2 Vimyene 23 - Livulu lya Shukulu Kalunga

Yosiya avyana kulemesa kwa vaka-kujeneka kukulaela

¹ Mwene Yosiya wasanene vantwama voshe va mu Yunda na mu Yelusalema,

² co mwene waile ku Njuvo ya Shukulu Kalunga na vanalume voshe va mu Yunda na vaje voshe vakele mu Yelusalema na vaka-kukombelela na vaka-kwimanena na vanu voshe va mu Yelusalema, amolika na vaka-kufuka na tuutu. Co mwene wemanene kulutwe lwavo voshe, walavele majwi oshe a mu livulu lya cikumiiyo lije livawanene mu Njuvo ya Shukulu Kalunga.

³ Co mwene wemanene kumukulo wa manda ya vumwene, walikumiiye na Shukulu Kalunga cikumiiyo cakumwononoka, nakunyunga mashiko endi nakushika kwawo na mbunge yendi yoshe na mwonyo wendi woshe, nakukavangeya majwi a cikumiiyo ngwe muje muvawasonekele mu livulu. Co vanu voshe vakulaesele kunyunga cikumiiyo.

⁴ Yosiya washikile Hilikiya Muka-kukombelela Wakama na vaka-kukombelela vendi vakumwata na vaka-kunyunga ku cikolo ca Njuvo ya Shukulu Kalunga kutuwisa mu Njuvo ya Shukulu vivala vyoshe vije vivapangesele mukulemesa Mbale na Ashela njambi wa munakazi na vingongonosi. Co mwene wenyekelele vivala vyoshe evi anja ya nganda kuyehi na Cana ca Kindelone, asinoni vatwalele lito lyavyo ku Mbetele.

⁵ Co watundisile vaka-kukombelela vaje vavemikile vimyene va mu Yunda kukombelela vin̄ombelo a mitula ya vaka-kujeneka kukulaela mu vinganda vya Yunda na mitambela kuyehi na Yelusalema, na vaka-kukombelela voshe vaje vakombelelele vin̄ombelo kuli Mbale na ku litangwa na ku ngonde na ku vimbunga vya mwilu, na ku vingongonosi.

⁶ Co watundisile lalo mu Njuvo ya Shukulu Kalunga cifwa ca Ashela njambi wa munakazi, wacituwisile mu nganda wacitwalele ku Cana ca Kindelone, co wacenyekelele kuje, watwile manungu, co apwile likungu, co walishandwelele akamwa ya vimbumbo vya vanu nkala.

⁷ Co wasiwile vinjuvo vya vikwizi vije vyakele mu Njuvo ya Shukulu Kalunga. (Mukemwo muje muvakele nakupangela vanakazi vuzalo vwakupangesa mukulemesa Ashela.)

⁸ Co wanenele mu Yelusalema vaka-kukombelela vaje vakele mu vinganda vya mu Yunda, co mu lifuti lyoshe washandwele mitula ije vakele nakukombelela vin̄ombelo. Wasiwile lalo mitula ije ivakundikile kuli minzinzime yakujwala ya vimembe kuyehi na cikolo cije catungile Yoshwa, uje wapwile nguvulu wa nganda, cikolo cije cakele ku cimoshwe ku vukovelelo vwa mu nganda.

⁹ Co vaka-kukombelela vaje kuvavatavesele kupanga mu Njuvo ya Shukulu Kalunga embwe, oloni vavatavesele kulya makende akujeneka musima aje avanenelelele vakwavo vaka-kukombelela.

¹⁰ Mwene Yosiya wasiwile lalo Tofete, mutambela vakele nakulemesela vaka-kujeneka kukulaela, mu Cana ca Hinome, ngeci naumo wai akakombelele munendi wa munalume nambe wa munakazi kumupwisa n̄ombelo ya kwenyeka kuli njambi Moleki.

