2 Yowano 1 - Livulu lya Shukulu Kalunga

¹ Mukanda wakutunda kuli Mukulunu. Kuli ndokazi wa cizemo na kuli vana vendi, vaje vanjazema mwa vushunga. Co kesi yange lika, oloni voshe vaje vazivuka vushunga vakuzema,

² omwo vushunga vwakala muli yetu, co vukakala muli yetu myaka yoshe.

³ Njambi Tatetu na Yesu Kilistu Muna Ishe, atwane kutetela na mema ku mbunge na kwoloka, evi vipwe vyetu mu vushunga na mu cizemo.

Vushunga na cizemo

⁴ Njavwaelelele manene omo njawanene ngeci vamo vana veni valinakuyoya mu vushunga, ngwe muje mwatushikile Tate.

⁵ Co ololo njikulomba yove ndokazi wa cizemo ngwange, tulizemeni umo na mukwavo. Eli kesi lishiko lyaliha njimisonekela, eli likelyo lishiko tunakala nalyo tunde akulivanga.

⁶ Cizemo eci njendeka cilumbunuka ngeci tunapande kuyoya mukwononoka kushika kwa Njambi. Kushika, ngwe yeni voshe mwaziva laja tunde akulivanga, kunapu ngeci, yeni voshe munapande kuyoya mu cizemo.

⁷ Omwo vaka-kukwisa vavangi vanashandokela mu kaye mwoshe, vanu vaje kuvatava ngeci Yesu Kilistu wezile mu cifwa ca vunu. Munu wa cifwa cangacije napu muka-kukwisa, ikeye napu Citozi ca Kilistu.

⁸ Linyungeni yeni vavevya, kutewa muzimbalesa vije twapangelele, oloni mukatambula cikandelela ceni camutunu.

⁹ Munu woshe uje kakala na vilongesa vya Kilistu, oloni avipulakana, ikeye kesi na Njambi. Woshe uje akala na vilongesa ali na vyoshe vivali, lshe na Mwana.

¹⁰ Ngecivene, nga munu umo aija kuli yeni, oloni kaminenela vilongesa evi, kesi mumutambule mu vinjuvo vyeni, nambe kesi mwendeke kuli ikeye ngweni, “Kwoloka kukale nove.”

¹¹ Omwo woshe uje avakandelela mu kwoloka alitombola navo mu vuvi vuje vuvakalingi.

Majwi akumanesela

¹² Njili na vyavingi vyakumileka, oloni kunjasa kuvisoneka a lipapelo na tinta, oloni njili na cinyangavili cakwija kuli yeni nakusimutwiya neni mesho na mesho, ngeci kuvwaelela kwetu kukapwe kwamutunu.

¹³ Vana va ndokazi yeni wa cizemo vanatumu viindu vyavo kuli yeni.