ngecivene, uje ali na mana akoloke kuluu a simbu eyi yaivi ngacije!

¹⁴ Ngecivene, shakezekeni vije vya vushunga, kesi vije vyavivi, ngeci muyoye. Asinoni Shukulu Kalunga Njambi Muka-nzili yoshe akakala amo neni, ngwe mumukendeka.

¹⁵ Zindeni vije vyavivi, co zemeni vije vyavivwa, vushunga vusholoke mu mbanja. Amo Shukulu Kalunga akazivilako mema ku mbunge vanu va lifuti eli vaje vacili nakuyoya.

¹⁶ Ngecivene, Shukulu Kalunga wa Akamwa ya Vyoshe Muka-nzili yoshe alinakwendeka ngwendi, “Kukakala kulila mbimbi-mitwe mu vitapalo vya mu nganda. Na vandimi navo vakavaleka ngeci valile na vaje voshe vavakafwete vimbongo ngeci valile.

¹⁷ Ku mahya a mikolovozi ya vushuka vwa vinyu kukakala kulila. Evi vyoshe vikalingiwa omwo njikaija nakuminyanyamesa.” Mukemwo mwanendeka Shukulu Kalunga.

¹⁸ Luvinda lweni yeni mwavandamena litangwa lya Shukulu Kalunga! Vuvwa mukajo vukalingiwa ali yeni a litangwa lije? Kuli yeni likapwa litangwa lya lisusulungu, kesi litangwa lya ceke embwe.

¹⁹ Likapwa ngwe munu atewa ndumba, co aliwana lalo na mbeya! Nambe ngwe munu aija ku njuvo yendi, co aaka livoko lyendi a civumbe, co aje vene ashumiwa ku linyoka!

²⁰ Litangwa lya Shukulu Kalunga likanena lisusulungu, kesi ceke embwe, likapwa litangwa lya lisusulungu vwii, kulikatu ceke.

²¹ Shukulu Kalunga alinakwendeka ngwendi, “Yange njazinda nakuyengula viwano vyeni vyakulemesa, kunjivwaelela navyo!

²² Nameme munjikombelela vin̄ombelo vyeni vya kwenyeka, na milambu ya vimbuto vya vinona, kunjikavitambula, nambe mukombelela vin̄ombelo vya kulitombola vya vimuna veni vakununa, kunjikavitambula.

²³ Likeleni muyoyo wa myaso yeni, kunjishaka kutolilila ku tulyalya tweni.

²⁴ Oloni vushunga vwite ngwe mema a mu ndonga, na vuvwa ngwe ndonga ije kuyesi kuma cau.

²⁵ “Yeni vanu va Isalele, yange kunjashakele vin̄ombelo nambe mulambu a myaka makumi awana ije njamitwamenenene mu mambo.

²⁶ Oloni omwo munalemesa vifwa vya njambi yeni Sakute uje mukatumbula ngweni mwene, na Kaiwane, njambi yeni wa vingongonosi, munapande kwambata vifwa evi

²⁷ omo njimitwala mu vunzinda musambwa ya lifuti lya Ndamasiku.” Mwalinakwendeka Shukulu Kalunga, lizina lyendi ikeye Njambi Muka-nzili yoshe.