Amose 4 - Livulu lya Shukulu Kalunga

¹ Tolilileni majwi awa yeni vanakazi va ku Samaliya, vanakazi vakununa manene ngwe vingombe va lwavo va ku Mbashane vakulisa mwamuvwa, mulinakupangesa mwamuvi vaka-kuzeya, mulinakuyandesa vaka-kuutwa, co mulinakushika vanalume veni ngeci vaminenele-nenele vyakunwa vyakupendesa!

² Shukulu Kalunga wa Akamwa ya Vyoshe nalisingi a lizina lyendi lyakujela ngwendi, “Litangwa likaija omo vakamikokangeya na tulovo, munu na munu akapwa ngwe isi ali ku kalovo.

³ Co vakamikokangeyela ku civumbe cakuvujuka ngeci vakamyumbile anja.”

VaIsalele vonwa kulilongesa

⁴ Shukulu Kalunga wa Akamwa ya Vyoshe alinakwendeka ngwendi, “Yeni vanu va Isalele, nga mushaka yeni ku mwela wakujela ku Mbetele mukalingileko vuvi! Nga mwasa yeni ku Ngilingale mukalingileko vuvi! Co neneni vin̄ombelo vyeni mutondo na mutondo, neneni cavulikumi ceni a litangwa lyoshe lyamucitatu.

⁵ Neneni makende kupwa mulambu wa cikandelela kuli Njambi, co lyaleseni a milambu ikwavo imunena! Omu mukemwo mumwashaka kulinga.

⁶ “Yange njanenele njala ya lyangengela mu vinganda vyeni vyoshe, oloni kumwelukile kuli yange.

⁷ Yange kunjanyokesele nyonzi omo vimbuto vyeni vyashakele nyonzi. Co njanyokesele nyonzi ku nganda imo, oloni kunjainyokesele ku nganda ikwavo. Ku lihya limo kwanyokele nyonzi, oloni ku lihya likwavo kwomine cau.

⁸ Vanu vazeyele na lihwila, co vatundile mu vinganda vimo vaile ku nganda ije ivayongwele ngeci vakawanako mema, oloni kukwakele mema akupwisamo kunwa. Oloni nameme ngoco kumwelukile kuli yange.

⁹ “Njatumine lihunzi lya ntwima nakumisa vimbuto vyeni cau. Co vimbimba mikumbi valile myaaka yeni yoshe njwa, na vitungu vyeni vya mikolovozi ya vushuka vwa vinyu na miti yeni ya mikuyu na miti ya olive. Oloni nameme ngoco kumwelukile kuli yange.

¹⁰ “Njatumine mushongo wakulitambwisa ali yeni ngwe uje lalo njatumine a Ingito. Njatsiile vakwenje veni mu nzita, njambatele tuvalu tweni. Co njamizivisile kunika kwa mivila ya vanu vaje vatsililile mu vilombo vyeni. Oloni nameme ngoco kumwelukile kuli yange.

¹¹ “Njanyongesele vamo veni ngwe munjanyongesele Sondoma na Ngomola. Co vamo veni vaje vaputumukileo vapwile ngwe cimbundi cakwenya cije civanatundisa mu liko. Nameme ngoco kumwelukile kuli yange.” Mwanendeka Shukulu Kalunga.

¹² “Ngecivene, yeni vanu va Isalele, njikaminyanyamesa. Omwo njinayongola kulinga cuma eci kuli yeni, co livwaeseleni cimweja kusompa cange!”

¹³ Njambi ikeye watangele minkinda, co watangele lihunzi. Ikeye asholola viyongola vyendi ku munu ngeci munu avizivuke, ikeye atengulula mutanya kuupwisa vutsiki. Ikeye muka-kushwana ano asi oshe. Lizina lyendi ikeye, Shukulu Kalunga Njambi Muka-nzili yoshe!