¹¹ Co watundisile lalo tuvalu tuje tuvakundikile vimyene va mu Yunda mukulemesa litangwa, co wenyekele matemba aje avapangesele mukulemesa. (Evi vavinyungilile mu mwela wa mbanja, kuyehi na cikolo ca Njuvo ya Shukulu Kalunga, kuyehi na kuje kwakele mwata wakama Natane Meleke.)

¹² Mwene Yosiya wasiwile mitula ije ivatungile vimyene va mu Yunda akamwa ya mulili wa kwilu wa lipela lya Mwene Ahaze, amolika na mitula ije yatungile Mwene Manase mu mitambela ivali ya vimbanja vya mu Njuvo ya Shukulu Kalunga. Wasiwile ije mitula nakuyivujula, co likungu lyayo walyumbilile mu Cana ca Kindelone.

¹³ Yosiya wasiwile mitula ije yatungile Mwene Solomoni mu ngangela ya Yelusalema, ku mbwela ya Munkinda wa Oliveta, yakulemesela tumponya twa vunyengwe, Asitalete njambi wa munakazi wa ku Sindone na Kemoshe njambi wa Mowavi na Moleki njambi wa Amoni.

¹⁴ Mwene Yosiya wasiwile vimanda vya mamanya mu vimbazuvwila, wasiwile vifwa vya Ashela njambi wa munakazi, co a livu aje vemanene wafwikileo vitsiya vya vanu.

¹⁵ Yosiya wasiwile lalo mutambela mu Mbetele uje uvalemeselele, uje watungile Mwene Yelovowame muna Nembate, uje watwamenenene Isalele mu vuvi. Co Yosiya washimbwile mutula, watavozwele mamanya awo vimbazuvwila, wavitwile vyapwile likungu, co wenyekele lalo cifwa ca Ashela.

¹⁶ Asinoni Yosiya omo watengulukile wamwene vimbumbo vije vyakele a lilundu, co watundisilemo vitsiya nakuvyenyekela a mutula. Mu ngila eyi wasiwile uje mutula, mukulinga vije vyendekele laja muka-kwimanena a simbu ya ciwano omo Mwene Yelovowame wemanene ku mutula. Mwene Yosiya wakengele noku-noku, co wamwene mbumbo ya muka-kwimanena uje wambulwile evi.

¹⁷ Co wehwile ngwendi, “Mbumbo yeyajo ije?” Co vanu va ku Mbetele vamukumbulwile ngwavo, “Yapwa mbumbo ya muka-kwimanena uje watundile ku Yunda, co wambulwile vyuma evi viwunalingi ku mutula ou.”

¹⁸ Co Yosiya washikile ngwendi, “Vitsiya vyendi kesi muvitundisemo.” Ngecivene, kuvatundisilemo vitsiya vyendi, na vije vitsiya vya muka-kwimanena uje watundile ku Samaliya.

¹⁹ Mu nganda na nganda yoshe ya mu Isalele, Mwene Yosiya wasiwile mitambela yoshe ije vakele nakulemesela vaka-kujeneka kukulaela, ije ivatungile vimyene va mu Isalele, vaje vashangumwine vukalu vwa Shukulu Kalunga. Co wasiwile mitula yoshe ije ngwe mwasiwile mitula ya mu Mbetele.

²⁰ Watsiilile vaka-kukombelela voshe vaje vaka-kujeneka kukulaela a mitula aje vakele nakupangela, co wenyekelele vitsiya vya vanu a mutula na mutula. Asinoni welukile ku Yelusalema.

Yosiya alisamba Ciwano ca Pasovala

²¹ Mwene Yosiya washikile vanu kulisamba Ciwano ca Pasovala mukusingimika Shukulu Kalunga Njambi yavo, ngwe muvanasonekele mu livulu lya cikumiiyo.

²² Kukwakele Ciwano ca Pasovala civalisambele vimyene va mu Isalele nambe vimyene va mu Yunda cakulifwa ngwe eci, tunde ku simbu ije omo maako vashwanene mu lifuti.

²³ Co akukotoka, mu mwaka wamulikumi na itanu na itatu wakushwana kwa Yosiya, Ciwano ca Pasovala valisambeleleco mu Yelusalema.

