2 Vimyene 7 - Livulu lya Shukulu Kalunga

¹ Elisha wamukumbulwile ngwendi, “Tolilila vyanendeka Shukulu Kalunga! Imene a simbu ino vene mu Samaliya ukasa kulanda makilo atatu a vunga vwa tiliku vwakuseneta, nambe makilo atanu na imo a mbale ya maumwa na livundungulu limo lya siliva.”

² Co uje katumwa ka mwene wendekele kuli Elisha ngwendi, “Eci kucikalingiwa embwe, nameme vene nga Shukulu Kalunga atuma nyonzi yakama a simbu ino!” Co Elisha wamukumbulwile ngwendi, “Ukacimona omo cikalingiwa, oloni yove kuukaliko vimo ku vyakulya vije.”

Mashwalale va Silya veluka

³ Vanalume vawana vakele nakuvinja mushongo wa mbumba vakele anja ku vikolo vya nganda ya Samaliya, co valyendekesele umo na mukwavo ngwavo, “Omwo vikajo tulinakuvandamena kuno noo tutsa?

⁴ Kukwesi seo yakukovela mu nganda, omwo tukalandukilamo ngoco, nga lalo tutumbama kuno, anga vene tutsa. Ngecivene, tuyeni ku cilombo ca vaSilya, cuma cakama vakalinga kuli yetu cikapwa vene kututsiya, oloni alumo kuvakatutsii.”

⁵ Ngecivene, ku cingwezi vaile ku cilombo ca vaSilya, oloni omo vaketeleko, kuvakawaneneko munu wai.

⁶ Shukulu Kalunga wazivisile vaSilya cililimo cakufwa ngwe ca mashwalale vavangi vaija na tuvalu na matemba, co vaSilya vayongwele ngeci mwene wa mu Isalele nakumuna mwene wa vaHiti na mwene wa Ingito na mashwalale vavo mukuvalwisa.

⁷ Ngecivene, ku cingwezi vaSilya vatewele, co vasezele vimbalaka vyavo na tuvalu na vimulu, co vasezele cilombo cavo ngwe muje mucakelelele.

⁸ Omo vaje vanalume vawana vavinjile mushongo wa mbumba vetele kumukulo wa cilombo, vakovelele mu mbalaka imo, co valile nakunwa vije vyakelemo. Vambatele siliva na ngolinde na vuzalo vuje vawanenemo, co vatuukilemo vakavishwekele, co velukile lalo, vakovelele mu mbalaka ikwavo, co valingile ngeci muje mwakulivanga lalo.

⁹ Cooni valyendekesele umo na mukwavo ngwavo, “Kutwapandele kulinga ngacije embwe! Tuli na muzimbu wauvwa manene, kutwapandele kulitulikilawo embwe. Nga tuvandamena noo ku mutondo asina tuwambulule, mwa vushunga tukawana cihiso. Mwamuvwa ololo tuyeni tukaleke vamyata va mwene!”

¹⁰ Co vatundile mu cilombo ca vaSilya, velukile ku Samaliya, vasanene vaka-kunyunga ku vikolo vya nganda ngwavo, “Yetu tunaile ku cilombo ca vaSilya, oloni kutwamwene cuma cimo nambe kuziva munu, oloni tuvalu na vimulu kuvavazitwile, vimbalaka lalo vili ngeci muje muvavisezelele vaSilya.”

¹¹ Co vaka-kunyunga vambulwile uje muzimbu, ngeci vukaleo ovu vavutwalele ku lipela.

¹² Yapwile simbu ya vutsiki, oloni mwene wendukile a vulili walekele vamyata vendi ngwendi, “Njimileka vutumbe vanayongola vaSilya! Vakevo vanazivuka njala ya lyangengela ije ili muno, ngecivene, vanatundu mu cilombo cavo vanai nakuvanda mu shwata. Vanayongola ngwavo yetu tukatunda muno mu nganda nakukashakezeka vyakulya, co vakatufungulula nakufungulula lalo nganda.”

¹³ Co umo wa ali vamyata vendi wendekele ngwendi, “Vanu ava vali muno mu nganda vanavindama, vanapu ngwe vaje vanatsi laja. Ngecivene, tutumeniko vanalume vamo na tuvalu vatanu vaje vanasalao, ngeci tuzivuke vije vinalingiwa.”

¹⁴ Vaangwile vanalume vamo, co mwene wavatumine mu matemba avali kukawana vika vinalingiwa ku mashwalale vaSilya.

¹⁵ Co vaje vanalume vaile noo vaketele ku Yondau, co mu ngila mwoshe vamwene vuzalo na vivala vije vivasezele vaSilya omo vatewele. Asinoni velukile, co vakambulwile vukaleo kuli mwene.

¹⁶ Co vanu va mu Samaliya vashatukile, vakapukwile cilombo ca vaSilya. Ngwe muje vene mwendekele Shukulu Kalunga ngwendi makilo atatu a vunga vwa tiliku vwakuseneta, nambe makilo atanu na imo a mbale ya maumwa vakavilandesa na livundungulu limo lya siliva.

¹⁷ Co calingiwile ngeci mwene wa mu Isalele waakele mwata ku cikolo ca nganda ikeye wapwile katumwa kendi. Uje mwata vamulyatangelele vanu, co watsile ngwe muje vene mwendekele Elisha a simbu ije omo mwene waileko nakukamumona.

¹⁸ Elisha walekele mwene ngwendi a simbu ije vene imene, makilo atatu a vunga vwa tiliku vwakuseneta, nambe makilo atanu na imo a mbale ya maumwa vakavilandesa mu Samaliya na livundungulu limo lya siliva,

¹⁹ co uje mwata wakumbulwile ngwendi, “Eci kucikalingiwa embwe, nameme vene nga Shukulu Kalunga atuma nyonzi a simbu ino!” Co Elisha wamukumbulwile ngwendi, “Ukacimona omo cikalingiwa, oloni yove kuukaliko vimo ku vyakulya vije.”

²⁰ Co cuma eci calingiwile kuli ikeye, vamulyatangelele vanu ku cikolo ca nganda, co watsile.