2 Vimyene 16 - Livulu lya Shukulu Kalunga

Mwene Ahaze wa mu Yunda

¹ Mu mwaka wamulikumi na itanu na ivali omo Peka muna Lemaliya wapwile mwene wa mu Isalele, Ahaze muna Yotame wapwile mwene wa mu Yunda

² omo wakele na myaka makumi avali, washwanene mu Yelusalema myaka likumi na itanu na umo. Ikeye kakavangeyeye vilinga vyavivwa vya kukulwila yendi Mwene Ndaviti, oloni walingile vije kuvyavwaelelesele Shukulu Kalunga Njambi yendi,

³ wakavangeyeye vilinga vya vimyene va mu Isalele. Co wakombelelele munendi wa munalume kupwa n̄ombelo yakwenyekela ku tumponya, kutembunwina vilinga vya vunyengwe vivalingile vanu vaje vaashekele Shukulu Kalunga mu lifuti omo vaIsalele vakele nakuya kulutwe.

⁴ Oloni Ahaze wakombelelele vin̄ombelo nakwenyekela insense ku mitambela kuje vakele nakulemesela vaje vaka-kujeneka kukulaela, a malundu, na mwisi ya minzinze yoshe ya miti.

⁵ Mwene Lezine wa Silya na Mwene Peka wa mu Isalele valwisile Yelusalema nakuyizengeleka, oloni kuvafungulwile Ahaze.

⁶ (A simbu ije vene, mwene wa Endome walwisile nganda ya Elate ku Silya, co washekelemo vaYunda vaje vakelemo. Co vaEndome vatungile mu Elate, na lelo lino muvacili.)

⁷ Ahaze watumine vanu kuli Tingelate Pilesele, mwene wa Asilya ngwendi, “Yange nji ngamba yove wakuliita kuli yove. Ija wakunjamene ku vimyene va Silya na Isalele, ava valinakunjilwisa.”

⁸ Ahaze wambatele siliva na ngolinde ya mu Njuvo ya Shukulu Kalunga na vufuko vwa mu lipela, co wavitumine kupwa vwana kuli mwene wa Silya.

⁹ Tingelate Pilesele, akukumbulula cihula ca Ahaze cakumwimanena, wakatukile na mashwalale vendi kukalwisa Ndamasiku, nakuyifungulula, watsiile Mwene Lezine, co watwalele vinzinda ku Kile.

¹⁰ Omo Mwene Ahaze waile ku Ndamasiku nakuliwana na Tingelate Pilesele mwene wa Asilya, wakamwene mutula kuje, co wautembunwine nakuusoneka, co watumine cifwa cawo kuli Uliya muka-kukombelela,

¹¹ Ngecivene, Uliya watungile mutula umo wakufwa ngwe ukewo vene, co waumanesele simbu kanda Ahaze eluke.

¹² Omo Ahaze watundile ku Ndamasiku, wawanene mutula unahu laja,

¹³ ngecivene, wakombeleleleo vin̄ombelo vya tusitu vya kwenyeka na milambu ya vimbuto, co wetilileo mulambu wa vinyu nakushamwinako maninga a mulambu wa kulitombola.

¹⁴ Co mutula wa vunengu uje uvakundikile kuli Shukulu Kalunga wakele akati ka mutula wauha na Njuvo ya Shukulu Kalunga, ngecivene, Ahaze waakele uje mutula ku kunto ya mutula wendi wauha.

¹⁵ Asinoni Mwene Ahaze washikile Uliya ngwendi, “Ololo oni pangesa mutula wange wakama akulambula milambu ya kwenyeka ya mutondo na milambu ya cingwezi ya vimbuto na milambu ya kwenyeka na milambu ya vimbuto vya mwene na vanu na milambu ya vinyu ya vanu. Co itilao maninga a tusitu voshe vaje vavanakombelela. Oloni njitulikile mutula wa vunengu njakutaeleo.”

¹⁶ Uliya walingile ngwe muje mwamushikile mwene.

¹⁷ Mwene Ahaze washomozwele matemba a vunengu aje vapangesele mu Njuvo ya Shukulu Kalunga, watundisile vimbashiya vije vyakeleo, watundisile lalo mbashiya ya vunengu ije yakele anima ya vingombe va nkomba va vunengu likumi na vavali, co wayakele a luvula lwa mamanya.

¹⁸ Mukuvwaelelesa mwene wa vaAsilya, Ahaze watundisile vutenda vwa litanda lya vumwene mu Njuvo ya Shukulu Kalunga, co washokele lalo cikolo ca mwene ca ku vushweke ca mu Njuvo ya Shukulu Kalunga.

¹⁹ Vyuma vyoshe vije vyalingile Mwene Ahaze vavisoneka mu Livulu lya Mizimbu ya Vimyene va mu Yunda.

²⁰ Ahaze watsile, co vamutsindile mu vimbumbo vya vumwene mu Nganda ya Ndaviti, co munendi Hezekiya wamushwanene kupwa mwene.