Vyuma vikwavo vyatengulwile Yosiya

²⁴ Akukolesa mashiko aje avasonekele mu livulu lije lyawanene Hilikiya Muka-kukombelela Wakama mu Njuvo ya Shukulu Kalunga, Mwene Yosiya watundisile mu Yelusalema na mu Yunda vanu voshe vaka-kwendeka na vakulu na vaka-kulukiya na vinjambi voshe va mu vinjuvo na tumponya na vivala vyoshe vije vivalemeselele vaje vaka-kujeneka kukulaela.

²⁵ Kukwakele lalo mwene wakufwa ngwe ikeye uje wapangelele Shukulu Kalunga na mbunge yendi yoshe na mana endi oshe na nzili yendi yoshe nakwononoka Mashiko oshe a Mosesa, co lalo kukwesi mwene wakulifwa nendi wai.

²⁶ Oloni vukalu vwa Shukulu Kalunga vwakukomokesa vwezile ali Yunda a vije vyalingile Mwene Manase, co nakweta ku simbu eyi vene te kanda acivututumwise.

²⁷ Shukulu Kalunga wendekele ngwendi, “Njikalinga ku Yunda ngwe vije vinjalingile ku Isalele, njikatundisa vanu va mu Yunda ku mesho ange, co njikavyana Yelusalema, nganda ije injaangwile, na Njuvo yange mwela uje njendekele ngwange lizina lyange vakalilemesela kuje.”

Kutsa kwa Yosiya

²⁸ Vyuma vyoshe vije vyalingile Mwene Yosiya vavisoneka mu Livulu lya Mizimbu ya Vimyene va mu Yunda.

²⁹ Omo Yosiya wapwile Mwene, co Mwene Neko wa ku Ingito watwamenenene mbunga ya mashwalale ku Ndonga ya Yufuleti nakukwasa mwene wa Asilya. Mwene Yosiya wesekele kuvindika ije mbunga ya mashwalale vaIngito ku Mengindo, co vamutsiilile mu nzita.

³⁰ Co vamyata vendi vaakele muvila wendi mu litemba vawilwisile ku Yelusalema, kuje vakamutsindile mu vimbumbo vya vumwene. Co vanu va mu Yunda vaangwile munendi Yowahaze, co vamuvwavesele mazi nakumupwisa mwene.

Mwene Yowahaze wa mu Yunda

³¹ Yowahaze wapwile mwene wa mu Yunda omo wakele na myaka makumi avali na itatu, co washwanene mu Yelusalema vingonde vitatu. Vaina vapwile Hamutale, muna Njelemiya wa ku nganda ya Limbena.

³² Ikeye wakavangeyeye vilinga vya vakukulwila vendi, co walingile vuvi ku mesho a Shukulu Kalunga.

³³ Kushwana kwendi kwahwile omo Mwene Neko wa ku Ingito wamutwalele ku Limbela mu lifuti lya Hamate, nakumupwisa cinzinda, co wafwetesele Yunda mulambu wa makilo 3,400 a siliva, na makilo 34 a ngolinde.

³⁴ Mwene Neko waakele Elyakime muna Yosiya a vumwene vwa mu Yunda kwinga Yosiya, co watengulwile lizina lyendi kupwa Yehoyakime. Mwene Neko watwalele Yowahaze ku Ingito, co wakatsililile kuje vene.

Mwene Yehoyakime wa mu Yunda

³⁵ Mwene Yehoyakime wafwetesele lisimu vanu ngwe kukufuka kwavo, ngeci ase kuwana vimbongo vya lisimu vije vyemikile mwene wa Ingito.

³⁶ Yehoyakime wakele na myaka makumi avali na itanu omo wapwile mwene wa mu Yunda, co washwanene mu Yelusalema myaka likumi na umo. Vaina vapwile Zevinda, muna Pendaya wa ku nganda ya Luma.

³⁷ Wakavangeyeye vilinga vya vakukulwila vendi, co Yehoyakime walingile vuvi ku mesho a Shukulu Kalunga.