2 Vimyene 4 - Livulu lya Shukulu Kalunga

Elisha akwasa fwile wa kautu

¹ Fwile wa munakazi wa mu munga ya vaka-kwimanena waile kuli Elisha wendekele ngwendi, “Mwane, munalume wange natsi! Ngwe muwazivukila ikeye wapwile munalume muka-kukomoka Njambi, oloni munalume uje yatambwile vimbongo vyendi naija, co ashaka kwambata vana vange vavali va vanalume ngeci akavapwise vindungo ku likongo lije lyatambwile munalume wange kuli ikeye.”

² Co Elisha wamwihwile ngwendi, “Vatijo njasa kukukwasa? Njileke vikajo ulinavyo ku njuvo yove?” Co wakumbulwile ngwendi, “Nacimo cai njilinaco, kuvanga lika kalilulu kakandondo ka mazi a olive.”

³ Co Elisha wamulekele ngwendi, “Ya kuli vakweni ukakumuneko malulu amangi amupulungwa ngwe muunasela.

⁴ Asinoni ukakovela mu njuvo na vana vove, co mukashoka lipito, co shangumuka kwitila mazi mu malulu. Tumbika kumukulo lilulu limo na limo lije linashulu.”

⁵ Ngecivene, uje munakazi wakovelele mu njuvo amo na vana vendi, co vashokele lipito, wanonele kaje kalilulu kakandondo ka mazi a olive, wetilile mazi mu malulu aje vakele nakumwana vana vendi.

⁶ Omo vashulisile malulu oshe, co wendekele kuli munendi ngwendi njineneleko lilulu likwavo. Co wamukumbulwile ngwendi, “Lyai, lije likelyo lyakumanesela.” Co mazi a olive alikelele kwita.

⁷ Co waile kuli Elisha muka-kwimanena, co wamulekele ngwendi, “Landesa mazi a olive ufwete makongo ove oshe, co vije vimbongo vikasalao vikukwase na vana vove va vanalume.”

Elisha na munakazi wakufuka wa ku Shuneme

⁸ Litangwa limo Elisha waile ku Shuneme, kuje kwakele munakazi wakufuka. Co uje munakazi wamulanyele kukulya, co tunde aje omo Elisha wakele nakuyayaya ku Shuneme, wakele nakulila-lila vyakulya ku njuvo ya uje munakazi na munalume wendi.

⁹ Co uje munakazi wendekele kuli munalume wendi ngwendi, “Mwa vushunga uje munalume akaija-ija kuno kushwakumo wapwa munu wakujela wa Njambi.

¹⁰ Tumutungile kamulili akamwa ya njuvo, twakemo vulili, na mesa, na citumbamo, na ndeya, co ase kukalamo oshe aje ezila nakutusikamesela.”

¹¹ Litangwa limo Elisha welukilile ku Shuneme, co walondele ku mulili wendi nakuhwima.

¹² Walekele ngamba yendi Ngehazi ngeci asane uje munakazi. Co omo uje munakazi wezile,

¹³ Elisha walekele Ngehazi ngwendi, “Mwihule vinjinapande kumulingila akukwasa kwendi kuje kwakama kwanalingi ngacije akutwana vije vitwashakele ngwe kukujeneka kwetu. Amo ashaka njiye kuli mwene nambe kuli muka-kushika wa nzita mukumwimanenako.” Uje munakazi wakumbulwile ngwendi, “Embwe, navimo vyai vinjinajeneka akati ka vavushoko vwange.”

¹⁴ Elisha wehwile Ngehazi ngwendi, “Vikajo njasa kumukwasa ou munakazi?” Co Ngehazi wakumbulwile ngwendi, “Mwa vushunga ou munakazi kesi na mwana, co lalo munalume wendi nakuluvala.”

¹⁵ Elisha washikile ngwendi, “Muleke aije kuno.” Co uje munakazi wezile, co watsikamene mu cikolo,

¹⁶ co Elisha wamulekele ngwendi, “Mungolosika a simbu ino vene ukakala na mwana wa munalume.” Co ikeye wakomokele ngwendi, “Embwe, shukulu, kesi unjikwise. Yove unapu u munu wa Njambi!”

¹⁷ Oloni capwile ngacije vene ngwe mwendekele Elisha, akweta mungolosika a simbu ije vene, uje munakazi wakitile mwana wa munalume.

¹⁸ Litangwa limo, uje mwanike wakavele ishe ku mahya kuje kuvakele vaka-kuteja.

¹⁹ Acete ngacije vene, co walilile nakuleka ishe ngwendi, “Mutwe wange uvinja! Mutwe wange uvinja!” Co ishe wendekele kuli ngamba ngwendi, “Ilwisa mwanike kwimbo kuli vaina.”

²⁰ Co uje ngamba welwisile mwanike kuli vaina, vaina vamukwatele nakumwaka a mendi noo ku mutanya, co kweta ku simbu ije vene watsile.

²¹ Vaina vamutwalele ku mulili wa Elisha, co vamwakele a vulili vamusezele, co vashokele lipito.

²² Asinoni munakazi wasanene munalume wendi wamulekele ngwendi, “Njitumineko ngamba amo na cimulu. Njishaka kuya kuli muka-kwimanena Elisha. Ololo njiilukamo.”

²³ Co munalume wendi wamwihwile ngwendi, “Omwo vikajo ushaka kuya lelo? Lelo kesi Litangwa Lyakuhwima nambe lya Ciwano ca Kutenama Ngonde.” Co munakazi wamukumbulwile ngwendi, “Kukwesi mulonga.”

