2 Vimyene 17 - Livulu lya Shukulu Kalunga

Mwene Hosheya wa mu Isalele

¹ Mu mwaka wamulikumi na ivali omo Ahaze washwanene mu Yunda, Hosheya muna Elahe wapwile mwene wa mu Isalele, washwanene mu Samaliya myaka itanu na iwana.

² Co walingile vuvi ku mesho a Shukulu Kalunga, oloni kesi manene ngwe vaje vimyene vashwanene mu Isalele omo ikeye kanda acishwane.

³ Mwene Shalamanesele wa Asilya wamulwisile, co Hosheya waliitile kuli Shalamanesele, wakele nakufweta mulambu kuli ikeye a mwaka na mwaka.

⁴ Oloni ku mwaka umo Hosheya watumine miluwa kuli So, mwene wa Ingito, nakumulomba ngeci amukwase, co alikele kufweta mulambu wa a mwaka na mwaka kuli mwene wa Asilya. Omo Shalamanesele wanangukile, co wakwatele Hosheya nakumwaka mu kamenga.

Kuwa kwa Samaliya

⁵ Asinoni Shalamanesele walwisile Isalele, co wazengelekele Samaliya. Mwaka wamucitatu wakuzengeleka Samaliya,

⁶ wapwile mwaka wamucitanu na iwana wakushwana kwa Hosheya, co mwene wa vaAsilya wafungulwile Samaliya, watwalele vaIsalele ku Asilya kupwa vinzinda, vamo wavaakele mu nganda ya Halahe, co vakwavo wavaakele kuyehi na Ndonga ya Hambole ku mutambela wa Ngozane, co vakwavo wavaakele mu vinganda vya Mendiya.

⁷ Samaliya yawile omwo vaIsalele valingile vuvi ku mesho a Shukulu Kalunga Njambi yavo, uje wavapatwile kuli mwene wa Ingito nakuvatundisa mu lifuti lya Ingito. Vakevo valemesele vinjambi veka,

⁸ co vakavangeyeye futisi ya vanu vaje vaashekele Shukulu Kalunga omo vanu vendi vakele nakuya kulutwe, co vapangesele futisi ije ivanenele vimyene va mu Isalele.

⁹ VaIsalele valingile vyuma vije kashakele Shukulu Kalunga Njambi yavo. Vatungile mitambela yakulemesela vaka-kujeneka kukulaela mu vinganda vyavo vyoshe, kushangumuka ku limbo lyalindondo, kweta na ku nganda yakama.

¹⁰ Co a malundu oshe, na mwisi ya minzinze yoshe ya miti, vashimbikilemo vimanda vya mamanya na vifwa vya Ashela njambi wa munakazi,

¹¹ co venyekelele insense a mitula yoshe ya vaka-kujeneka kukulaela, kukavangeya vilinga vya vanu vaje vaashekele Shukulu Kalunga mu lifuti. Co vashangumwine vukale vwa Shukulu Kalunga a vilinga vyavo vyavivi,

¹² kuvononokele lishiko lya Shukulu Kalunga lyakuvavindika kulemesa tumponya.

¹³ Shukulu Kalunga watumine miluwa vendi na vaka-kwimanena kunangula Isalele na Yunda ngwendi, “Sezeni vingila vyeni vyavivi, ononokeni vizilika vyange vije vili mu Mashiko aje njanene kuli vakukulwila veni aje njaanene kuli yeni ali vangamba vange vaka-kwimanena.”

¹⁴ Oloni kuvononokele, vakaluwisile vimbunge vyavo ngwe vakukulwila vavo, vaje kuvakulaelele kuli Shukulu Kalunga Njambi yavo.

¹⁵ Kuvononokele mashiko endi, kuvanyungile cikumiiyo cije calikumiiye na vakukulwila vavo, nakwononoka kunangula kwendi. Vapwile vanu vakujeneka seo omwo valemesele tumponya twakujeneka seo, nakukavangeya futisi ya miyati ije yavazengelekele, ije yatumbwile Shukulu Kalunga ngwendi kesi vakavatembunwine.

¹⁶ Vapokwele mashiko oshe a Shukulu Kalunga Njambi yavo, vafulile vana va vingombe va nkomba vavali va vutale nakuvalemesa, co lalo vafulile cifwa ca Ashela njambi wa munakazi, co valemesele vingongonosi, co valemesele Mbale kupwa njambi yavo.

¹⁷ Vakombelelele vana vavo va vanalume na ava va vanakazi kupwa vin̄ombelo vyakwenyekela ku vinjambi va vaka-kujeneka kukulaela, co vakele nakwihula kuli vaka-kwendeka na vakulu na kuli vaka-kulukiya, valikundikile vakevo vavenya nakulinga vije vya vunyengwe ku mesho a Shukulu Kalunga, co vashangumwine vukalu vwendi.

¹⁸ Shukulu Kalunga waluvalele na vaIsalele, co kashakele kuvamona, wasezele lika vumwene vwa Yunda.

