2 Vimyene 6 - Livulu lya Shukulu Kalunga

Vawana njaviti ije yazimbalele

¹ Litangwa limo vaka-kwimanena valekele Elisha ngwavo, “Ou mwela utunatungu unapu waundondo manene!

² Twane lisesa lyakukashinja viti ku Ndonga ya Yondau, tukatungeko.” Co Elisha wavakumbulwile ngwendi, “Mwamuvwa yeni.”

³ Co umo wavo walombele Elisha ngeci aye amo navo, co ikeye wamutavele,

⁴ vaile amo nendi. Omo vetele ku Ndonga ya Yondau, vashangumukile kupanga.

⁵ Co umo wavo omo wakele nakushinja muti, co vwasi-vwasi njaviti yendi yasokokele mu mwini, yandimukilile mu mema. Co walikomokelele walekele Elisha ngwendi, “Tawe shukulu! Vatijo njilinga? Omwo eyi njaviti yapwile yakukumuna!”

⁶ Co Elisha wamwihwile ngwendi, “Inandimukila kulijo?” Co uje munalume wamwinikililemo, co Elisha washinjile citi, wacumbilile mu mema, co njaviti yatufukile.

⁷ Co Elisha washikile ngwendi, “Izivulule.” Co uje munalume waizivulwile.

Mbunga ya mashwalale va Silya vavafungulula

⁸ Mwene wa Silya walwisile Isalele. Wehwile vamyata vendi, co waangwile mutambela kuje kuvakatungila cilombo cendi.

⁹ Oloni Elisha watumine majwi kuli mwene wa mu Isalele, nakumunangula ngwendi kesi ashwenye kuyehi na mutambela uje, omwo vaSilya vanavavandamena kuje nakuvalwisa.

¹⁰ Ngecivene, mwene wa mu Isalele wanangwile vanu vaje vakele kuje ku mutambela, co vakele nakunyunga. Eci calingiwile visimbu vyavingi.

¹¹ Co mwene wa vaSilya wakele na citanga cakama manene a cuma eci, wasanene vamyata vendi wavehwile ngwendi, “Iya umo akati keni ali ku mutambela wa mwene wa mu Isalele?”

¹² Co umo wavo wamukumbulwile ngwendi, “Naumo wai, mwane. Oloni Elisha muka-kwimanena akaleke mwene wa mu Isalele vije ukendeka mu vushweke nameme mu mulili wove.”

¹³ Co mwene washikile ngwendi, “Museteleni oku kwoshe ali ngeci njimukwate.” Omo vamulekele ngwavo Elisha ali ku Ndotane,

¹⁴ co watumineko mashwalale vavangi na tuvalu na matemba. Vaketele vutsiki mu nganda, co vaizengelekele.

¹⁵ Alikaki mutondo, ngamba ya Elisha wendukile, watuukile mu njuvo, co wamwene mashwalale va Silya na tuvalu twavo na matemba avo vanazengeleka nganda. Co welukile kuli Elisha, wamulekele ngwendi, “Shukulu tunatsi! Tulinga vati?”

¹⁶ Elisha wamukumbulwile ngwendi, “Kesi uzive lyova embwe. Yetu ku mutambela wetu tuli navo vavangi kutuvakana ava vali ku mutambela wavo.”

¹⁷ Asinoni Elisha walombelele ngwendi, “Shukulu Kalunga, tonesa mesho endi, ngeci amone!” Co Shukulu Kalunga wakumbulwile lilombelo lyendi, co ngamba ya Elisha wakengele akamwa ya lilundu, wamwene ngeci ashulile na tuvalu na matemba a tuhya oshe azengelekele Elisha.

¹⁸ Omo vaSilya valwile, co Elisha walombelele ngwendi, “Shukulu Kalunga, zivalesa mesho a vanu ava ngeci vapwe tupuputwa!” Co Shukulu Kalunga wakumbulwile lilombelo lyendi, wazivalesele mesho avo.

¹⁹ Asinoni Elisha waile kuli vakevo, co wendekele navo ngwendi, “Mwazimbalesa ngila, eyi kesi ikeyo nganda imushaka embwe. Njikaveni njimitwamenene kuli munalume imusetela.” Co wavatwamenenene ku Samaliya.

²⁰ Vacikovela vene mu nganda, co Elisha walombelele ngwendi, “Shukulu Kalunga tonesa mesho avo, ngeci vamone.” Co Shukulu Kalunga wakumbulwile lilombelo lyendi, co watonesele mesho avo, vamwene ngeci vali mu Samaliya.

²¹ Omo mwene wa mu Isalele wamwene vaSilya, wehwile Elisha ngwendi, “Mwane, njivatsiye ndi?”

²² Co wamukumbulwile ngwendi, “Embwe, kuma yove wasa kutsiya vanu vaje unafungulula mu nzita ndi? Vaane lika vyakulya na vyakunwa, co veluke kuli mwene yavo.”

²³ Ngecivene, mwene wa mu Isalele wavalingilile ciwano cakama manene, co omo vanali nakunwa, wavelwisilile kuli mwene wa Silya. Co kutunda aje vaSilya valikelele kulwisa lifuti lya Isalele.

Nganda ya Samaliya vaizengeleka

²⁴ A simbu imo Mwene Mbenehandande wa ku Silya watwamenenene mashwalale vendi kukalwisa Isalele, co vazengelekele nganda ya Samaliya.

²⁵ Omwo vazengelekele ije nganda vyakulya vyapwile vyavindondo manene mu nganda, co mutwe wa cimulu vaulandele mavundungulu makumi atanu na atatu a siliva, co litambelo lya kilo lya tuzi twa mayembe valilandele mavundungulu atanu a siliva.

²⁶ Mwene wa mu Isalele wakele nakwenda a civumbe ca nganda, co munakazi umo watambekele ngwendi, “Shukulu njikwase!”

²⁷ Co mwene wamukumbulwile ngwendi, “Nga Shukulu Kalunga shendi kukukwasa, co yange njikukwasa vika? Kuma yange njili na tiliku nambe vinyu ndi?

²⁸ Vika ushaka ngeci njikukwase?” Uje munakazi wakumbulwile ngwendi, “Litangwa limo ou munakazi wayongwele ngwendi tulye munange akulivanga, co imene tukalya munendi.

²⁹ Ngecivene, twatelekele munange, co twalile. Alikaki njamulekele ngwange anene munendi tulye, kuma ikeye namushweke laja!”

³⁰ Omo mwene wazivile ngeci, co watavwile vuzalo vwendi mukuviilila, co vanu vaje vakele kuyehi na civumbe vamwene ngeci mwene nazala vikeleya mukati ka vuzalo vwendi.

³¹ Co wendekele ngwendi, “Njambi anjitsiye nga lelo Elisha kuvamutapa mutwe omo kanda litangwa litoke!”

³² Co watumine katumwa kukashaka Elisha. A simbu ije, Elisha wakele hembo nakusikama na vantwama va Isalele. Omo kanda katumwa ka mwene ete, Elisha walekele vaje vantwama ngwendi, “Muka-kutsiya alinakutuma munu nakunjitsiya! Omo eta kuno, shokeni lipito, co kesi mumutave akovele. Mwene lalo alinakumukava munima.”

³³ Omo kanda acimanese kwendeka evi, co katumwa ka mwene wetele, wendekele ngwendi, “Shukulu Kalunga ikeye nanene vukalu vwoshe ovu ali yetu! Vikajo njimuvandamena ngeci atukwase?”