2 Vimyene 20 - Livulu lya Shukulu Kalunga

Mushongo wa Mwene Hezekiya nakwinduka kwendi

¹ A matangwa aje Mwene Hezekiya wavinjile, co washakele kutsa. Isaya muka-kwimanena muna Amoze waileko nakukamumona, co wendekele kuli ikeye ngwendi, “Shukulu Kalunga nendeka ngwendi vwaesa mwamuvwa vyuma vyoshe, omwo kuwinduka embwe, oloni utsa. ”

² Hezekiya wakengesele cihanga cendi ku civumbe, co walombelele ngwendi,

³ “Shukulu Kalunga, anuka ngeci yange njakupangela nakukukulaela na kulongwa, simbu yoshe njinakele nakulinga vije viwashakele ngeci njivilinge.” Co walilile manene.

⁴ Co Isaya watundile kuli mwene, oloni omo simbu kanda acete mukati ka mbanja ya lipela, Shukulu Kalunga wamulekele ngwendi,

⁵ “Iluka lalo kuli Hezekiya muka-kushwana vanu vange, co endeka kuli ikeye ngwove, ‘Yange Kalunga, Njambi ya kukulwila yove Ndaviti, njinazivi lilombelo lyove, co njamono misozi yove. Njikakukangwisa, omo kuneti matangwa atatu ukaya ku Njuvo yange.

⁶ Njikawezelela myaka likumi na itanu kukuyoya kwove. Njikakwamena yove na nganda eyi ya Yelusalema kuli mwene wa Asilya. Njikamena nganda eyi, omwo lizina lyange na omwo cikulaeso njalingile kuli ngamba yange Ndaviti.’ ”

⁷ Asinoni Isaya walekele tutumwa twa mwene kwaka likende lya mukuyu a lizimbo, ngeci enduke.

⁸ Co Mwene Hezekiya wehwile ngwendi, “Cimweso mukajo cikamwesa ngeci Shukulu Kalunga akanjikangwisa, omo kuneti matangwa atatu, ngeci njase kuya ku Njuvo ya Shukulu Kalunga?”

⁹ Isaya wamukumbulwile ngwendi, “Shukulu Kalunga akakwana cimweso cakumwesa ngeci ikeye akanyunga cikulaeso cendi. Co ololo, yove ushaka munzinze uye kulutwe manambo likumi indi wiluke munima manambo likumi?”

¹⁰ Hezekiya wakumbulwile ngwendi, “Cacasi munzinze kuya kulutwe manambo likumi, nakwiluka lalo munima manambo likumi.”

¹¹ Isaya walombelele kuli Shukulu Kalunga, co Shukulu Kalunga welwisile munzinze munima manambo likumi a vindendelo vyatungile Mwene Ahaze.

Miluwa vakutunda ku Mbambilone

¹² A simbu ije vene mwene wa ku Mbambilone, Melondake Mbalandane, muna Mbalandane, wazivile ngeci Mwene Hezekiya nakele nakuvinja, co wamutumine mukanda amo na vwana.

¹³ Hezekiya watambwile mwamuvwa vaje miluwa, co wavamwesele vufuko vwendi, siliva na ngolinde na n̄undu na mazi akunika lwengo lwaluvwa na vitwa vyoshe vya mashwalale vendi. Wavamwesele vyuma vyoshe vyakele mu milili yendi yakutulikila na mu vumwene vwendi.

¹⁴ Asinoni Isaya muka-kwimanena waile kuli Mwene Hezekiya, co wamwihwile ngwendi, “Vanu ava vanatundu kulijo? Vikajo vanendeka kuli yove?” Hezekiya wamukumbulwile ngwendi, “Vanatundu ku lifuti lya kulyala, ku Mbambilone.”

¹⁵ “Vikajo vanamono mu lipela?” Hezekiya wamukumbulwile ngwendi, “Vanamono vyuma vyoshe. Njavamwesa vyuma vyoshe vya mu milili yakutulikila.”

¹⁶ Co Isaya walekele mwene ngwendi, “Shukulu Kalunga Muka-nzili yoshe nendeka ngwendi,

¹⁷ simbu ilinakwija omo vyuma vyoshe vya mu lipela lyove, na vyuma vyoshe vije vakukulwila vove vatulikile kweta ku litangwa lya lelo, vakavitwala ku Mbambilone. Nacimo cai cikasalao.

¹⁸ Vatekulwila vove vamo va a mbunge vakavatwala, co vakavapwisile vayunuke ngeci vakapange mu lipela lya mwene wa ku Mbambilone.”

¹⁹ Co Mwene Hezekiya wayongwele ngwendi kukakala kwoloka na vushunga a simbu yakuyoya kwendi, co wakumbulwile ngwendi, “Lijwi wanjileke lyakutunda kuli Shukulu Kalunga linapu lyalivwa.”

Kutsa kwa Mwene Hezekiya

²⁰ Vyuma vyoshe vije vyalingile Mwene Hezekiya na vilinga vyendi vyakunyanyama, na muje mwendile lishali lya mema na muna ndonga ngeci vinene mema mu nganda, vyoshe vavisoneka mu Livulu lya Mizimbu ya Vimyene va mu Yunda.

²¹ Hezekiya watsile, co munendi Manase wamushwanene kupwa mwene.