²⁴ Asinoni waakele sileyi a cimulu, washikile uje ngamba ngwendi, “Zambwisa vwasi cimulu, co kesi wendese cimulu kamandondo kuvanga yange njikuleke.”

²⁵ Ngecivene, wakatukile waile ku Munkinda wa Kalemele kuje kwakele Elisha. Omo Elisha wamumwene acendela alyala kamandondo, wendekele kuli ngamba yendi Ngehazi ngwendi, “Kenga, uje munakazi wa ku Shuneme alinakwija!

²⁶ Zambwila kuli ikeye ukazive nga vanenduka amo na naanga yendi.” Co uje munakazi walekele Ngehazi ngwendi, “Eyo, tunenduka mwamuvwa,”

²⁷ oloni omo wetele kuli Elisha a Munkinda, watsikamene a mavuli kulutwe lwendi, co wakwatele Elisha ku mendi. Ngehazi washakele kumunakula, oloni Elisha wendekele ngwendi, “Mwecele. Kuma yove kuwamwene ngeci ali na vusiwa vwakama manene ndi? Oloni Shukulu Kalunga kanjilekeleo cuma cimo.”

²⁸ Co munakazi wendekele kuli Elisha ngwendi, “Shukulu, kuma yange njakulombele mwana wa munalume ndi? Kuma yange kunjakulekele ngwange kesi unjikulaese ngoco ndi?”

²⁹ Co Elisha watengulukilile kuli Ngehazi wendekele ngwendi, “Zambula! Ambata mulamu wange uye. Co kesi wimane nakulikandelela na munu woshe-iwoshe uliwana nendi mu ngila, nga munu akukandelela kesi umukumbulule. Ya lika ku njuvo, co ukakambeka mulamu wange akamwa ya mwanike.”

³⁰ Uje munakazi wendekele kuli Elisha ngwendi, “Njilisinga ali Shukulu Kalunga wakuyoya na ali yove ngwange kunjikuseze!” Ngecivene, muvuvali vwavo vaile amo.

³¹ Ngehazi watwamene kulutwe, co wakakambekele mulamu wa Elisha ali mwanike, oloni kukwakele lijwi nambe cimweso cimo ca mwonyo. Ngecivene, welukile nakuliwana na Elisha, co wamulekele ngwendi, “Mwanike kakasumukile.”

³² Omo Elisha wetele, wakovelele ku mulili endi lika, wamwene mwanike nalala a vulili natsi.

³³ Co washokele lipito walombelele kuli Shukulu Kalunga.

³⁴ Washuluvalele ali mwanike, co waakele kanwa kendi a kanwa ka mwanike, na mesho endi a mesho a mwanike, na mavoko endi a mavoko a mwanike. Omo washuluvalele akamwa ya mwanike, co muvila wa mwanike washangumukile kukala na ntwima.

³⁵ Co Elisha wakatukile, wendanganene muje mu mulili, co welukilile lalo nakushuluvala akamwa ya mwanike. Co mwanike washamitile visimbu vitanu na vivali, asinoni washangumukile kutona.

³⁶ Co Elisha wasanene Ngehazi wamulekele asane vaina ya mwanike. Omo vaina vakovelelemo, Elisha wendekele kuli ikeye ngwendi, “Munove ou.”

³⁷ Co uje munakazi wawililile ku mendi a Elisha, wakulamenene asi, asinoni wambatele munendi, co waile.

Vikomokeso vivali vikwavo lalo

³⁸ A simbu imo, omo kwakele njala ya lyangengela mu lifuti lyoshe, Elisha welukile ku Ngilingale. Omo wakele nakulongesa mbunga ya vaka-kwimanena, co walekele ngamba yendi kwaka ndeo yakama a liko ngeci avatelekele vyakulya.

³⁹ Co umo wavo waile mu shwata kukashaka vyemba. Co wawanene inwi imo ya mu shwata, wapotweleko matanda amangi, co waile nawo nakuwalengozwela muje mu vyakulya, oloni kazivukile ngeci akewo afwa vati.

⁴⁰ Co vaakele vyakulya a malonga ngeci vanu valye, oloni omo vamakeleleko, co valekele Elisha ngwavo, “Ou mwaze!” Co vavyanene kuulya.

⁴¹ Elisha walombele vunga, wavuvuvungiiye mu ndeo, co wendekele ngwendi, “Vaaneni ngeci valye.” Co vije vyakulya vyapwile vyavivwa.

⁴² Co a simbu ikwavo kwezile munu wa ku Mbale Shalisha, wanenelele Elisha mikasha ya makende makumi avali akulinga na vunga vwa mbale ya maumwa yakulivanga kuteja a mwaka uje vene, na tiliku yaiha. Co Elisha walekele ngamba yendi kwana vije vyakulya ku mbunga ya vaka-kwimanena,

⁴³ oloni ngamba yendi ikeye wamukumbulwile ngwendi, “Kuma unayongola ngwove vyakulya evi vinapumo ku vanalume vakupwa 100 ndi?” Co Elisha wamulekele ngwendi, “Vaane valye, omwo Shukulu Kalunga nendeka ngwendi, ‘Vakalya, co vikasalao vimo lalo.’ ”

⁴⁴ Ngecivene, uje ngamba wavanene vyakulya, ngwe muje mwendekele Shukulu Kalunga, voshe valile, co kwasalele vimo.