¹⁹ Oloni nameme vanu va Yunda kuvononokele mashiko a Shukulu Kalunga Njambi yavo, co vatembunwinine futisi ya vanu va Isalele.

²⁰ Shukulu Kalunga wavyanene vaIsalele voshe, wavahisile, co wavakundikile kuli vitozi vakukaluwa noo akukotoka voshe vatundile ku mesho endi.

²¹ Omo Shukulu Kalunga naangununa Isalele ku Yunda, co vaIsalele vapwisile Yelovowame muna Nembate mwene yavo. Yelovowame wavatundisile kuli Shukulu Kalunga nakuvatwamenena mu vuvi vwakukomokesa manene.

²² Vakavangeyeye Yelovowame na vilinga vyoshe vyavivi vije vyalingile,

²³ noo akukotoka Shukulu Kalunga kashakele kuvamona, ngwe mwavanangwile ali vangamba vendi vaka-kwimanena ngwendi akalingamo. Ngecivene, vanu va Isalele vavatwalele ku vunzinda ku Asilya, kukekwo kuvali na lelo lino.

VaAsilya vatunga mu Isalele

²⁴ Mwene wa Asilya wambatele vanu vaje vakele mu vinganda vya Mbambilone na Kute na Ivaha na Hamate na Sefalevaime, co wavaakele mu vinganda vya Samaliya kwinga muli vaIsalele vaje vavatwalele ku vunzinda. Co vambatele vinganda evi nakutungamo.

²⁵ Omo vakele muje akulivanga, kuvalemesele Shukulu Kalunga embwe, co Shukulu Kalunga wavatuminine vindumba, vatsiile vamo akati kavo.

²⁶ Co mwene wa Asilya vamulekele ngeci vaje vanu vaakele mu vinganda vya Samaliya kuvazivukile mashiko a njambi wa mu lifuti lije, ngeci njambi uje navatumina vindumba vaje valinakuvatsiya.

²⁷ Ngecivene, mwene washikile ngwendi, “Ilwiseni umo wa vaka-kukombelela vaje twanenele kupwa vinzinda, mwilwiseni akakale amolika navo, ngeci akalongese vanu mashiko a njambi wa lifuti lije.”

²⁸ Ngecivene, muka-kukombelela umo wa kaIsalele uje watundile ku Samaliya vamwangwile kwiluka ku Isalele, wakakele mu Mbetele, co walongesele vanu mwakulemesela Shukulu Kalunga.

²⁹ Oloni vanu vaje vatungile mu Samaliya vakele nakulishongela tumponya twavo, co vavaakele mu tuzangu tuvatungile vaIsalele. Muyati umo na umo valishongelele tumponya mu vinganda vyavo muje muvakele.

³⁰ Vanu va ku Mbambilone vashongele kamponya Sukote Mbenote, co vanu va ku Kute vashongele kamponya Nelengale, co vanu va ku Hamate vashongele kamponya Ashima,

³¹ co vanu va ku Ivaha vashongele tumponya Nimbehaze na Taletake, co vanu va mu Sefalevaime vakombelelele vana vavo kupwa vin̄ombelo vya kwenyeka ku tumponya twavo Andalameleke na Anameleke.

³² Vanu ava valemesele lalo Shukulu Kalunga, co vaangwile vanu akati kavo kupwa vaka-kukombelela ku mitambela ije vakele nakulemesela vaka-kujeneka kukulaela, nakukombelelako vin̄ombelo vyavo kuje.

³³ Ngecivene, valemesele Shukulu Kalunga, oloni valemesele lalo vinjambi vavo ngwe ku futisi ya miyati ije kuvavatundisile.

³⁴ Na lelo lino vacili nakukava futisi yavo ya laja. Kuvesi nakulemesa Shukulu Kalunga, co lalo kuvesi nakukava vizilika, nambe vilongesa, nambe mashiko aje aanene kuli vatekulwila va Yakomba, uje yalukile Isalele.

³⁵ Shukulu Kalunga walikumiiye cikumiiyo navo, co wavashikile ngwendi, “Kesi mukalemese vinjambi veka embwe, kesi mukavatsikamene nakuvalemesa nambe kuvapangela nambe kuvakombelela vin̄ombelo.

³⁶ Mukononoka lika yange Kalunga, uje wamitundisile mu Ingito na nzili yange yakama, mukanjitsikamena nakunjikombelela vin̄ombelo.

³⁷ Simbu yoshe mukononoke mashiko nakushika kwawo kuje njamisonekelele, kesi mukononoke ku vinjambi veka,

³⁸ kesi mukevale cikumiiyo cije njalikumiiye neni.

³⁹ Mukanjononoke yange Kalunga Njambi yeni, co njikamyamena ku vitozi veni.”

⁴⁰ Oloni vaje vanu kuvatolililile, anga vakavangeyeye futisi yavo yalaja.

⁴¹ Ngecivene, vanu vaje valemesele Shukulu Kalunga, oloni valemesele lalo tumponya twavo, co na ku lelo lino vatekulwila vavo anga vacili nakulinga cifwa eci vene.