2 Vimyene 21 - Livulu lya Shukulu Kalunga

Mwene Manase wa mu Yunda

¹ Manase wakele na myaka likumi na ivali omo wapwile mwene wa mu Yunda, co washwanene mu Yelusalema myaka makumi atanu na itanu. Vaina vapwile Hefeziva.

² Manase walingile vuvi ku mesho a Shukulu Kalunga akukavangeya vilinga vyavivi vya miyati ije yaashekele Shukulu Kalunga ku mesho a vanu vendi omo vakele nakukovela mu lifuti.

³ Ikeye watungulwile mitambela ije vakele nakulemesela vaka-kujeneka kukulaela ije yanyongesele ishe Hezekiya, watungile mitula yakulemesela Mbale, co walingile cifwa ca Ashela njambi wa munakazi, ngwe mwalingile Mwene Ahave wa mu Isalele. Co lalo walemesele vingongonosi.

⁴ Watungile mitula ya vaka-kujeneka kukulaela mu Njuvo ya Shukulu Kalunga, mwela uje watumbwile Shukulu Kalunga ngwendi lizina lyendi vakalilemesela mu Yelusalema.

⁵ Mu vimbanja vivali vya mu Njuvo ya Shukulu Kalunga watungililemo mitula yakulemesela vingongonosi.

⁶ Ikeye wakombelelele munendi wa munalume kupwa n̄ombelo ya kwenyeka. Co wataele vingombo na manseno nakwihula vaka-kulukiya na vaje vaka-kwendeka na vakulu. Ngecivene, walingile vuvi vwakama manene ku mesho a Shukulu Kalunga, co washangumwine vukalu vwendi.

⁷ Ikeye waakele cifwa ca Ashela njambi wa munakazi mu Njuvo ya Shukulu Kalunga, mwela uje watumbwile Shukulu Kalunga kuli Ndaviti na kuli munendi Solomoni ngwendi, “Muno mu Yelusalema, mu Njuvo eyi vene, ukewo mwela unjinalyangwila mu lifuti lyoshe ku miyati likumi na ivali ya Isalele kupwa mwela muje vakalemesela lizina lyange ku myaka yoshe.

⁸ Co nga vanu va Isalele vononoka kushika kwange kwoshe nakunyunga Mashiko oshe aje avaanene ngamba yange Mosesa, co kunjikatava ngeci vavasheke mu lifuti lije linjanene vakukulwila vavo.”

⁹ Oloni vanu va mu Yunda kuvononokele Shukulu Kalunga, co Manase wavatwamenenene mukulinga vuvi vwakama manene kutuvakana vuvi vuje vuvalingile miyati ije yaashekele Shukulu Kalunga ku mesho a vanu vendi omo vakele nakukovela mu lifuti.

¹⁰ Shukulu Kalunga wendekele muli vangamba vendi vaka-kwimanena ngwendi,

¹¹ “Mwene Manase nalingi vyuma vyavivi, vikevyo oni vinatuvakana nevi vivalingile vaKanana, omwo tumponya twendi natwamenena vanu va mu Yunda mu vuvi.

¹² Ngecivene, yange Kalunga Njambi ya Isalele, njikanena n̄avava a Yelusalema naa Yunda ngeci munu woshe uje akazivako akalikomokele.

¹³ Njikanyanyamesa Yelusalema ngwe munjalingile na nganda ya Samaliya, na muje munjalingile na Mwene Ahave wa mu Isalele na vatekulwila vendi, njikanyongesa vanu va mu Yelusalema, ngwe munu akusha lilonga nakulisikumuna, co alifulumika.

¹⁴ Njikakengesa nima vanu vaje vakasalao vacili nakuyoya, co vitozi vavo vakavafungulula nakupukula lifuti lyavo.

¹⁵ Njikalinga evi kuli vanu vange omwo vanalingi cuma cije njazinda, co vananjiluvalesa kutunda ku simbu ije vakukulwila vavo vatundile mu Ingito kweta na ku litangwa lya lelo.”

¹⁶ Manase watsiile vanu vavangi vakujeneka mulonga, co mu vitapalo vya mu Yelusalema mwoshe mwakele nakwita maninga, walingile evi mukutwamenena vanu va mu Yunda ku tumponya, kuvalingisa vuvi ku mesho a Shukulu Kalunga.

¹⁷ Vyuma vyoshe vije vyalingile Manase, amo na vuvi vuje vwalingile, vavisoneka mu Livulu lya Mizimbu ya Vimyene va mu Yunda.

¹⁸ Manase watsile, co vamutsindile mu lihya lya mu lipela, mu lihya lya Uza, co munendi Amoni wamushwanene kupwa mwene.

Mwene Amoni wa mu Yunda

¹⁹ Amoni wakele na myaka makumi avali na ivali omo wapwile mwene wa mu Yunda, co washwanene mu Yelusalema myaka ivali. Vaina vapwile Meshulemete, muna Haluze wa ku nganda ya Njotimbeha.

²⁰ Ikeye wafwile ngwe ishe Manase, walingile vuvi ku mesho a Shukulu Kalunga,

²¹ watembunwinine vilinga vya ishe, walemesele tumponya tuje twalemesele ishe.

²² Ikeye wavyanene Shukulu Kalunga Njambi ya vakukulwila vendi, co kononokele mashiko endi.

²³ Vamyata va Amoni vamukele munga, vamutumbilile vutumbe, co vamutsiilile mu lipela.

²⁴ Vanu va mu Yunda vatsiile vaje vatsiile Amoni, co vapwisile munendi Yosiya mwene.

²⁵ Vyuma vyoshe vije vyalingile Amoni vavisoneka mu Livulu lya Mizimbu ya Vimyene va mu Yunda.

²⁶ Amoni vamutsindile mu mbumbo ya mu lihya lya Uza, co munendi Yosiya wamushwanene kupwa mwene.