2 Vimyene 3 - Livulu lya Shukulu Kalunga

Nzita akati ka vaIsalele na vaMowavi

¹ Mu mwaka wamulikumi na itanu na itatu omo Mwene Njosefati wapwile mwene wa mu Yunda, Njolame muna Ahave wapwile mwene wa mu Isalele, washwanene mu Samaliya myaka likumi na ivali.

² Njolame walingile vuvi ku mesho a Shukulu Kalunga, oloni kapwile wamuvi manene ngwe ishe nambe vaina Njezevele, ikeye washimbwile cifwa ca limanya calingile ishe mukulemesa Mbale.

³ Oloni wapwile ngwe Mwene Yelovowame muna Nembate uje washwanene akulivanga, ikeye watwamenenene Isalele mu vuvi, co ikeye kalikelele kulinga vuvi.

⁴ Mwene Mesha wa vaMowavi wapwile muka-kunyunga vimanga, co a mwaka na mwaka wakele nakwana mwene wa mu Isalele vana va vimanga vakupwa 100,000, na maka a ku majamba vakupwa 100,000.

⁵ Oloni omo Mwene Ahave wa mu Isalele watsile, co Mesha watengulukilile Isalele.

⁶ Co vwasi-vwasi Mwene Njolame watundile mu Samaliya, co wakungulwile mashwalale vendi va nzita.

⁷ Co watumine majwi kuli Njosefati Mwene wa mu Yunda ngwendi, “Mwene wa Mowavi nanjitengulukila, kuma kuwasa kulipandakana nange mu nzita ngeci tumulwise ndi?” Co Mwene Njosefati wamukumbulwile ngwendi, “Eyo, njili amo nove, yange na vanu vange na tuvalu twange twalivwaesela cimweja.

⁸ Ngila muka tukaya mukulwa?” Njolame wakumbulwile ngwendi, “Tukaya ngila yakwita mukati ka mambo ya Endome.”

⁹ Ngecivene, Mwene Njolame na vimyene va Yunda na Endome vakatukile. Omo vendeleko matangwa atanu na avali, co mema ahwile, kuvakele na mema akunwa vanu nambe vimuna vaje vambatele vivala.

¹⁰ Co Mwene Njolame wakomokele ngwendi, “Tawe! Shukulu Kalunga natukundika mu mavoko a mwene wa Mowavi muvutatu vwetu!”

¹¹ Co Mwene Njosefati wehwile ngwendi, “Kuno kukwesi muka-kwimanena wa Shukulu Kalunga ngeci atwihwile kuli Shukulu Kalunga ndi?” Co mwata umo wa mashwalale va Mwene Njolame wakumbulwile ngwendi, “Kwali kuno Elisha muna Shafete. Ikeye waatele kuli Elinja.”

¹² Co Mwene Njosefati wendekele ngwendi, “Wapwa muka-kwimanena wa vushunga.” Ngecivene, vaje vimyene vatatu vaile kuli Elisha.

¹³ Co Elisha wendekele kuli mwene wa mu Isalele ngwendi, “Omwo vikajo njikukwasela? Ya ukehule vaka-kwimanena vaje vaakele nakwihula isho na vanyoko.” Njolame wamukumbulwile ngwendi, “Embwe, Shukulu Kalunga natukundika mu mavoko a mwene wa Mowavi yetu vimyene vatatu.”

¹⁴ Co Elisha wakumbulwile ngwendi, “Njilisinga ali Shukulu Kalunga wakuyoya ou injapangela ngwange nga ove lika ni, nga kunjalingile cuma cimo, oloni njasingimika Mwene Njosefati wa mu Yunda.

¹⁵ Ololo njineneleni muka-kwimba.” Omo muka-kwimba washangumukile kwimba kalyalya kendi, co nzili ya lijwi lya Shukulu Kalunga yezile kuli Elisha.

¹⁶ Ikeye wendekele ngwendi, “Shukulu Kalunga nendeka ngwendi, ‘Indeni viteke mu kandonga koshe aka kakuma.

¹⁷ Nameme kumumono lihunzi nambe nyonzi, oloni kandonga aka kakashula na mema, co yeni, na vingombe veni, na vimuna veni vakwavo vakwambata vivala mukakala na mema amangi akunwa.’ ”

¹⁸ Co Elisha wendekele ngwendi, “Eci cinapu cuma cacasi kuli Shukulu Kalunga kucilinga, co ikeye akamihyanesa kuli vaMowavi.

¹⁹ Mukafungulula vinganda vyavo vyoshe vyavivwa vya vimpaka, mukashinja miti yavo yoshe ya vushuka, co mukofwela masima avo oshe, na mahya avo oshe a vwilo akaviya akuwofwela na mamanya.”

²⁰ Alikaki mutondo, a simbu yakukombelela, n̄ombelo ya a mutondo na mutondo, mema atundile ku mutambela wa Endome ajalelesele livu.

²¹ Omo vaMowavi vazivile ngeci vaje vimyene vatatu vanaija nakuvalwisa, co vasanene vanalume vaje vaka-kulwa, kushangumuka ku vakulunu kutwala ku vanike, co vavasanene ngeci vakavandamene ku nginga.

²² Omo vendukile mutondo, litangwa lyatwile misha a mema, co vaMowavi vamwene aje mema apwile akuvenga ngwe maninga.

²³ Omo vamwene ngacije, vakomokele, co vendekele ngwavo, “Maninga! Vaje vimyene vatatu vanalilwisa ngeci valitsii! Tuyeni tukapukule cilombo cavo!”

²⁴ Oloni omo vetele ku cilombo, vaIsalele vavalwisile nakuvasheka. Co vaIsalele vashekele nakutsiya vaMowavi

²⁵ nakunyongesa vinganda vyavo. Omo vetile ku mahya avo a vwilo, kaIsalele woshe wombililemo limanya noo mahya oshe ashulile na mamanya, co lalo vofwelele masima avo, nakushinja miti ya vushuka vwavo. Akukotoka, Kile Helese nganda yakama ikeyo lika yasaleleo, co na ikeyo lalo vaka-kwasha vipapa vya kenya vaizengelekele nakuyilwisa.

²⁶ Omo Mwene wa Mowavi wanangukile ngeci kasa kuhyana mu nzita, co waile na vanalume 700 vaka-kulwa na mikwale, co wesekele manene na nzili kwita mukati ka vitozi ngeci atewele kuli mwene wa Silya, oloni kasele.

²⁷ Ngecivene, wambatele munendi wa ntwatwa, uje wapandele kumushwana a vumwene, co wamukombelelele a civumbe ca nganda kupwa n̄ombelo kuli njambi wa Mowavi. Co vaIsalele valijajelele, vatundile muje mu nganda velukile ku lifuti lyavo.