2 Vimyene 8 - Livulu lya Shukulu Kalunga

Munakazi wa ku Shuneme vamwilwisila livu lyendi

¹ Elisha walekele munakazi wa mu Shuneme, uje wakele na mwana yendwile ku vatsi ngwendi, “Katuka uye na naanga yove kwoshe kuje mukalishukila, omwo Shukulu Kalunga akatuma njala ya lyangengela mu lifuti, ikakalako myaka itanu na ivali.”

² Ngecivene, uje munakazi wakavangeyeye lijwi lya Elisha, co waile amo na naanga yendi ku lifuti lya Filisitiya nakukalako myaka itanu na ivali.

³ Kukuhwa kwa mwaka wamucitanu na ivali uje munakazi welukile ku Isalele, co waile kuli mwene nakwihula a njuvo yendi na a livu lyendi ngeci vamwilwisilevyo.

⁴ Co wawanene mwene alinakusikama na Ngehazi, ngamba ya Elisha, omwo mwene washakele kuzivuka a vikomokeso vya Elisha.

⁵ Simbu Ngehazi acili nakuleka mwene vati Elisha wendwile uje mutsi, co uje munakazi wambulwile n̄anda yendi kuli mwene, co Ngehazi wendekele ngwendi, “Shukulu, ou munakazi nendi lalo munendi vamwindwile kuli Elisha!”

⁶ Akukumbulula cihula ca mwene, uje munakazi washulisile vukaleo vwa Ngehazi, ngecivene, mwene wasanene mwata, wamulekele ngeci elwisile uje munakazi vyuma vyendi vyoshe, amo na vimbuto vyoshe vije vyamenene mu mahya endi a myaka ije itanu na ivali yakakele kweka.

Elisha na Mwene Mbenehandande wa Silya

⁷ Elisha waile ku Ndamasiku a simbu ije omo Mwene Mbenehandande wa Silya wavinjile. Omo valekele mwene ngwavo Elisha ali kuje,

⁸ co wendekele kuli Hazayele, umo wa vamyata vendi ngwendi, “Twala vwana kuli muka-kwimanena, co muleke ehule kuli Shukulu Kalunga nga njinduka indi kunjinduka.”

⁹ Ngecivene, Hazayele walongekeyeye a tumelo makumi awana a vyuma vyoshe vyavivwa vya mu Ndamasiku, co waile kuli Elisha. Omo Hazayele wetele kuli muka-kwimanena, wendekele kuli ikeye ngwendi, “Ngamba yove Mwene Mbenehandande nanjitumu kukwihula nga enduka ku kuvinja kwendi indi embwe.”

¹⁰ Elisha wamukumbulwile ngwendi, “Ya ukamuleke ngwove ukenduka, oloni Shukulu Kalunga nanjileke ngeci akatsa.”

¹¹ Co Elisha wamukengele shwii noo Hazayele wazivile shwamwa. Co Elisha walilile.

¹² Co Hazayele wamwihwile ngwendi, “Omwo vikajo ulinakulila shukulu?” Elisha wamukumbulwile ngwendi, “Omwo njazivuka vuvi vuukalinga kuli vanu va Isalele. Ukenyeka vimpaka vyavo, nakutsiya vakwenje na moko ya mukwale, nakumwakwila kuti vana vavo, nakutavula mu memo a vanakazi vavo.”

¹³ Co Hazayele wehwile ngwendi, “Vatijo njikasa kuwana nzili ya cifwa oco? Yange nji munu wangoco!” Elisha wamukumbulwile ngwendi, “Shukulu Kalunga nanjimwesa ngeci yove ukapwa mwene wa Silya.”

¹⁴ Hazayele welukile kuli Mbenehandande, co wamwihwile ngwendi, “Vika nakendeka Elisha?” Hazayele wamukumbulwile ngwendi, “Ikeye nanjileka ngwendi, mwa vushunga vene ukenduka.”

¹⁵ Oloni alikaki Hazayele wanonele kambilititi, wakambwatekele mu mema, wafwikile mwene ku mesho, co mwene watsile. Ngecivene, Hazayele washwanene Mbenehandande kupwa mwene wa Silya.

Mwene Njeholame wa mu Yunda

¹⁶ Mu mwaka wamucitanu omo Njolame muna Ahave wapwile mwene wa mu Isalele, Njeholame muna Njosefati wapwile mwene wa mu Yunda.

¹⁷ Wakele na myaka makumi atatu na ivali, washwanene mu Yelusalema myaka itanu na itatu.

¹⁸ Munakazi wendi wapwile muna Ahave, co ngwe muyalingile naanga ya Ahave, na ikeye lalo wakavangeyeye vingila vyavivi vya vimyene va mu Isalele. Walingile vuvi ku mesho a Shukulu Kalunga,

¹⁹ oloni Shukulu Kalunga kashakele kunyongesa Yunda embwe, omwo wakulaesele laja ngamba yendi Ndaviti ngeci vatekulwila vendi vakashwana simbu yoshe.

²⁰ Omo Njeholame washwanene, vaEndome vatengulukilile Yunda, valyangwilile mwene yavo.

²¹ Ngecivene, Njeholame wakatukile na matemba endi oshe, waile ku Zaile, co mbunga ya mashwalale vaEndome vavazengelekele. A simbu ya vutsiki Njeholame na vaka-kushika matemba endi vatewele, co mashwalale vendi vatewelele ku membo avo.

²² Co Endome anga yalimanena ku mavoko a Yunda na lelo lino. Co a simbu ije nganda ya Limbena na ikeyo lalo yatengulukilile Yunda.

²³ Vyuma vyoshe vije vyalingile Njeholame vavisoneka mu Livulu lya Mizimbu ya Vimyene va mu Yunda.

²⁴ Njeholame watsile, co vamutsindile mu vimbumbo vya vumwene mu Nganda ya Ndaviti, co munendi Ahaziya wamushwanene kupwa mwene.

Mwene Ahaziya wa mu Yunda

²⁵ Mu mwaka wamulikumi na ivali amo Njolame muna Ahave wapwile mwene wa mu Isalele, Ahaziya muna Njeholame wapwile mwene wa mu Yunda.

²⁶ Ahaziya wakele na myaka makumi avali na ivali, washwanene mu Yelusalema mwaka umo. Lizina lya vaina lyapwile Ataliya, muna Mwene Ahave, kuku yendi wapwile Mwene Omeli wa mu Isalele.

²⁷ Ahaziya walitombwele na Mwene Ahave akulyambatela, co walingile vuvi ku mesho a Shukulu Kalunga, ngwe muvalingile lalo vaka-naanga ya Ahave.

²⁸ Mwene Ahaziya walipandakaanene na Mwene Njolame wa mu Isalele mu nzita kulwisa Mwene Hazayele wa Silya. Co valwililile nzita ku Lamote mu Ngilyande, Njolame wavetwele mu nzita.

²⁹ Co welukile ku nganda ya Njezelele ngeci akakanguke ku vimbandu vyendi vije vyavetwele, Ahaziya waileko nakukamumona.